ދިވެހިރާއްޖޭގެ ކަނޑުގެ މުއްސަނދިކަން އެންމެ ފުރިހަމަގޮތުގައި ބޭނުންކުރުމުގެ ގޮތުން، މާކަނޑުގެ ފުން ސަރަހައްދުތަކުގައި ދިރިއުޅޭ ތުތި ބޯވަދިލަމަހުގެ (ޑައިމަންޑް ބެކް ސްކުއިޑް) މަސްވެރިކަމުގެ ތަމްރީން ޕްރޮގްރާމެއް ގއ. ވިލިނގިލީގައި ކާމިޔާބުކަމާއެކު ކުރިއަށް ގެންގޮސްފިއެވެ.

މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން މައުލޫމާތު ދެއްވި ގޮތުގައި، މި މަހުގެ 3 އިން 4 އަށް ކުރިއަށް ގެންދިޔަ މި ތަމްރީނުގައި 8 ބައިވެރިން ބައިވެރިވެފައިވެއެވެ. މިއީ މި ބާވަތުގެ މަސްވެރިކަން ދަސްކުރުމަށް ޝައުގުވެރިވާ ފަރާތްތަކަށް އަމާޒުކޮށްގެން މިނިސްޓްރީން ސިލްސިލާކޮށް ކުރިއަށްގެންދާ ޕްރޮގްރާމެކެވެ.

Ad by Hajj Corporation

މިފަދަ ތަމްރީން ޕްރޮގްރާމްތައް ބޭއްވުމުގެ މައިގަނޑު މަގުސަދަކީ ރާއްޖެއަށް އާ ބާވަތެއްގެ މަސްވެރިކަން ތައާރަފްކުރުމާއި، ޒުވާނުން މަސްވެރިކަމުގެ ސިނާއަތަށް އަހުލުވެރިކޮށް، އެ ދާއިރާއަށް ނެރުން ކަމަށް އެ ވުޒާރާއިން ފާހަގަކުރެއެވެ.

މި ޕްރޮގްރާމްގެ ފުރަތަމަ ބުރު މިދިޔަ ސެޕްޓެމްބަރު މަހުގެ 15 ވަނަ ދުވަހު ފުވައްމުލައް ސިޓީގައި 14 ބައިވެރިންނާއެކު ވަނީ ބާއްވާފައެވެ. އަދި މި ތަމްރީނުތަކުގެ ދެވަނަ ބުރު ގދ. ފިޔޯރީގައި ކުރިއަށް ގެންދިއުމަށް ވަނީ ހަމަޖެހިފައެވެ.