އާންމު ރައްޔިތުންގެ ފަރާތުން ބިދޭސިންގެ މައްސަލަތަކުގައި ބޮޑެތި އެހީތަކެއް ލިބިގެންދާކަމަށް ޗީފް އިމިގްރޭޝާން އޮފިސަރ އަހްމަދު މުޖުތަބާ ވިދާޅުވެއްޖެއެވެ.

މުޖުތަބާ މިފަދައިން ވިދާޅުވީ މެންދުރު ޓީވީ ގެ މައުޟޫ ޕްރޮގްރާމްގައި ވާހަކަފުޅު ދައްކަވަމުންނެވެ.

Ad by Hajj Corporation

މުޖުތަބާ ވިދާޅުވީ ބިދޭސިންގެ މައްސަލައަކީ ހުރިހާ ދިވެހިންނަށްވެސް ޖެހިފަ އޮތް ބޮޑު މައްސަލައެއް ކަމަށާއި އެ މައްސަލައަށް ހައްލެއް ހޯދަން ދިވެހިންވެސް މަސައްކަތް ކުރަމުން ގެންދާ ކަމަށެވެ.

"ބިދޭސިންގެ މައްސަލައަކީ ހަމަ ހުރިހާ ދިވެހިންނަށްވެސް ޖެހިފަ އޮތް ވަރަށް ބޮޑު އުނދަގުލެއް ކަހަލަ މައްސަލައެއް، ހަމަ ހަގީގަތަށްވެސް، ހައްލު ނުކުރެވި ދިޔަ މައްްސަލައަކަށް ވާތީ މި ކަމަށް މިދިޔަ އަހަރު އަޅުގަޑުމެން މި ފެށި އިޕަރޭޝަންތަކާއެކުގައި ދިވެހިން އަޅުގަނޑުމެންނަށް ގުޅާފަވެސް، އެހެނިހެން ގޮތްގޮތުންވެސް މައުލޫމާތު ދިނުމާއި އަޅުގަނޑުމެންނަށް ހިތްވަރު ދިނުމާއި އެކަހަލަ އެތައް ކަމެއް އެބަ ކުރައްވާ " -ޗީފް އިމިގްރޭޝާން އޮފިސަރ އަހްމަދު މުޖުތަބާ

މި ފެށުނު އޮޕަރޭޝާންތަކުގައި ދިވެހިންގެ ވަރަށް ބޮޑު އެއްބާރުލުމެއް ލިބިފައިވާ ކަމަށް ވެސް މުޖުތަބާ ވިދާޅުވިއެވެ.

މުޖުތަބާ ވިދާޅުވީ ދިވެހި ރައްޔިތުން އިމިގްރޭޝަނުން ކުރާ މަސައްކަތްތައް ގާތުން ބެލުން އެއީ ލިބޭ ވަރަށް ބޮޑު ކުރިއެރުމެއް ކަމަށެވެ.

އަދި ބިދޭސިން ގަވާއިދާ ހިލާފަށް އުޅޭ މައްސަލަތަކުގައި ބިދޭސީން ދިރިއުޅޭ ތަންްތަނުގެ މައުލޫމާމާތުތައް އާންމު ރައްޔިތުންގެ ފަރާތުން ލިބި އިމިގްރޭޝާނަށް ވަރަށް ބޮޑު ލުއިތަކެއް ރައްޔިތުން ގެ ފަރާތުން ލިބެމުން އަންނަކަމަށް މުޖުތަބާ ވިދާޅުވިއެވެ.

"އިމިގްރޭޝަން ވޮޗް" އަށް ހުށަހަޅާފައިވާ މައްސަލަތަކުގެ ތެރެއިން 1000 އަށްވުރެ ގިނަ މައްސަލަ މިހާތަނަށް ބަލާފައިވާނޭ ކަމަށް މޯލްޑިވްސް އިމިގްރޭޝަނުން ބުނެއެވެ.