މިއީ މަސްވެރިން މަސް ކިރުމަށް ކިޔުގައި ޖެހޭނެ ފަހު އަހަރު ކަމަށާއި, ސަރުކާރުން މަސްވެރިކަމުގެ ސިނާއަތު ކުރިއެރުވުމަށް ކުރަމުންދާ މަސައްކަތްތަކާއެކު އެއްވެސް އުނދަގުލަކާއި ނުލައި މަސްވެރިންނަށް މަސް ކިރުމުގެ އިންތިޒާމް ފަހިވެގެންދާނެ ކަމުގައި މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދު ޖަލްސާއަށް ހާޒިރުވެވަޑައިގެން ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ކުރެއްވި ސުވާލަކަށް ޖަވާބު ދެއްވަމުން ވަޒީރު ވިދާޅުވީ، ދޮށީގެ މަސްވެރިކަމުގައި މިވަގުތު ކިޔުއެއް އެބަ އޮތް ކަމަށާއި, އެއްވެސް ސަރުކާރަކުން މި ކިޔު ނައްތައިލުމަށް އެއްވެސް މަސައްކަތެއް ކޮށްފައި ނުވާ ކަމަށެވެ.

"ކިޔު ނަމްބަރު މިދެވެނީ ދޯންޏަކުން ގުޅާފަ ތިމަންނަ މެން މި އަންނަނީ އޭ ކޫއްޑޫ ބަނދަރަށް މަސްކިރަން ތިމަންނަ މެންގެ އެބަ ހުއްޓޭ 40 ޓަނު ނޫނީ 50 ޓަނު. ދެން ކޫއްޑޫއިން މި ރިޒާވް ކުރަނީ 50 ޓަނު. އެކަމަކު ބަނދަރާ ހިސާބަށް އާދެވޭއިރު ގިނަ ފަހަރު މި ހުންނަނީ 20 ޓަނު. ހުރީމަ ދެ ވަނަ ދޯންޏަށް ތަންކޮޅެއް އަވަހަށް ކިޔު ނަމްބަރު އެބަ ދެވޭ"

ވަޒީރު ވިދާޅުވީ، މި މަހުގެ 30 އާ ހަަމައަށް ބައެއް ދޯނިތަކަށް ކިޔު ނަމްބަރު ދީފައި އެބަހުރި ކަމަށާއި ނަމަވެސް މި ދުވަސްވަރު ފުލް ކެޕޭސިޓީއަށް މިފްކޯއިން މަސް ގަންނަމުންދާތީ މިއަދު ނޫނީ މާދަމާ އެ ދޯނިތަކަށް މަސް ކިރޭނެ ކަމަށެވެ.

ވަޒީރު ވިދާޅުވީ، ސަރުކާރުން މަސްވެރިކަމުގެ ސިނާއަތުގެ ތަރައްގީއަށް ގެންގުޅޭ ޕްލޭނާއެކު މަސްވެރިން މަސް ކިއުގައި ތިބޭ ތިބުން ނިމުމަކަށް ގެނެވޭނެ ކަމަށެވެ.

"އިރާދަ ކުރެއްވިއްޔާ މިއީ ކިއުގައި ޖެހޭނެ ފަހު އަހަރު. އަޅުގަނޑުމެން ސަރުކާރުގެ ޑިވެލޮޕްމަންޓް ޕްލޭންގައި ނޫނީ މިހާރު މަސްވެރިކަމުގެ ސިނާއަތުން ކުރެވޭ މަސައްކަތްތަކުން އިރާދަކުރެއްވިއްޔާ މި ކިޔު އަޅުގަނޑުމެން ނައްތާލާނަން. "

ވަޒީރު ވިދާޅުވީ، މަސް ގަތުމުގެ ކެޕޭސިޓީ އިތުރުކުރުމަށް މިފްކޯގެ ޖަޒީރާ 1 އަދި ޖަޒީރާ 2 ބޯޓު މި ހަފްތާގައި އޮޕަރޭޝަނަށް ގެނެވޭމެ ކަމަށެވެ.