މާވަށުގައި މަރާލި މީހާގެ ހަށިގަނޑު އިތުރު ތަޙްލީލުތަކަށް މާލެ ގެނެސްފި
29 ޖުލައި 2025 - 07:10
މާވަށުގައި ވަޅިން ހަމަލާދީ މަރާލި މީހާގެ ހަށިގަނޑު އިތުރު ތަޙްލީލުތަކަށް މާލެ ގެނެސްފިއެވެ.
ފުލުހުން ބުނީ މާވަށުގައި ހިންގި މާރާމަރީގައި ނިޔާވި އުމުރުން 29 އަހަރުގެ މޫސާ އިބްރާހިމްގެ ހަށިގަނޑު ތަހުގީގަށް ބޭނުންވާ އިތުރު ތަހުލީލުތައް ކުރުމަށް މާލެ ގެނެސްފައިވާކަމަށެވެ.
މޫސާ އިބްރާހިމް ސިއްހީ މަރުކަޒަށް ގެންދިޔަ އިރުވެސް ނިޔާވެފައިވާކަމަށް ފުލުހުންވަނީ މައުލޫމާތުދީފައެވެ.
ފުލުހުން ބުނީ މި މައްސަލާގައި މިހާތަނަށް ބެލި ބެލުމުން މިއީ ދެ މީހެއްގެ ދެމެދުގައި ހިނގާފައިވާ މާރާމާރީއެއް ކަމަށާއި އަދި މި މާރާމާރީގައި މޫސާ އިބްރާހިމަށް ހަމަލާދިނީ ހދ. ނޮޅިވަރަންފަރަށް ނިސްބަތްވާ 29 އަހަރުގެ މުހައްމަދު އިބްރާހީމްކަމަށެވެ. އޭނާ މިހާރު ފުލުހުންގެ ބެލުމުގެ ދަށަށް ގެންގޮސްފައިވާކަމަށް ފުލުހުން ވަނީ ބުނެފައެވެ.
މޫސާ އިބްރާހިމްއަށް ހަމަލާދިނުމަށް ބޭނުން ކުރިކަމަށް ބެލެވޭ ވަޅި ފުލުހުންވަނީ މިހާރު ހޯދާފައެވެ. އަދި މި މައްސަލަ ފުލުހުންދަނީ ތަހުގީގުކުރަމުންނެވެ.
