ދިވެހިރާއްޖޭގެ އިޤްތިޞާދީ ދުވެލި ހަލުވިވެ، ބައިނަލްއަޤްވާމީ އިންވެސްޓަރުންގެ އިތުބާރު ދިވެހިރާއްޖެއަށް ވަރަށް ބޮޑުތަން އިތުރުވެފައިވާކަން ފާހަގަކުރެވެއެވެ. މިކަން އެންމެ ބޮޑަށް ހާމަވަނީ ފާއިތުވި މަސްތަކުގައި ދިވެހިރާއްޖޭގެ ސުކޫކްގެ އަގު ވަރަށް ބޮޑުތަން މައްޗަށް ގޮސްފައިވާތީއެވެ.

ލިބިފައިވާ މައުލޫމާތުތަކަށް ބަލާއިރު، 2025 ވަނަ އަހަރުގެ ޖުލައި 7 ގައި ސުކޫކްގެ އަގު 87.44 އެމެރިކާ ޑޮލަރަށް އަރާފައިވާއިރު، މިއީ އޭޕްރީލް މަހުގެ ކުރީކޮޅު ހުރި 64.72 އެމެރިކާ ޑޮލަރާ އަޅާބަލާއިރު ވަރަށް ބޮޑު ކުރިއެރުމެކެވެ. މި ކުރިއެރުމަކީ ރާއްޖޭގެ މާލީ ސުލްހަޔާ ދެމެހެއްޓެނިވި ތަރައްޤީއަށް ހެޔޮ ބަދަލުތަކެއް އަންނަކަމުގެ ހެއްކެކެވެ.

Ad by Hajj Corporation

މި ކުރިއެރުމުގެ މައިގަނޑު ސަބަބުތަކުގެ ތެރޭގައި ސަރުކާރުގެ ހަރުދަނާ މާލީ ސިޔާސަތުތަކާއި، އިޤްތިޞާދީ އަސާސްތައް ވަރުގަދަކުރުމަށް އަޅާފައިވާ ފިޔަވަޅުތައް ހިމެނެއެވެ. މިގޮތުން، 2025 ވަނަ އަހަރުގެ މާރިޗް މަހު ކްރެޑިޓަރަކަށް ބޮޑު ރިޕޭމަންޓެއް ދައްކާފައިވާއިރު، އޭޕްރީލް މަހުގައި ސުކޫކް ކޫޕަން ޕޭމަންޓްވެސް ވަގުތަށް ދައްކާފައިވެއެވެ. މިކަމުން ރާއްޖޭގެ މާލީ އަހުލާޤު ރަނގަޅުކަމާއި، ދަރަނި އަދާކުރުމުގެ ޤާބިލުކަން އިތުރުވެފައިވާކަން ދައްކުވައިދެއެވެ.

އަދި ބައިނަލްއަޤްވާމީ ގުޅުންތައް ހަރުދަނާކުރުމަށް ސަރުކާރުން ކުރި މަސައްކަތްތަކުގެ ނަތީޖާވެސް މިކަމުން ފެނިގެންދެއެވެ. ޚާއްޞަކޮށް، ރީފައިނޭންސިންގ ޕެކޭޖެއް ހަމަޖެއްސުމުގައި މުހިންމު ބައިލެޓަރަލް ޕާޓްނަރުންނާއެކު ކާމިޔާބު މަޝްވަރާތަކެއް ވަނީ ކުރެވިފައެވެ. މި މަޝްވަރާތަކުގެ ސަބަބުން ރާއްޖޭގެ މާލީ ހާލަތު އިތުރަށް ރަނގަޅުވެ، ބޭރުގެ އިންވެސްޓަރުންގެ އިތުބާރު ހޯދުމަށް މަގުފަހިވެފައިވެއެވެ.

ސުކޫކްގެ އަގު މަތިވުމަކީ ރާއްޖޭގެ އިޤްތިޞާދީ ކުރިމަގަށް ވަރަށް ހެޔޮ އަސަރެއް ކުރާނެ ކަމެކެވެ. މީގެ ސަބަބުން ބޭރުގެ އިންވެސްޓަރުންގެ އިތުބާރު އިތުރުވެ، އިތުރު އިންވެސްޓްމަންޓްތައް ރާއްޖެއަށް އައުމުގެ ފުރުޞަތު ފަހިވެގެންދާނެއެވެ. ރައީސުލްޖުމްހޫރިއްޔާ އާއި މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވުޒާރާއިން ގެންގުޅޭ ސިޔާސަތުތަކުގެ ސަބަބުން ރާއްޖޭގެ އިޤްތިޞާދީ ކުރިމަގު އިތުރަށް ފަހިވާނެކަން ކަށަވަރެވެ.