މިދިޔަ އަހަރާއި އަޅާ ބަލާއިރު މިއަހަރު އޭލެވެލް އަށް ކިޔަވާ ދަރިވަރުންގެ އަދަދު އިތުރު ކަމަށް އެޑިއުކޭޝަން މިނިސްޓަރު އިސްމާއީލް ޝަފީއު ވިދާޅުވެއްޖެއެވެ.

ސީ.އެޗް.އެސް.އީގެ އަހަރީ އިނާމު ދިނުމުގެ ޖަލްސާގައި ވާހަކަފުޅު ދައްކަވަމުން މިނިސްޓަރު ވިދާޅުވީ ކޮންމެ އަހަރަކުވެސް އެތަށް ހާސް ދަރިވަރުން ތަޢުލީމު ހާސިލުކުރާއިރު، މަތީ ފެންވަރުގެ ފާހެއް ލިބިގެން ޔުނިވަރސިޓީތަކަށް ވަދެވޭ މިންވަރަށް 2500 އެއްހާ ދަރިވަރުންވެސް ފާސްނުކުރެވޭ ކަމަށެވެ.

އެހެން ނަމަވެސް އެކަން ބަދަލުކޮށް ވީހާވެސް ގިނަ ދަރިވަރުންނަށް މަތީ ތަޢުލީމުގެ ފުރުސަތު ފަހިކޮށް، އޭލެވެލް ނިންމާ ދަރިވަރުންގެ އަދަދު އިތުރުކުރުމަކީ ސަރުކާރުން އެންމެ ބޮޑު އިސްކަމެއް ދޭނެ އެއްކަމެއް ކަމަށާއި، މަތީ ޘާނަވީ ތަޢުލީމު ހާސިލުކުރަން ބޭނުންވާ ދަރިވަރުންނަށް ދިމާވާ އެންމެ ބޮޑު ގޮންޖެހުމަކީ އޭލެވެލް އަށް ވަދެވޭ ކްރައިޓީރިއާގައިވާ 5 މާއްދާ ނުވަތަ 3 މާއްދާއިން ފާސްނުވުން ކަމަށް މިނިސްޓަރު ވިދާޅުވިއެވެ.

އަދި ސަރުކާރުން ކުރި މަސައްކަތުގެ ދަށުން ދިވެހިރާއްޖޭގެ 23 ސްކޫލެއްގައި މިހާރު ވަނީ 3 މާއްދާއިން ނުވަތަ 2 މާއްދާއިން ފާސްވި ދަރިވަރުންނާވެސް އެކުގައި، ގިނަ ދަރިވަރުންނަށް މަތީ ޘާނަވީ ކިޔެވުމުގެ ފުރުޞަތު ފަހިކޮށްދީފައެވެ. މިނިސްޓަރު ވިދާޅުވީ، ހުޅުވާލި ފުރުޞަތާއެކު، މިއަހަރު ސަރުކާރު ސްކޫލުތަކުގައި އަލަށް 2000އަށް ވުރެ ގިނަ ދަރިވަރުން އޭލެވެލްއަށް ކިޔަވަމުންދާ ކަމަށާއި، މިއީ މިދިޔަ އަހަރާ އަޅާ ބަލާއިރު 77% އިތުރު އަދަދެއް ކަމަށެވެ.

މިނިސްޓަރު ވިދާޅުވީ، ދަރިވަރުން ތަރައްގީކުރެވޭނީ ދަރިވަރުންނަށް ފުރުސަތުދީގެން އަދި އެކަށީގެންވާ ޓީޗިން ފޯސްއެއް ބިނާކުރެވިގެން ކަމަށެވެ.

އަލަށް ކިޔަވައިދޭންފެށި 23 ސްކޫލާއެކު، މަތީ ޘާނަވީއަށް ކިޔަވައިދޭ 45 ސަރުކާރު ސްކޫލް މިހާރު ރާއްޖޭގެ އެކި ހިސާބުތަކުގައި ވަނީ ގާއިމުކުރެވިފައިވެއެވެ.

މިއަހަރު އޭލެވެލް އަށް ކިޔަވާ ދަރިވަރުންގެ އަދަދު މިދިޔަ އަހަރާ އަޅާ ބަލާއިރު ބޮޑު ޕަސެންޓެއް އިތުރުކުރެވިފައިވާއިރު، ސަރުކާރުން ވަނީ އޯލެވެލް އިމްތިހާނުން 5 މާއްދާއިން ފާސް ނުވި ނަމަވެސް، ސަރުކާރުގެ ސްކޫލްތަކުން އޭ ލެވެލް ކިޔެވޭ ގޮތަށް އުސޫލަށް ބަދަލުތަކެއް ގެނެސްފައެވެ. އެގޮތުން ތިން މާއްދާއިން ފާސްވެގެން ދެން އޭލެވެލްއަށް ކިޔެވުމުގެ ފުރުސަތު ދަރިވަރުންނަށް ފަހިވެގެންދާނެއެވެ.