މަސްވެރިކަމާއި، ދަނޑުވެރިކަމާއި އަދި ކަނޑުގެ ވަސީލަތްތަކާ ބެހޭ ވުޒާރާގެ ފަރާތުން ހިންގާ މެރިން ހެޗަރީ ސްކިލްސް ޑިވެލޮޕްމެންޓް ޕްރޮގްރާމްގެ ދަށުން، 4 ވަނަ ބޭސިކް މެރިކަލްޗާ ޓްރެއިނިންގ ކޯސް ކ. މަނިޔަފުށީގައި ފަށައިފިއެވެ.

މޯލްޑިވްސް މެރިން ރިސާޗް އިންސްޓިޓިއުޓް (އެމްއެމްއާރްއައި) އިން އިންތިޒާމުކޮށްގެން ކ. މަނިޔަފުށީ ރިސާޗް އެންޑް ޓްރެއިނިންގ ފެސިލިޓީގައި ކުރިއަށްގެންދާ މި ޕްރޮގްރާމަކީ މި އަހަރު މި ސިލްސިލާގެ ދަށުން ހިންގޭ 4 ވަނަ ކޯހެވެ. ވޯލްޑް ބޭންކުގެ އެހީގައި މިނިސްޓްރީން ހިންގާ ޓްރާންސްފޯމް ޕްރޮޖެކްޓުގެ އެހީތެރިކަމާއެކު ކުރިއަށްގެންދާ މި ތަމްރީނު ޕްރޮގްރާމްގެ މައިގަނޑު މަޤްޞަދަކީ ދެމެހެއްޓެނިވި ގޮތެއްގައި ރާއްޖޭގައި މެރިން އެކުއަކަލްޗާ ސިނާއަތެއް ޤާއިމުކުރުމަށް ބޭނުންވާ ދިވެހި ފަންނުވެރިން ބިނާކުރުމެވެ.

Ad by Hajj Corporation

މި ތަމްރީނު ޕްރޮގްރާމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ "ހަފްތާ 14" މަގުޗާޓުގައި ހިމަނުއްވާފައިވާ ޙަރަކާތްތަކުގެ ތެރެއިން ފެށިގެން ކުރިއަށްގެންދެވޭ ޕްރޮގްރާމެކެވެ. މެރިކަލްޗާ ދާއިރާ ތަރައްޤީކުރުމަކީ މި ސަރުކާރުން ޚާއްޞަ އިސްކަމެއް ދެއްވައިގެން ގިނަ މަސައްކަތްތަކެއް ފަށްޓަވާފައިވާ ދާއިރާއެކެވެ. މިގޮތުން ފަރުމަސް އާލާކުރުމަށް ބޭނުންވާ ހެޗަރީތައް ޤާއިމުކުރާނެ ގޮތާއި އެކުއަކަލްޗާގެ މުހިންމު ހުނަރުތައް ޒުވާނުންނަށް ދަސްކޮށްދިނުމަށް ސަރުކާރުން އަންނަނީ އިސްކަންދެމުންނެވެ.

މި ކޯހުގައި އެކުއަކަލްޗާ ނިޒާމުތައް ބަލަހައްޓާނެ ގޮތާއި، ދިރޭ ކާނާ އާލާކުރުމާއި، ފާނައާއި ހުއިފިލަނޑާ، ދިވެހި މާގަނޑުމަސް، އިތާމުތް އަދި ސީވީޑް އާލާކުރުމުގެ މުހިންމު މަޢުލޫމާތުތައް ދަސްކޮށްދެވޭނެއެވެ. މީގެއިތުރުން އާލާކުރާ ބާވަތްތަކަށް ޖެހޭ ބަލިތައް ދެނެގަނެ ރައްކާތެރިވުމާއި، ތިމާވެށްޓަށް ގެއްލުން ކުޑަވާނެހެން މަސައްކަތް ކުރާނެ ގޮތްތަކުގެ މަޢުލޫމާތު ދިނުމާއެކު، ފާނައާއި ހުއިފިލަނޑާ އަދި މާގަނޑުމަސް އާލާކުރުމުގެ އަމަލީ ތަޖުރިބާ ބައިވެރިންނަށް ފޯރުކޮށްދިނުމަށް ވަނީ ހަމަޖެހިފައެވެ.