ކުޅުދުއްފުށީގެ އައު ބޮޑުމަގުގައި ސިޓީތަކާއި އިދާރީ ދާއިރާތަކާއިބެހޭ ވުޒާރާއިން ގަސް އިންދައިފި
މުހައްމަދު މޫސާ15 ސެޕްޓެމްބަރު 2024 - 19:36
ކުޅުދުއްފުށީ ސިޓީގެ އަލަށް ހެދި ބޮޑުމަގުގައި، މިނިސްޓްރީ އޮފް ސިޓީސް، ލޯކަލް ގަވަމަންޓް އެންޑް ޕަބްލިކް ވޯކްސް (ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވުޒާރާ) އިން ގަސް އިންދައިފި އެވެ.
އެ މިނިސްޓްރީން އެކްސްގައި ކުރި ޕޯސްޓެއްގައި ބުނީ، ކުޅުދުއްފުށީ ސިޓީގެ އިރުމަތީ ފަރާތުގައި އަލަށް ހެދި ބޮޑުމަގުގައި އެ މިނިސްޓްރީން އިސްނަގައިގެން ގަސް އިންދާފައިވާ ކަމަށެވެ.
މިގޮތުން އެ މިނިސްޓްރީގެ ކުޅުދުއްފުށީ ޕަބްލިކް ވާރކްސް ޔުނިޓުގެ މުވައްޒަފުން ގަސްއިންދުމުގެ ހަރަކާތެއް ކުރިއަށް ގެންގޮސްފައިވާކަމަށް އެ މިނިސްޓްރީން ވަނީ ބުނެފައެވެ.
މި ހަރަކާތުގައި އެ މުވައްޒަފުން ވަނީ ޖުމްލަ 125 ގަސް އިންދާފައެވެ. މީގެ ތެރޭގައި ކިނބި، ފިތުރޯނު އަދި ރަނިކަ ގަސް ހިމެނެއެވެ.
އަލަށް ހެދި ބޮޑުމަގުގައި އިންދި މި ގަސްތައް ރޯވަންދެން ގަސްތަކަށް ފެންދިނުމުގެ މަސައްކަތް ކުޅުދުއްފުށީ ޕަބްލިކް ވާރކްސް ޔުނިޓުން ކުރާނެކަމަށް ސިޓީސް، ލޯކަލް ގަވަމަންޓް އެންޑް ޕަބްލިކް ވޯކްސް މިނިސްޓްރީން ވަނީ ބުނެފައެވެ.
''މިއީ ރައީސް ޑޮކްޓަރ މުޙައްމަދު މުޢިއްޒު ފެއްޓެވި 5 މިލިއަން ގަސް އިންދުމުގެ މަޝްރޫޢުގެ ދަށުން ކުޅުދުއްފުށީ ޕަބްލިކް ވާރކްސް ޔުނިޓުން ކުރިޔަށް ގެންދިޔަ ޙަރަކާތެއް'' އެ މިނިސްޓްރީން ބުނެފަވެއެވެ.
