މެލޭޝިއާގައި ރާއްޖޭގެ 561 ދަރިވަރުންނަށް ތައުލީމު ހާސިލް ކުރުމުގެ އެއްބަސްވުމެއްގައި ރާއްޖެއާއި މެލޭޝިއާ ދެމެދު ސޮއިކޮށްފިއެވެ.

މި އެއްބަސްވުމަކީ މަތީ ތަޢުލީމާ ބެހޭ ވުޒާރާ އާއި މެލޭޝިޔާގެ ތަޢުލީމީ ވުޒާރާގެ ދަށުން ހިންގާ އެޑިޔުކޭޝަން މެލޭޝިޔާ ގްލޯބަލް ސަރވިސެސް (އީއެމްޖީއެސް) އިން، ރާއްޖެ އާއި މެލޭޝިޔާގެ މަތީ ތަޢުލީމު ކުރިއެރުވުމުގެ ބޭނުމުގައި ހެދި އެއްބަސްވުމެކެވެ.

މި އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ، ވަޒީރު ޑރ. މަރްޔަމް މާރިޔާއެވެ. އަދި މެލޭޝިޔާގެ އީއެމްޖީއެސްގެ ފަރާތުން މި އެއްބަސްވުމުގައި ސޮއިކުރެއްވީ އެ އިދާރާގެ ސީއީއޯ، މރ. ނޯވީ ތާޖުއްދީން އެވެ.

މި އެއްބަސްވުމުގެ ދަށުން ވަނީ ރާއްޖޭގެ 561 ދަރިވަރުންނަށް މެލޭޝިއާއިން ތައުލީމު ހާސިލް ކުރުމުގެ ފުރުސަތު ވަނީ ހުޅުވާލާފައެވެ. އެގޮތުން މެލޭޝިޔާގެ ޔުނިވާސިޓީތަކުގައި، އާޓްސް އެންޑް ހިއުމަނިޓީސް، އިންޖީނިއަރިން އެންޑް ޓެކްނޮލޮޖީ، ލައިފް ސައިންސެސް އެންޑް މެޑިސިން، ނެޗުރަލް ސައިންސެސް، ސޯޝަލް ސައިންސެސް، މެނޭޖްމަންޓް ފަދަ އެތައް ދާއިރާއަކުން ތަޢުލީމު ހާޞިލުކުރުމުގެ ފުރުސަތު އެ އެއްބަސްވުމުގެ ދަށުން ދަރިވަރުންނަށް ލިބޭނެއެވެ.

މީގެ އިތުރުން އެކަޑަމިކް ސްޓާފުން ބަދަލުކުރުމާއި، ޖޮއިންޓް ރިސާޗް އާއި ޕަބްލިކޭޝަންތަކާއި، ކުރުމުއްދަތުގެ ޓްރެއިނިންތަކާއި، އިދާރީ އަދި މެނޭޖްމެންޓް ޕްރޮގްރާމްތަކުގެ އިތުރުން މާސްޓާސް އަދި ޕީއެޗްޑީ ހަދާފައިވާ ނުވަތަ ހަދަމުންދާ ފަރާތްތަކަށް ފެލޯޝިޕްގެ ފުރުޞަތު ހޯދުމުގެ މަގު އެ އެއްބަސްވުމުގެ ދަށުން ފަހިވާނެއެވެ.

އަދި މެލޭޝިއާގެ 14 ކޮލެޖް ނުވަތަ ޔުނިވާސިޓީއެއްގައި މަތީ ތަޢުލީމް ހާސިލް ކުރުމަށް ތަފާތު ދާއިރާތަކުން 561 އަށްވުރެ ގިނަ ޕްރޮގްރާމުތަކުން ދެ އިންސައްތަ އާއި 100 އިންސައްތައާ ދެމެދުގެ ޓިއުޝަންފީ އަށް ޑިސްކައުންޓް ހަމަޖެހޭނެ ކަމުގައި މަތީ ތަޢުލީމާ ބެހޭ ވުޒާރާއިން ބުންޏެވެ.