ނިމިދިޔަ ރިޔާސީ އިންތިހާބުގެ ފުރަތަމަ ބުރާއި ދެވަނަ ބުރާއި ދޭތެރޭގައި އެމްޑީޕީގެ ސަރުކާރުން 17 ރުފިޔާއަށް ހުރި މަހުގެ އަގު 25 ރުފިޔާއަށް ބަދަލުކުރުމުން ކަނޑުމަހުގެ ބާވަތްތައް އުފައްދާ ކުދި އަދި މެދުފަންތީގެ ވިޔަފާރިތައް ބަނގުރޫޓުވިކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަހުމަދު ޝިޔާމް ވިދާޅުވެއްޖެއެވެ.

ޝިޔާމް މިފަދައިން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި ކެންދޫ ދާއިރާގެ މެންބަރު މައުރޫފް ޒާކިރު ކުރެއްވި މުޅިދިރިއުޅުން މަސްވެރިކަމުގެ މައްޗަށް ބިނާވެފައިވާ ކަނޑުމަސ،ް ލައްޓ،ި ރާގޮނޑ،ި ހިކިކަނޑުމަހުގެ ގޮތުގައި ކައްކައ،ި ހިއްކައި ވިއްކައިގެން އާމްދަނީ ހޯދާފަރާތްތަކާއ،ި ފަރުމަސްވެރިކަން ކުރާ ފަރާތްތައް އަދިވެސް އެހެނިހެން މަސްވެރިކަންކުރާ ފަރާތްތަކަށް ދެމެހެއްޓެނިވި އާމްދަނީއެއް ހޯދައިދިނުމަށް ކުރަމުންދަނީ ކޮން ކަންތައްތަކެއްތޯ އާއި އަދި އެ ފަރާތްތަކަށް ތެލުގެ ސަބްސިޑީ ނުލިބި، މަސްވެރިކަމުގެ ސިނާއަތުގެ އެކި ބާވަތްތަކުން މަސްވެރިންގެ މެދުގައި ތަފާތުކުރެއްވުން ގެންގުޅުއްވަނީ ކީއްވެތޯ ކުރެއްވި ސުވާލުގެ ޖަވާބު ދެއްވަމުންނެވެ.

ޝިޔާމް ވިދާޅުވީ 17 ރުފިޔާއިން 25 ރުފިޔާއަށް އަގު ބޮޑުކުރުމުން މިފްކޯއިން އެކަނި މަސްގަނެވޭ ހާލަތަށް ރާއްޖޭގެ ހާލަތުދިޔަކަމަށެވެ.

"ރިޔާސީ އިންތިހާބުގެ ފުރަތަމަ ބުރާއި ދެވަނަ ބުރާއި ދޭތެރޭގައި 17 ރުފިޔާއަށް ހުރި މަހުގެ އަގު 25 ރުފިޔާއަށް ބަދަލުކުރި ބަދަލުކުރުން ވެގެން ދިޔައީ ދެންމެ އިއްޒަތްތެރި މެންބަރު ފާހަގަކުރެއްވި މަހުގެ އުފެއްދުންތައް އުފައްދާ ފަރާތްތައް ހަޤީގަތުގައި ހުރިހާ ފަރާތްތަކެއް ކަހަލަ ގޮތަކަށް ބަނގުރޫޓުވެގެން ދިޔައީ.މަހުގެ އަގަށް މި ސަރުކާރުން ގެނައި ބަދަލަކީ މިފަދަ ކުދި ވިޔަފާރިތައް ހިންގާ ކުންފުނިތަކާއި އަމިއްލަ ފަރާތްތަކަށް ދެވުނު ހަދިޔާއެއް. ބަދަލު ގެނެސްފައިވަނީ ދުނިޔޭގެ ބާޒާރުގައި މަހުގެ އަގަށް ބަލައި އެއަގުތަކަށް ރިއާއަތްކޮށްފައި."

