ކުދިފަންތިއާއި މެދުފަންތީގެ ވިޔަފާރިތަކަށް ޚާއްސަކޮށްގެން މަސް އެކްސްޕޯޓު ކުރުމަށްޓަކައި ކުޑަ ޕެކިން ފެސިލިޓީއެއް އެޅުމަށް ނިންމާފައިވާކަމަށް މަސްވެރިކަމާއި ކަނޑުގެ ވަޞީލަތްތަކާ ބެހޭ ވުޒާރާއިން ވިދާޅުވެއްޖެއެވެ.

އެވުޒާރާއިން ވިދާޅުވީ މިޕެކިން ފެސިލިޓީ އެޅުމަށް ނިންމާފައިވަނީ ހުޅުމާލޭގައި ކަމަށެވެ.

ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްވަމުން މަސްވެރިކަމާއި ކަނޑުގެ ވަޞީލަތްތަކާ ބެހޭ ވުޒާރާގެ ޑިރެކްޓަރ ޖެނެރަލް ޑރ.ހުސައިން ސިނާން ވިދާޅުވީ ޕެކިން ފެސިލިޓީއެއް އެޅުމަށްޓަކައި އިސްލާމިކް ޑިވެލޮޕްމަންޓް ބޭންކުން ފައިސާ ހަމަޖެހިފައިވާ ކަމަށެވެ. އަދި އެތަނުގެ އޮޕަރޭޝަން ކުރިއަށްގެންދާނެ ގޮތަކާ ގުޅޭގޮތުން މިފްކޯއާއެކު މަޝްވަރާކުރައްވަމުން ގެންދަވާކަމަށް ސިނާން ވިދާޅުވިއެވެ.

ރާއްޖޭގައި މަދުން މަސް އެކްސްޕޯޓު ކުރާ ފަރާތްތަކުގެ ތެރޭގައި ކުދިފަންތިއާއި މެދު ފަންތީގެ ވިޔަފާރިތައް ހިމެނޭކަން ފާހަގަކުރައްވާ ސިނާން ވިދާޅުވީ އެފަދަ ވިޔަފާރިތަކުން މިހާރު އެކަން ކުރަން ޖެހެނީ މަސް އެކްސްޕޯޓުކުރާ އަމިއްލަ ކުންފުނިތަކުގެ އެހީތެރިކަން ހޯދަން ކަމަށެވެ. ސިނާން ވިދާޅުވީ ވިސްނުން ހުރީ ހުޅުމާލޭގައި މިފްކޯން އެފެސިލިޓީ ތަރައްޤީކުރި ނަމަވެސް އެތަނުގެ އޮޕަރޭޝަންތައް ކުރިއަށް ގެންދަން މަދުން މަސް އެކްސްޕޯޓުކުރާ ފަރާތްތަކުގެ ހިއްސާ އޮންނަ ފަރާތަކަށް ނުވަތަ ޔޫނިއަންއަކަށް ދިނުމަށްކަމަށެވެ.

"ގާތްގަޑަކަށް 100 ނުވަތަ 200 ކިލޯ އެކްސްޕޯޓުކުރަން ބޭނުންވާ ބޭފުޅުންނަށް އެފުރުޞަތެއް ނެތް. އެކަހަލަ ކުޑަ ޕެކިން ފެސިލިޓީއެއް ޤާއިމްކުރުމުގެ މަސައްކަތްވެސް މިފްކޯއާ ގުޅިގެން އަޅުގަނޑުމެން މިދަނީ މިކަން ކުރެވޭތޯ ބަލަމުން. ހުރިހާ މަސްވެރިކަމަށްވެސް ސޮލިއުޝަނެއް ގެނައުމަށް މަސައްކަތްކުރަމުން މިދަނީ." މަސްވެރިކަމާއި ކަނޑުގެ ވަޞީލަތްތަކާ ބެހޭ ވުޒާރާގެ ޑިރެކްޓަރ ޖެނެރަލް ޑރ.ހުސައިން ސިނާން ވިދާޅުވިއެވެ.

މިކަމާ ގުޅޭގޮތުން މަސްވެރިކަމާއި ކަނޑުގެ ވަޞީލަތްތަކާ ބެހޭ ވުޒާރާގެ ސްޓޭޓް މިނިސްޓަރ މުޙައްމަދު މުއްޠަލިބް ވިދާޅުވީ ރާއްޖެއިން މަސް އެކްސްޕޯޓުކުރާ ފަރާތްތަކުގެ ތެރެއިން ކުދިފަންތިއާއި މެދުފަންތީގެ ވިޔަފާރިތަކަށް އޮތް ފުރުޞަތު ވަރަށް ހަނިކަމަށެވެ. މުއްތަލިބް ވިދާޅުވީ އެފަރާތްތަކަށް ޚާއްސަކޮށްގެން އެފަދަ ފެސިލިޓީއެއް އެޅުމުގެ ބޭނުމަކީ މަސް އެކްސްޕޯޓުކުރުމަށް ފުރުޞަތުތައް ހޯދައިދީ މަސްވެރިކަމުގެ ސިނާއަތުން ވީހާވެސް ގިނަބަޔަކަށް އެކަމުގެ ނަފާ ހޯދައިދިނުން ކަމަށެވެ.

"އަމިއްލަ ކުންފުނިތަކުން އެފަދަ ފަރާތްތަކަށް އެކްސްޕޯޓު ކޮށްދޭނަމަ ވަރަށް ބޮޑު ޑިޕޮސިޓެއް ބަހައްޓަން އެބަޖެހޭ. ނަމަވެސް މަސް ލިބުމުގައިވެސް ދަތިތަކެއް ހުރޭ." މަސްވެރިކަމާއި ކަނޑުގެ ވަޞީލަތްތަކާ ބެހޭ ވުޒާރާގެ ސްޓޭޓް މިނިސްޓަރ މުޙައްމަދު މުއްޠަލިބް ވިދާޅުވިއެވެ.

މަސްވެރިކަމުގެ ސިނާއަތް ކުރިއެރުވުމަށްޓަކައި ސަރުކާރުން ކުރައްވަމުން ގެންދަވާ މަސައްކަތްތަކުގެ ތެރެއިން ރާއްޖޭގެ 3 ސަރަހައްދެއްގައި މަސް ބަންދުކޮށް ޕްރޮސެސްކުރެވޭ ފެކްޓްރީއެއް ތަރައްޤީކުރުމުގެ މަސައްކަތްތައްވެސް އަންނަނީ ކުރަމުންނެވެ. އެގޮތުން ގދ. ފިޔޯރީއާއި ފ.ނިލަންދޫ އަދި ފެލިވަރު ތަރައްޤީކުރުން ހިމެނެއެވެ. މި މަސައްކަތް ކުރިއަށް ގެންދަނީ ޗައިނާގެ ޑޮންފޮން އިލެކްޓްރޯނިކް ކުންފުންޏާ ގުޅިގެންނެވެ. ސަރުކާރުގެ އަމާޒަކީ މިގޮތަށް ތަރައްޤީ ކުރާ ފެސިލިޓީތަކަކީ ފުލީ އޮޓޮމޭޓިވް ތަންތަނަށް ހެދުމެވެ.