ލ. މާވަށުގައި ވަޅިން ހަމަލާދީ މީހަކު މަރާލައިފިއެވެ.

އެރަށުގައި ވަޅިން ހަމަލާދީ މީހަކު މަރާލާފައިވާކަން އެރަށު ކައުންސިލްގެ ރައީސްއާ ހަވާލާދީ ރިޕޯޓްކޮށްފައިވާއިރު، ވަޅިން ހަމަލާދިނުމުގެ ސަބަބުން އަނިޔާލިބުނު މީހާ ނިޔާވެފައިވާކަން އެ ރަށު ޞިއްހީ މަރުކަޒުންވެސް ވަނީ ކަށަވަރުކޮށްދީފައެވެ.

މައުލޫމާތު ލިބިފައިވާ ގޮތުގައި ވަޅިން ޙަމަލާދީފައިވަނީ އެމީހާގެ ކަރަށެވެ.

ފުލުހުން ވިދާޅުވީ، މާވަށުގައި މީހަކަށް ތޫނު އެއްޗަކުން ހަމަލާދީ ޒަހަމްކޮށްލާފައިވާ ކަމުގެ މައުލޫމާތު މިއަދު ހެނދުނު 10:12 އެހާކަންހާއިރު، ފުލުހުންނަށް ރިޕޯޓް ކޮށްފައިވާ ކަމަށެވެ.

މިހަމަލާގައި އަނިޔާވި މީހާ ހޮސްޕިޓަލަށް ގެންދިޔައިރު ވެސް ނިޔާވެފައިވާ ކަމަށް ހޮސްޕިޓަލުން މައުލޫމާތު ދީފައިވާ ކަމަށާއި ހާދިސާގައި ނިޔާވެފައިވަނީ ލ. މާވަށް/ނަލަހިޔާ، މޫސާ އިބްރާހިމް (29އ) ކަމަށް ފުލުހުން ވިދާޅުވިއެވެ.