ސިއްހީ ހިދުމަތް ފޯރުކޮށް ދިނުމުގައި ހަނދާން ނައްތަލަން ނުޖެހޭ ތިން ކަމެއް އޮންނަ ކަމަށް މިނިސްޓަރ އޮފް ހެލްތު އަބްދުﷲ ނާޡިމް އިބްރާހީމް ވިދާޅުވެއްޖެއެވެ.

މިނިސްޓަރ މިފަދައިން ވިދާޅުވީ މިރޭ ހެލްތް މިނިސްޓްރީގައި "ޖޮއިން ދަ ހީރޯސް"ގެ ނަމުގައި ލޭ ހަދިޔާ ކުރުމުގެ ޤައުމީ ކެމްޕެއިނު އިފްތިތާހުކުރުމުގެ ޖަލްސާގައި ވާހަކަފުޅު

ދައްކަވަމުންނެވެ.

މި ތިން ކަންތައް ދުވަހަކުވެސް ނިޒާމުގައި ހަނދާން ނައްތާނުލާނެ ކަމަށް ވެސް ހެލްތް މިނިސްޓަރ ފާހަގަކުރެއްވިއެވެ.

ފުރަތަމަ ކަމަކަށް އެންމެނަށް ވެސް ސިއްހީ ހިދުމަތް ލިބުމަކީ ވަރަށް މުހިންމު ކަމެއް ކަމަށް އެމަނިކުފާނު ވިދާޅުވިއެވެ. އެގޮތުން އެންމެ ކުޑަ ރަށުގެ ހުރި އެންމެ ތުއްތު ކުއްޖާއާއި އެންމެ ކުޑަ ރަށުގައި އޮތް އެންމެ އުމުރުން ދުވަސްވީ މީހާ އާއި ސިއްހީ ހިދުމަތް ކަށަވަރު ނުވާހާ ހިނދަކު އެ ސިއްހީ ނިޒާމެއް ފުރިހަމަވެގެން ނުދާ ކަމަށް ވަޒީރު ވިދާޅުވިއެވެ.

ދެވަނަ އަސާސަކީ އެންމެންނަށް ވެސް ހިފޭ އަގުގައި ސިއްޚީ ޚިދުމަތްތައް ލިބުން ކަމަށް ވަޒީރު ފާހަގަކުރަައްވިއެވެ. އެގޮތުން އެންމެނަށް ވެސް އުފުލޭ ބުރައެއްގެ ގޮތުގައި ހެލްތުގެ ހިދުމަތް ލިބި އާންމުވެފައި އޮތުމެވެ. މީގެއިތުރުން ހެލްތް އިންޝުއަރެންސް ގެ ނިޒާމަކީ އެންމެނަށް ވެސް އޭގެން ބޭނުންވާ އެންމެ މުހިންމު ސިއްހީ ހިދުމަތް ލިބޭ ގޮތައް ބައްޓަންކުރެވިފައި އޮތް ނިޒާމެއްކަމުގައިވެ އެ ނިޒާމުން ނާޖައިޒު ގޮތުގައި ފައިސާ ހަރަދުވެގެން ދާ ތަން ފެންނަ ނިޒާމަކަށް މި ނިޒާމު ވެގެން ނުދިއުން ކަމަށް ވެސް ވަޒީރު ފާހަގަކުރެއެވެ.

ތިންވަނަ މުހިންމު ސިޔާސަތެއްގެ ގޮތުގައި ވަޒީރު ފާހަގަކުރެއްވީ ކޮންމެ މުޖުތަމައެއްގައިވެސް ހާއްސަ އަޅަލުމާއި އެހީތެރިކަން ބޭނުންވާ ފަރާތްތަކަށް ސިއްހީ ނިޒާމުގެ ތެރެއިން ބޭނުންވާ ހިދުމަތް އާންމުވެފައި އޮތުން ކަމަށެވެ.

އެގޮތުން ދިވެހި މުޖުތަމައުގައި ތެލަސީމިއާއަކީ ހާއްސަ ގޮތެއްގައި އެބައްޔާ މެދު އަޅާލެވި އެކަމަށް ހާއްސަ ސަމާލުކަމެއް ދޭން ޖެހޭ ކަމެއްކަން އެނގިފައިވާއިރު އަދުގެ ރައީސްގެ ސިޔާސަތުގައި ތެލަސީމިއާ ޕޭޝަންޓުންނަށް އެހީތެރިކަން ފޯރުކޮށްދިނުމުގެ ވައުދު ވަރަށްކުލަގަދަކޮށް ލިޔެވިފައިވާ ވައުދެއް ކަމަށް ވެސް ވަޒީރު ހާމަކުރެއެވެ. މިހާރު މި ވައުދުތައް ފުރިހަމަ ކުރުމުގައި ތަފާތު ލަނޑުދަނޑިތައް ފުރިހަމަ ކުރަމުންދާ ކަމަށް ވެސް އެމަނިކުފާނު ފާހަގަކުރައްވައެވެ.

މިރަސްމިއްޔާތުގައި މިނިސްޓަރ ދެއްކެވި ވާހަކަފުޅުގައި ލޭ ހަދިޔާ ކުރުމުގެ މުހިއްމު ކަން ވަނީ ފާހަގަކުރައްވާފައެވެ. އަދި މި ކެމްޕައިންގައި ބައިވެރިވެ ވީހާވެސް ގިނަ ބޭފުޅުން ލޭ ހަދިޔާކުރުމަށް މިނިސްޓަރ ވަނީ އިލްތިމާސްކުރައްވާފައެވެ.

" ދުނިޔޭގެ އާބާދީގެ ނިސްބަތުންވެސް ރާއްޖެއަކީ ތެލަސީމިއާ ކުދިން ގިނަ ގައުމަކަށްވެފައި އެކުދިންނަށް ބޭނުންވާނެ ލޭ ލުއިފަސޭހަ އިންތިޒާމް ތަކެއްގެ ދަށުން ހަމަޖެހިގެން ދިޔުމަކީ ވަރަށް މުހިއްމު ކަމެއް." މިނިސްޓަރ ވިދާޅުވިއެވެ

އަދި މޯލްޑިވިއަން ބްލަޑް ސަރވިސަސަށް ލިބޭ ލޭގެ %33.9 އަކީ ވޮލަންޓްރީ ޑޮނޭޝަން ކަމަށްވުމާއި އެކު މިއީ ނިސްބަތުން މަދު އަދަދަކަށް ވެފައި މިފަދަ ކެމްޕެއިނެއްގެ ނަތީޖާ އަކަށް ވެގެންދާނީ ވޮލަންޓްރީ ޑޯނާސްގެ ނިސްބަތް އިތުރުވެ މޯލްޑިވިއަން ބްލަޑް ސަރވިސަސަށް ލިބޭ ލޭ އިތުރު ކޮށްދިނުން ކަމަށް ވެސް މިނިސްޓަރ ވިދާޅުވިއެވެ.