އިސްރަށްވެހިންގެ ފަރާތުން ޢިލްމީ، ފިކުރީ އަދި ހުނަރުގެ މަންފާ ޒުވާނުންނާއި ކިޔަވާ ކުދިން ލިބިގަންނަންޖެހޭ ކަމަށް ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު ވިދާޅުވެއްޖެއެވެ.

ރައީސުލްޖުމްހޫރިއްޔާގެ އަނބިކަނބަލުން މިހެން ވިދާޅުވީ މިދިޔަ އަހަރުގެ ފެބްރުއަރީ މަހުގެ 17ވަނަ ދުވަހު މާލޭގައި ހުޅުވި އިސްރަށްވެހިންގެ ނާދީއަށް 1 އަހަރު ފުރުމާ ގުޅިގެން "އިސްވާރުންގެ އަހަރީ އުފާ - 2025"ގެ ނަމުގައި ބޭއްވި ޖަލްސާ ޝަރަފުވެރިކޮށްދެއްވައި ވާހަކަފުޅުދައްކަވަމުންނެވެ.

ރައީސްގެ އަނބިކަނބަލުން ވިދާޅުވީ ރާއްޖޭގެ އެކިކަންކޮޅުތަކުގައި އިސްރަށްވެހިންގެ ނާދީތައް ތަރައްޤީކުރުމަށް ސަރުކާރުން ދެއްވާ އިސްކަމުން ހާމަވެގެންދަނީ އިޖުތިމާޢީ ގުޅުންތައް ބަދަހިކުރުމަށާއި ދުވަސްވީ މީހުންގެ އަގުވަޒަންކުރުމަށް ސަރުކާރުން ދޭ ސަމާލުކަން ކަމަށެވެ. އަދި ދިވެހި ޤައުމު މި ދެކޭ ކުރިއެރުމުގެ މޭސްތިރިންނަކީ އިސްރަށްވެހިންކަން މެޑަމް ސާޖިދާ ފާހަގަކުރެއްވިއެވެ.

އިސްރަށްވެހިންގެ ނާދީއަށް 1 އަހަރު ފުރުން ފާހަގަކުރުމަށް ބޭއްވި ޖަލްސާގައި ނާދީގެ ލޯގޯ ވަނީ ތަޢާރަފްކޮށްފައެވެ. އަދި އިސްރަށްވެހިންގެ ނާދީން ޚިދުމަތް ހޯދައި ފަރާތްތަކަށާއި އެ ތަނުގައި ހިންގާ ޕްރޮގުރާމްތަކުގައި ބައިވެރިވުމަށް ބޭނުންކުރެވޭނެ މެންބަރޝިޕް ކާޑެއްވެސް ވަނީ ތަޢާރަފްކޮށްފައެވެ. މެންބަރޝިޕް ކާޑު ތަޢާރަފްކޮށްދެއްވީ ޕެންޝަން އޮފީހުގެ ސީއީއޯ ޝުޖާތާ ހަލީމެވެ.

Ad by Hajj Corporation

މީގެ އިތުރުން ޢުމުރުން ދުވަސްވީ މީހުންގެ ކިބައިން އެ މަޢުލޫމާތާއި ތަޖުރިބާ ލިބިގަނެ ދަސްކުރުމަށް، ކިޔަވާ ކުދިންނަށާއި ޒުވާނުންނަށް މެޑަމް ގޮވާލެއްވިއެވެ.