މަސްވެރިކަމާއި ދަނޑުވެރިކަމުގެ ސިނާއަތުންލިބޭ އާމްދަނީ އިތުރު ކުރުމަށް އިންވެސްޓަރުންނަށް ދެވެންހުރި ލުއިތައް ބަލަމުން އަންނަ ކަމަށް މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ މިނިސްޓަރު އަހުމަދު ޝިޔާމް ވިދާޅުވެއްޖެއެވެ.

Ad by Hajj Corporation

މެންދުރު ޓީވީގެ މައުލޫ ޕްރޮގްރާމްގައި ވާހަކަދައްކަވަމުން ޝިޔާމް ވިދާޅުވީ މަސްވެރިކަމާއި ދަނޑުވެރިކަމުން ލިބޭ އާމްދަނީ ތިން ގުނަ އަށް ވުރެ އިތުރު ކުރުމަށް ބޭނުންވާ ކަމަށެވެ. އަދި އެ ލަނޑުދަނޑިއަށް ވާސިލްވުމަށް ދުނިޔޭގެ އެހެން ގައުމުތަކުން އިންވެސްޓަރުންނަށް ކަންކަން މަގުފަހިކޮށްދެމުންދާ ގޮތްތައް ބަލައި ރާއްޖޭގައި އެކަންކަން މަގުފަހިކޮށްދެވޭނެ ގޮތްތައް ބަލަމުން އަންނަ ކަމަށް ވެސް މިނިސްޓަރު ވިދާޅުވި އެވެ.

މިނިސްޓަރު ޝިޔާމް ވިދާޅުވީ މަސްވެރިކަމާއި ދަނޑުވެރިކަމުގެ ސިނާއަތް އިތުރަށް ކުރިއެރުވުމަށްޓަކާ އެ ދެ ދާއިރާއާ ގުޅޭ ގާނޫނުތަކަށް ބަދަލުތަކެއް ގެނެސްފައިވާ ކަމަށެވެ. އަދި ގާނޫނުތަކާ ގުޅިގެން ހަދަންޖެހޭ ގަވާއިދުތައް އެކުލަވާލުމުގެ މަސައްކަތްތައް މިހާރު ކުރަމުން އަންނަ ކަމަށް ވެސް ޝިޔާމް ފާހަގަ ކުރެއްވެވި އެވެ.

ޝިޔާމް ވިދާޅުވީ ދަނޑުވެރިކަމުގެ ސިނާއަތް ހަރުދަނާ ކުރުމަށްޓަކައި ގޮންޖެހުންތަކެއްހުރި ކަމަށެވެ. އަދި މިގޮންޖެހުންތަކުން އަރައިގަތުމަށް މިހާރު ދަނޑުވެރިކަމުގެ ސިނާއަތުގައި މަސައްކަތްކުރާ ފަރާތްތަކާއެކު ގާތުން މަސައްކަތްތަކެއް ކުރަންޖެހޭ ކަމަށާއި މިހާރަށްވުރެ ގަވައިދުތައް ވެސް ހަރުދަނާ ކުރަންޖެހޭ ކަމަށް ވެސް މިނިސްޓަރު ވިދާޅުވި އެވެ.