ކ.ގުރައިދޫގައި ހުންނަ ޚާއްސަ އެހީއަށް ބޭނުންވާ މަރުކަޒުގައި ތިއްބެވި ފަރާތްތައް މުޖުތަމައުއަށް އަނބުރާ ގެނައުމަށް ޚާއްސަ ޕްރޮގްރާމެއް ފަށައިފިއެވެ.

ސިއްހަތާ ބެހޭ ވުޒާރާއިން ބުނީ މިގޮތުން ޚާއްސަ އެހީއަށް ބޭނުންވާ މީހުންގެ މަރުކަޒުގައި ތިއްބެވި ފަރާތްތަކުގެ ތެރެއިން މުޖުތަމައުއަށް މިހާރު ގެނެވޭ ހާލަތްތަކުގައި ތިއްބެވި ފަރާތްތައް މުޖުތަމައަށް އަހުލުވެރިކުރުމުގެ މަޤްސަދުގައި މިނިވަން 60 އާއި ގުޅިގެން ކުރިއަށްގެންދާ ހަރަކާތްތައް ދައްކާލުމާއި އާއިލާގެ ފަރާތްތަކާއިއެކު ވަގުތު ހޭދަކޮށްދިނުމަށް މި ޕްރޮގްރާމުގެ ތެރެއިން ވަނީ ފުރުސަތު ފަހިކޮށްދީފައެވެ.

މިނިސްޓްރީ އޮފް ހެލްތު، އެޗްޑީސީ އަދި ނެޝަނަލް މެންޓަލް ހެލްތު ޑިޕާޓްމަންޓު ގުޅިގެން ކުރިއަށްގެންދާ މި ޕްރޮގްރާމް އިފްތިތާޙްކޮށްދެއްވީ ހެލްތު މިނިސްޓަރ އަބްދުﷲ ނާޘިމް އިބްރާހިމްއެވެ.

ކ. ގުރައިދޫގައި ހުންނަ ޙާއްސަ އެހީއަށް ބޭނުންވާ މީހުންގެ މަރުކަޒަކީ، 6 ޖޫން 1976ގައި، ނުކުޅެދުންތެރިކަން ހުންނަ ފަރާތްތަކަށް ސަރުކާރުގެ ހިޔާވަހިކަން ދިނުމަށް ގާއިމްކުރެވިފައިވާ މަރުކަޒަކެވެ.

ޙާއްސަ އެހީއަށް ބޭނުންވާ މީހުންގެ މަރުކަޒު ނުވަތަ "ހޯމް ފޯ ޕީޕަލް ވިތް ސްޕެޝަލް ނީޑްސް" މިއީ ނުކުޅެދުންތެރިކަން ހުންނަ ފަރާތްތަކާއި، އެކި ކަހަލަ ނަފްސާނީ ބަލިހުންނަ ފަރާތްތަކުގެ އިތުރުން އުމުރުން ދުވަސްވީ މީހުންނަށް ވެސް އެފަރާތްތަކުގެ "ހޯމްއެއްގެ ގޮތު ގައި" ނުވަތަ "އަމިއްލަ ގެ"ކަމުގައި ދެކެމުން އަންނަ މަރުކަޒެކެވެ.