ރާއްޖެއިން ދެމެހެއްޓެނިވި މަސްވެރިކަމެއް ކުރާއިރު، ޔޫރަޕިއަން ޔޫނިއަން (އީޔޫ) އިން ބޮޑު ޑިއުޓީ ނަގަނީ ކީއްވެގެންތޯ މަސްވެރިކަމާ ބެހޭ ވަޒީރު އަޙްމަދު ޝިޔާމް ސުވާލު އުފައްދަވައިފިއެވެ.

ވަޒީރު އެފަދައިން ސުވާލު އުފައްދެވީ އެ ވުޒާރާއިން މިއަދު ބޭއްވި ނޫސްވެރިންގެ ބައްދަލުވުމުގައި، ލޭނުގެ މަސްވެރިކަން ކުރުމަށް ރާއްޖެއިން އަލުން ހުއްދަ ދިނުމާ ގުޅޭގޮތުން ނޫސްވެރިއަކު ކުރި ސުވާލަކަށް ޖަވާބު ދެއްވަމުންނެވެ.

އެގޮތުން ޔޫރަޕިއަން ޔޫނިއަނުން ލޭން މަސްވެރިކަން ޕްރޮމޯޓުކުރާ ގައުމުތަކުގެ މަސްތައް ބޮއެކަޓް ކުރުމަށް މީގެ ކުރިން އަންގާފައިވާކަމަށާއި، އޭޝިއާގެ ބައެއް ގައުމުތަކަށް އަމާޒުކޮށް އީޔޫ އިން 2019 ވަނަ އަހަރު ނެރުނު ރިޕޯޓުގައި، ރާއްޖެއިން ވެސް ލޭނުގެ މަސްވެރިކަން ހުއްޓާލީ އޭރު އީޔޫ އިން ނެރުނު އިންޒާރުގެ ސަބަބުން ކަމުގައި އެ ނޫސްވެރިޔާ ފާހަގަކުރިއެވެ.

އެ ސުވާލަށް ޖަވާބު ދެއްވަމުން ވަޒީރު ވިދާޅުވީ، 2019 ވަނަ އަހަރު ރާއްޖެއިން ލޭނު އެޅުން މަނާކުރީ އީޔޫއިން އެފަދަ އިންޒާރެއް ދީގެން ނޫން ކަމަށާއި، އޭރުގެ ސަރުކާރުން އެ ނިންމުން ނިންމީ ސިޔާސީ ނިންމުމެއްގެ ގޮތުގައި ކަމަށެވެ.

އަދި އީޔޫ އިން ރާއްޖޭގެ ލޭނު މަސްވެރިކަމުގެ ވާހަކަ ދައްކާއިރު، ރާއްޖެއާ އަވައްޓެރި ގިނަ ގައުމުތަކަކީ ލޭނު މަސްވެރިކަން ކުރާ ގައުމުތައް ކަމުގައި ފާހަގަ ކުރައްވަމުން ވަޒީރު ވިދާޅުވީ، ރާއްޖެއިން ދެމެހެއްޓެނިވި ގޮތުގައި މަސްވެރިކަން ކުރާތާ އެހާ ދުވަސްވެ، އީޔޫއާއެކު ޑިއުޓީ ކުޑަ ކުރުމުގެ މަޝްވަރާއަށް 12 އަހަރު ވީއިރު ވެސް، އީޔޫގެ ގައުމުތަކަށް ރާއްޖެއިން އެތެރެކުރާ ގައުމުތަކަށް ޑިއުޓީ ކަނޑަލެވިފައި ނުވާ ކަމަށެވެ.

އެހެން ނަމަވެސް، ރާއްޖެއިން ކުރާ މަސްވެރިކަމާ ޚިލާފަށް، ލޭނުގެ މަސްވެރިކަން ކުރާ ގައުމަތަކަށް ވެސް އެ ލުއި ލިބޭކަން ވަޒީރު ފާހަގަކުރެއްވިއެވެ.