މަސްވެރިކަމުގެ ސިނާއަތުގައި ހަރަކާތްތެރިވާ އަމިއްލަ ކުންފުނިތަކުން އާ އުފެއްދުންތައް ބާޒާރަށް ނެރުމަށާއި އުކާލާ މަހުގެ ބައިތަކުން ފައިދާކުރުވަނިވި ޕްރޮޑްކްޓުތައް ނެރުމަށް ވޯލްޑު ބެންކުގެ އެހީތެރިކަމާއެކީ މިހާރު 8.3 މިލިޔަން ޑޮލަރު ނުވަތަ 128 މިލިއަން ރުފިޔާ ހަމަޖެހިފައިވާކަމަށާއި މީގެ އިތުރުން ކުދި އަދި މެދުފަންތީގެ ވިޔަފާރިތަކުން މަހުގެ އުފެއްދުންތައް އުފައްދައި ބާޒާރަށް ނެރުމަށް ބާރު އެޅުމުގެ ގޮތުން 1.8 މިލިއަން ޑޮލަރު ނުވަތަ 27.7 މިލިއަން ރުފިޔާ މިހާރު ހަމަޖައްސާފައިވާކަމަށް ވަޒީރު ވިދާޅުވިއެވެެ.

އެ މަޝްރޫއުގެ ދަށުން ހުރިހާ ޕްރޮޖެކްޓުތަކުގެ ޖުމްލަ އަގުގެ 40 އިންސައްތަ ހިލޭ އެހީގެ ގޮތުގައި ލިބޭނެކަމަށް ޝިޔާމް ވިދާޅުވިއެވެ.

މީގެ އިތުރުން ފަރުމަހުގެ މަސްވެރިކަން ކުރާ މީހުންގެ ވިޔަފާރި ފުޅާ ކުރުމަށް 10 އަހަރުން ދައްކާ ގޮތަށް 700،000 (ހަތް ލައްކަ) ރުފިޔާއާ ހަމައަށްް އެއްވެސް ރަހުނެއް ނެތި 5 އިންސައްތަ އިންޓްރެސްޓުގައި ލޯނު ދޫކުރާ ކަމަށް ވަޒީރު ވިދާޅުވިއެވެ.

މިއީ މަސްވެރިން މަސް ކިރުމަށް ކިޔުގައި ޖެހިގެން ތިބެންޖެހޭނެ ފަހު އަހަރު ކަމަށް ޝިޔާމް ވިދާޅުވިއެވެ.

"ކިޔޫ ނަމްބަރު އެބަދެވޭ. ކިޔޫ ނަމްބަރު ދެނީ ދޯންޏަކުން ގުޅާލާފަ ތިމަންނަމެންގެ އެބަހުއްޓޭ 40 ޓަނު ނޫނީ 50 ޓަނު. ނަމަވެސް ބަނދަރަށް އަންނައިރު މި ހުންނަނީ 20 ޓަނު. އެހެންވީމަ ކިޔޫގެ ދެވަނައިގައި އިންނަ ދޯންޏަށް އަވަހަށް ކިޔޫ ނަމްބަރު އެބަ ދެވޭ. މި ކިޔޫ އަޅުގަނޑުމެން ނައްތާލާނަން"

މިފްކޯގެ ކެޕޭސިޓީއަކީ 420 މެޓްރިކްޓް ޓަނުކަން ޝިޔާމް ފާހަގަކުރެއްވިއެވެ. ޝިޔާމް ވިދާޅުވީ މަސް ގަންނަން މިދިޔަ ސަރުކާރުން ގެނައި "ޖަޒީރާ ބޯޓް" ތަކަކީ އެ މަސައްކަތަށް ދަަށް ބޯޓުތަކެއްނަމަވެސް "ޖަޒީރާ ދޭއް" އަދި "ޖަޒީރާ ތިނެއް"ގެ މަރާމާތުގެ މަސައްކަތް މިހާރު ފަށާފައިވާކަމަށެވެ. ބުދަ އަދި ބުރާސްފަތިދުވަހު މަސައްކަތްކޮށްގެން އެ ބޯތުތައް އޮޕަރޭޝަނަށް ގެނެވޭނެ ކަމަށް ޝީޔާމް ވިދާޅުވިއެވެ.