ޖަމާލުއްދީން ސްކޫލުގެ (ޖޭއެސް) ކުރީގެ ދަރިވަރު އަދި ގަލޮޅު ދެކުނު ދާއިރާގެ މެމްބަރު މީކައިލް އަޙްމަދު ނަސީމުއާ ގުޅޭ ޕޯސްޓު ޑިލީޓްކުރީ ބެލެނިވެރިންގެ ކަންބޮޑުވުންތަކާ ގުޅިގެން ކަމަށް އެ ސްކޫލުން ބުނެފިއެވެ.

ޖޭއެސް އިން އެފަދައިން ބުނީ، އެ ސްކޫލުގެ 40 ވަނަ އަހަރީ ދުވަހުގެ މުނާސަބަތުގައި، އެ ސްކޫލުުގައި ކުރިން ތަޢުލީމު ހާސިލް ކުރި ފަޚުރުވެރި ދަސްވެނިންގެ އެލަމްނައި ޕްރޮފައިލްތަކެއް އެ ސްކޫލުން ސޯޝަލް މީޑިޔާގައި ޕޯސްޓުކުރުމާ ގުޅިގެންނެވެ. އެގޮތުން މިއަހަރުގެ އަހަރީ ދުވަހުގެ ޕޯސްޓުތަކުގައި، މެމްބަރު މީކާއިލްގެ ޕޯސްޓެއް ހިމަނާފައިވާއިރު، މި ޕޯސްޓުގައި މެމްބަރު މީކާއީލްގެ ސާނަވީ ހަޔާތުގެ ކާމިޔާބި ތަކަށް އަލިއަލުވާލާފައިވެއެވެ. އަދި، ޖަމާލުއްދީން ސްކޫލް އެފަދަ ޤާބިލް ބޭފުޅެއްގެ ކިޔެވުމުގެ ބިންގާއަށް ވުމަކީ އެ ސްކޫލަށް ލިބޭ ވަރަށް ބޮޑު ޝަރަފެއްގެ ގޮތުގައި ވަނީ ސިފަކޮށްފައެވެ.

ނަމަވެސް، އެ ޕޯސްޓު އާންމު ކުރެވުނު ފަހުން، ޖޭއެސްއިން ވަނީ ސޯޝަލް މީޑީއާގެ ހުރިހާ މަންސަތަކުން އެ ޕޯސްޓު ޑިލީޓުކޮށްފައެވެ. އެއާއެކު، އެ ޕޯސްޓު ޑިލީޓުކުރީ ތައުލީމީ ވުޒާރާއިން އަންގައިގެން ކަމުގައި ތުހުމަތުކޮށް މެންބަރު މީކާއިލްވަނީ ނުރުހުން ފާޅުކުރައްވާފައެވެ.

އެހެން ނަމަވެސް، އެކަމާ ގުޅިގެން އެ ސްކޫލުން ރޭ ނެރުނު ބަޔާނުގައި ބުނީ، މެމްބަރު މީކައިލްގެ ޕޯސްޓު ޑިލީޓުކުރީ އެ ސްކޫލަކީ ތަޢުލީމާއި ތަރުބިއްޔަތުދޭ މުއައްސަސާއަކަށް ވެފައި، އެ ސްކޫލަށް ނިސްބަތްވާ ކުރީގެ ދަރިވަރުގެ ފަރާތުން އަދުގެ ދަރިވަރުންނަށް ނަމޫނާއަކަށް ފެންނަންނުޖެހޭފަދަ އަމަލުތަކެއް ފެނުމުން ކަމަށެވެ. އަދި އެފަދަ ކަންކަމަކީ އެ ސްކޫލުން ގަބޫލުކުރާ އަޚްލާޤީ މިންގަނޑުން ބޭރު ކަމެއް ކަމަށާއި، އެކަމާއި ގުޅިގެން ގިނަ ބެލެނިވެރިންގެ ކަންބޮޑުވުންތައް އެ ސްކޫލަށް ލިބުނު ކަމަށެވެ.

އަދި އެ ޕޯސްޓު ޑިލީޓުކުރީ އެލުމްނައި ޕްރޮފައިލް ކޮމެޓީގެ މަޝްވަރާގެ މަތިން ކަމުގައި ފާހަގަކުރަމުން ޖޭއެސްއިން ވަނީ، އެ ޕޯސްޓު ޑިލީޓުކުރުމަށް އެޑިއުކޭޝަން މިނިސްޓްރީން ޕްރެޝަރު ކުރިކަމަށް ފެތުރިފައިވާ ޚަބަރުތަކަކީ ދޮގު ވާހަކަތަކެއް ކަމުގައި ވެސް ބުނެފައެވެ.