"އަޅުގަނޑުމެން 12 އަަހަރުވެއްޖެ ޔޫރަޕިއަން ޔޫނިއަންގެ ޓެރިފް ބޮޑުވެގެން ޓެރިފް ކުޑަކުރަން މަސައްކަތްކުރާތާ. އެ 12 އަހަރު ތެރޭގައި، އަޅުގަނޑުމެންނަކީ ސަސްޓެއިނަބަލް ފިޝަރީޒްގެ ޗެމްޕިއަނުން. އަޅުގަނޑު ގަބޫލުކުރާ ގޮތުގައި މިއަދު ހަގީގަތުގައި 12 އަހަރު ދުވަސްވަންދެން މިހާ ސަސްޓައިނަބްކޮށް އަޅުގަނޑުމެން މަސައްކަތްކުރިއިރު، ވަކިން ޚާއްސަކޮށް ފިޝަރީޒް، މަސްވެރިކަން ކުރާ ބަޔަކަށް އެހެން ބައެއް ދާ އަޅާ ގައުމުތަކާ އެހެން ބައެއް ކަހަލަ، އަދި ލޭނު މަސްވެރިކަން ކުރާ ފަރާތްތަކަށް ދޭ ލުއިތައް ކީއްވެގެންތޯ އަޅުގަނޑުމެންނަށް ނުލިބެންވީ،"

"އަޅުގަނޑުމެން ސަސްޓެއިނަބަލް ފިޝަރީޒް ތެރޭގައި އެހާ ވަރުގަދައަށް ތި އަޅުގަނޑުމެންނަށް ކީއްވެގެންތޯއޭ މިވަރުގެ ބޮޑު ޑިއުޓީއެއް އެޕްލައިކުރަންވީ. މަސްވެރިކަމުގެ ގޮތުގައި ވާހަކަ ދައްކާކަމުގައިވާނަމަ، ސަސްޓެއިނަބް ފިޝަރީޒްގެ ގޮތުގައި ވާހަކަ ދައްކާ ނަމަ،" ވަޒީރު ވިދާޅުވިއެވެ.

ވަޒީރު ވިދާޅުވީ ރާއްޖެއިން ލޭނު އެޅުން ހުއްދަ ކުރުމަށް އަލުން ނިންމި ނަމަވެސް، އީޔޫއާއެކު ކުރެވޭ މަޝްވަރާތައް ހުއްޓޭނެ ފަދަ ވާހަކަތަކެއް އަދި ދެކެވިފައިނުވާ ކަމަށެވެ. އަދި މަސްވެރިކަމުގައި ލޭނު އެޅުން ހުއްދަ ކުރަނީ މަސްވެރިކަން ސިންދަފާތުކޮށް، ދައުލަތަށް ލިބޭ އާމްދަނީ އިތުރުކުރަން ކަމުގައި ވަޒީރު ފާހަގަކުރެއްވިއެވެ.

ރާއްޖެއިން ލޭނުގެ މަސްވެރިކަމަށް އަލުން ހުއްދަ ދިނުމަށް ނިންމާ އެކަން އިއުލާން ކުރީ މިދިޔަ މަހުގެ ތެރޭގައެވެ. އެއާއެކު އެކަމާ ދެކޮޅަށް ރާއްޖޭގެ ގިނަ ޖަމިއްޔާތަކާއި އާންމުން ވެސް ގެންދަނީ ޚިޔާލު ފާޅުކުރަމުންނެވެ.

އެކަމާ ގުޅިގެން ސަރުކާރުން ބުނި ގޮތުގައި، ލޭނުގެ މަސްވެރިކަން ކުރުމަށް ސަރުކާރުން ނިންމާފައިވަނީ ރާއްޖޭގެ އެއްގަމުން 100 މޭލު ދުރުގައި އަދި 60 މީޓަރު އަޑީގައި ކަމަށެވެ. އެކަމުގެ ސަބަބުން ލޭނުގައި އެޅޭ ބައި ކެޗް މަސްތަކުގެ ތެރޭގައި، ހިމާޔަތްކޮށްފައިވާ މަސްތައް އެޅުން މަދުވާނެ ކަމަށް ސަރުކާރުން ގަބޫލުކުރެއެވެ.