އދ. އަތޮޅުގައި އިމިގްރޭޝަންގެ އޮފީހެއް ޤާއިމްކުރުމަށް ކުންފުންޏަކާ ހަވާލުކޮށްފިއެވެ. މި މަސައްކަތް ކުރުމަށް ހަވާލުކޮށްފައިވަނީ މަހިބަދޫގެ ކުންފުންޏެއްކަމަށްވާ މެޓްސްއާއެވެ.

އދ. އަތޮޅުގައި އިމިގްރޭޝަންގެ ޚިދުމަތްތައް ފެށުމަށްޓަކައި އިމިގްރޭޝަންގެ އޮފީހެއް ޤާއިމްކުރުމަށް މެޓްސް ކުންފުންޏާ ހަވާލުކުރުމަށް އަތޮޅު ކައުންސިލްގައި މިއަދު ބޭއްވި ރަސްމިއްޔާތެއްގައި އަތޮޅު ކައުންސިލްގެ ފަރާތުން އެއްބަސްވުމުގައި ސޮއިކުރެއްވީ، ކައުންސިލްގެ ރައީސް ޢަލީ ނަސީރެވެ. މެޓްސްގެ ފަރާތުން ސޮއިކުރެއްވީ އެ ކުންފުނީގެ ވެރި ފަރާތް، ޢަލީ ރިޒާއެވެ. 

މި މަސައްކަތް މެޓްސްއާ ހަވާލުކޮށްފައިވަނީ 1މަސް ދުވަހުގެތެރޭގައި މަސައްކަތް އެއްކޮށް ނިންމާ ހަވާލުކުރާގޮތަށެވެ.

Ad by Hajj Corporation

އދ. އަތޮޅުގައި އިމިގްރޭޝަންގެ އޮފީހެއް ޤާއިމްކުރުމުގެ މަސައްކަތަކީ އެ ކައުންސިލްގެ މިއަހަރުގެ މަސައްކަތު ތާވަލްގައި ހިމަނައި ބަޖެޓް ކޮށްފައިވާ މަސައްކަތެކެވެ. 

ދިވެހި ރައްޔިތެއްކަން އަންގައިދޭ ކާޑާއި ޕާސްޕޯޓު، ރައްޔިތުންނާ ގާތުން، އަވަހަށް ފޯރުކޮށްދިނުމުގެ ޚިދުމަތް މުޅި ރާއްޖެއަށް ފުޅާކުރެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މުހިންމު ސިޔާސަތަކެވެ.