ރާއްޖޭގައި ބޭސް ލިބެން ހުރީ އެންމެ ރަނގަޅު އަގުތަކުގައެއް ނޫންކަމަށާއި މިކަން ހައްލު ކުރުމަށް މިހާރުވެސް މަސައްކަތް ކުރަމުންދާކަން ފާހަގަކުރައްވައި މައްސަލައަށް ދާއިމީ ހައްލު ހޯއްދަވާނެކަމަށް ސިއްހަތާ ބެހޭ ވަޒީރު އަބްދުﷲ ނާޒިމް އިބްރާޙީމް ވިދާޅުވެއްޖެ އެވެ.

ވަޒީރު ވަނީ ބޭހުގެ މައްސަލައަށް ވަރަށް އަވަހަށް އެދެވޭ ހައްލެއް ލިބިގެންދާނެ ކަމަށް ވިދާޅުވެފައެވެ.

ވަޒީރު ވިދާޅުވީ ބޭސް ލިބޭ ނިޒާމު ހުރީ އެންމެ ރަނގަޅަށް ނޫން ކަމަށާއި ބޭސް ލިބެން ހުރީވެސް އެންމެ ރަނގަޅު އަގުތަކުގައި ނޫންކަމަށެވެ. މި މައްސަލަ ހައްލުކުރަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ފިޔަވަޅުތަކެއް އަޅުއްވަމުން ގެންދަވާ ކަން ވަޒީރު ފާހަގަކުރެއްވިއެވެ.

" އަޅުގަނޑުމެން އެންމެން ޤަބޫލުކުރާ ޙަޤީގަތަކީ ބޭސް އަޅުގަނޑުމެންގެ މުޖުތަމަޢުގައި ދޫކުރެވެނީވެސް ލިބޭނެ ނިޒާމް ހުރީކީވެސް އެންމެ ރަނގަޅަށް ނޫންކަން ރަނގަޅުއަގުތަކުގަ ނޫންކަން"

އެސްޓީއޯ މެދުވެރިކޮށް ބޭހުގެ އަގު ކޮންޓްރޯލް ކުރުމުގެ ނަތީޖާއަކަށްވީ ނާޖާއިޒު ގޮތުގައި ބިލްޑްވަމުން އައި ސިސްޓަމެއްގެ ތެރެއިން އުނދަގޫތަކަކާއި ކުރިމަތިލާންޖެހުން ކަމަށާއި، ކަމާއި ގުޅޭ ހުރިހާ ފަރާތްތަކާއި އެކު ކުރެވޭ މަޝްވަރާގެ ތެރެއިން އަޅަމުންދާ ފިޔަވަޅުތަކުގެ ނަތީޖާ ލަހެއް ނުވެ ފެންނާނެ ކަމަށް ވަޒީރު ވިދާޅުވިއެވެ.

"ބޭހުގެ މައްސަލައަށް ރަނގަޅު އެދެވޭ ހައްލެއް ލިބިގެންދާނެކަން ޔަގީން."

ވަޒީރު ވިދާޅުވީ ޞިއްހީ ދާއިރާގައި އަބަދުވެސް ހޯދޭ ކާމިޔާބީ އަށް ވުރެ ބޮޑަށް ކަންކަން ހާސިލްކުރަން ކުރަންޖެހޭ ކަންކަމުގެ ގޮންޖެހުން މާ ބޮޑުކަމަށެވެ. އެގޮތުން ކުރިން ކަންކަން ބައްޓަންވެފައި ހުންނަ ގޮތުގެ ނިޒާމުގައި ހުރި ލޫޕް ހޯލްތައް ނުވަތަ ނެގޭ ނާޖާއިޒު ފައިދާ ނެގުން ހުއްޓުވުމަށް ރައީސް އެޅުއްވި ފިޔަވަޅު ތަކުގެ ތެރެއިން އެއް ފިޔަވަޅަކީ ބޭހުގެ އަގު ކޮންޓްރޯލް ކުރުން ކަން ވަޒީރު ފާހަގަކުރެއްވިއެވެ.