މޯލްޑިވްސް އިމިގްރޭޝަންގެ އޮފިސަރުންތަކެއް ކަމަށް ހެދިގެން ގޮސް ބިދޭސީންތަކެއްގެ އަތުން ފޭރުނު ދެ މީހެއްގެ މައްސަލަ ފެންމަތިވެއްޖެއެވެ.

އިމިގްރޭޝަންގެ އޮފިސަރުންތަކެއް ކަމަށް ހެދިގެން ގެއަކަށް ވަތް ދެ މީހެއްގެ ފޮޓޯ އެކްސްގައި ހިއްސާކޮށް، އިމިގްރޭޝަން ޓެގްކޮށް މީހަކު ވަނީ އެއީ އިމިގްރޭޝަން އޮފިސަރުންތޯ ސުވާލުކޮށްފައެވެ.

މި ޕޯސްޓަކާއި ގުޅިގެން އިމިގްރޭޝަން ކޮންޓްރޯލާ މުހައްމަދު ޝަމްއާން ވަހީދު ވިދާޅުވީ ފޮޓޯގައިވާ ދެ މީހުންނަކީ އިމިގްރޭޝަންއާ ގުޅުން އޮތް ބައެއް ނޫން ކަމަށެވެ. ފުލުހުން މި ދެ މީހުންގެ މައްސަލަ މިހާރު ބަލަމުންދާ ކަމަށް ވަނީ މައުލޫމާތު ލިބިފައި ކަމަށް ވެސް ކޮންޓްރޯލާ ވަނީ ވިދާޅުވެފައެވެ.

މީގެ އިތުރުން ޝަމްޢާން ވަނީ އިމިގްރޭޝަންގެ ރެއިޑްތަކުގައި އޮފިސަރުންގެ އައިޑީ ފެންނަ ގޮތަށް ހުންނާނެ ކަމަށާއި މިހާރުގެ އޮޕަރޭޝަންތަކަކީ ޔުނިފޯމް ލައިގެން ކުރިއަށް ގެންދާ އޮޕަރޭޝަންތަކެއް ކަމަށް ވިދާޅުވެފައެވެ.

އިމިގްރޭޝަންގެ އޮފިސަރުންތަކެއް ކަމަށް ހެދިގެން ގޮސް ބިދޭސީންތަކެއްގެ އަތުން ފޭރުނުކަން އިމިގްރޭޝަނުން ވަނީ ކަށަވަރުކޮށްދީފަ އެވެ.

ފުލުހުން ވެސް ވަނީ މިފަދަ މައްސަލައެއް ރިޕޯޓްކޮށްގެން މީހަކު ހައްޔަރުކޮށްފައިވާ ކަމަށް ބުނެފައެވެ. އެ މައްސަލާގައި ބިދޭސީން ދިރިއުޅޭތަނަކަށް ތިން މީހަކުވަދެ ފޯނަކާއި، 9000 ރުފިޔާ ވަނީ ބަންގްލަދޭޝް މީހަކު އަތުން ފޭރިގެންފައެވެ.