ރާއްޖޭގައި ފުޅާ ދާއިރާއެއްގައި ހަށި ވިއްކުމުގެ ވިޔަފާރިކުރަމުންދިޔަ ތިން ބިދޭސީ އަންހެނުންގެ ތެރެއިން ދެ މީހަކު ޑީޕޯޓުކޮށްލައިފިއެވެ.

އިމިގްރޭޝަނުން ބުނި ގޮތުގައި މި ތިން އަންހެނުންނަކީ ވޯކް ވިސާގައި ރާއްޖޭގައި ތިބެ، ހަށި ވިއްކުމުގެ ވިޔަފާރި ފުޅާ ދާއިރާއެއްގައި ކުރަމުންދިޔަ ބައެކެވެ.

މި ތިން މީހުން އިމިގްރޭޝަންގެ ބެލުމުގެ ދަށަށް ގެންދިޔައީ މޯލްޑިވްސް ޕޮލިސް ސަރވިސްއާ ގުޅިގެން ހިންގި ޚާއްޞަ އޮޕަރޭޝަނެއްގައެވެ.

"މި ތިން މީހުންގެ ތެރެއިން ދެ މީހަކު މިހާރު ވަނީ އެމީހުންގެ އަމިއްލަ ޤައުމަށް ފޮނުވާލެވިފައި. އަނެއް މީހާ ޑީޕޯޓުކުރުމުގެ މަސައްކަތް މިހާރު ދަނީ ކުރެވެމުން،" އިމިގްރޭޝަނުން ބުނެފަވެއެވެ.

މިފަދަ ފަރާތްތައް ހޯދައި، ޤާނޫނީ އިމުގެ ތެރެއަށް ގެނައުމަށް ނުވަތަ ޑީޕޯޓުކުރުމަށް އިމިގްރޭޝަނުން ދަނީ ގިނަގުނަ މަސައްކަތްތަކެއް ކުރަމުންނެވެ.