ބިލިއަނެއްހާ ރުފިޔާގެ މަންފާއެއް ލޭނު މަސްވެރިކަމުން ރާއްޖެއަށް ލިބޭނެ ކަމަށް މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު އަޙުމަދު ޝިޔާމް ވިދާޅުވެއްޖެއެވެ.

ލޭނު މަސްވެރިކަން އަލުން ހުއްދަ ކުރުމާ ގުޅުވައި މަސްވެރިކަމާ ބެހޭ ވުޒާރާއިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަަވަމުން މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު އަޙުމަދު ޝިޔާމް ވިދާޅުވީ، ލޭނުގެ ސަބަބުން އެއްބިލިއަން ރުފިޔާގެ ފައީދާއެއް ރާއްޖޭގެ މަސްވެރިކަމުގެ ސިނާއަތަށް ކުރާނެކަމަށެވެ.

ވަޒީރު ވިދާޅުވީ، ލޭނު މަސްވެރިކަމުގެ ހުއްދަ ވަޒީރުންގެ މަޖިލީހުން ދީފައިވާއިރު އޭގެ ސަބަބުން އިގްތިސާދީ ގޮތުން ރާއްޖެއަށް މަންފާހުރި ބަދަލުތަކެއް އަންނާނެ ކަމަށާއި އަދި ކުރިއަށް އޮތް މުސްތަގްބަލުގައި މަސްވެރިކަމުގެ ސިނާއަތް އިތުރަށް ކުރިއަރުވާނެ ހަރުދަނާ ގޮތްތަކެއް ވެސް ހޯއްދަވާނެކަމަށެވެ. އަދި މަސްވެރިކަމަކީ ޒަމާޏުއްްސުރެ ރާއްޖޭގައި ތަފާތުު އެކި ގޮތްތަކަށް ކުރަމުން އައިސް ނަމަވެސް މިހާރު ވަކި މިންގަނޑެއް އަދި އުސޫލުތަކެއްގެ ތެރެއިން ކުރަމުން އަންނަ ކަމެއް ކަމުގައި ވެސް ވަޒީރު ވިދާޅުވިއެވެ.

ބަައެއް ފަރާތްތަކުން މިކަމާ މެދު ހިތްހަމަ ނުޖެހުން ފާޅު ކުރަމުން ދަނީ މީގެ ސަބަބުން ތިމާވެއްޓާއި އޭގައިވާ މިޔަރުފަދަ ދިރުންތަކަށް ކުރިމަތިވެދާނެ ދާއިިމީ ގެއްލުންތަކަށް ބަލާފައެވެ. ނަމަވެސް ވަޒީރު ވިދާޅުވީ ލޭނުގެ މަސްވެރިކަމަކީ އެއްވެސް ހާލެއްގައި މިޔަރުގެ ވަގު ވިޔަފާރިއަށް ހުޅުވައިދޭ ދޮރެއް ނޫންކަމަށާއި ލޭނުގެ މަސްވެރިކަން ކުރިއަށްގެންދާ ގޮތް ވަރަށް ގާތުން ބައްލަވައި އެކަމަށް އެކަށީގެންވާ ގަވާއިިދުތަކާއި ގާނޫނީ އޮނިގަނޑުތައް އެކުލަވާލާނެ ކަމަށެވެ. އަދި އެކަމާ ބެހޭ ޑްރާފްޓު އެކުލަވާލާފައިވަނީ ކަމާ ބެހޭ ފަރާތްތަކުގެ މަޝްވަރާގެ އިތުރުން، ރައްޔިތުންގެ ޙިޔާލުގެ އަލީގައިކަމަށް ވެސް ވަޒީރު ވިދާޅުވިއެވެ.

ލޭނު މަސްވެރިކަމާ ބެހޭ އިޖުރާއަތްތައް ފުރިހަމަކޮށް ވީހާވެސް އަވަހަށް އެކަން ފެށުމަކީ އޭގެ ސަބަބުން މަސްވެރިކަމުގެ ސިނާއަތަށް ބޮޑެތީ ކުރިއެރުންތަކެއް އައިސް މާލީ ނަފާ އިތުރުވެ ހޯދުންތަކާއި ދިރާސާތައް އިތުރުކުރުމަށް އެޅޭނެ ވަރަށް ވެސް ބޮޑު ހެޔޮ ފާލެއް ކަމަށް ސަރުކާރުން ވަނީ ހާމަކޮށްފައެވެ.