އިނގިރޭސި ސަރުކާރުން ސެޕްޓެމްބަރު މަހު ފަލަޞްޠީނަކީ ދައުލަތެއްގެ ގޮތުގައި ރަސްމީކޮށް ބަލައިގަންނާނެ ކަމަށް އިޢުލާނުކޮށްފައެވެ. ނަމަވެސް އިނގިރޭސިން ފަލަޞްޠީނަކީ ވަކި ދަޢުލަތެއްގެ ގޮތުގައި ބަލައިގަންނާނީ އިސްރާއީލަށް ވަކި ޝަރުތުތަކެއް ކަނޑައަޅައި އެކަން އެގޮތަށް ނުކޮށްފިނަމަކަމަށް ވަނީ ބުނެފައެވެ.

ޣައްޒާއާ ގުޅޭގޮތުން ބޭއްވުނު ކުއްލި ކެބިނެޓް ބައްދަލުވުމަކަށްފަހު، އެމެރިކާގެ ރައީސް ޑޮނަލްޑް ޓްރަމްޕްއާ ބައްދަލުކުރުމަށްފަހު، ބްރިޓެއިންއިނގިރޭސި ބޮޑުވަޒީރު ސަރ ކީރ ސްޓާމަރ ވަނީ މި އިޢުލާނު އަންގާރަ ދުވަހު ކުރައްވާފައެވެ. އޭނާ ވިދާޅުވި ގޮތުގައި އދ.ގެ ޖެނެރަލް އެސެމްބްލީގައި ސެޕްޓެމްބަރު މަހު ފަލަސްތީނަކީ ދައުލަތެއްގެ ގޮތުގައި ބަލައިގަންނާނެއެވެ.

އިސްރާއީލުން ފުރިހަމަކުރަންޖެހޭ ޝަރުތުތަކުގެ ތެރޭގައި:

• ޣައްޒާގެ "ނިކަމެތި ޙާލަތު" ނިމުމަކަށް ގެނައުމަށް މަސައްކަތްކުރުން
• ހަނގުރާމަ ހުއްޓާލުމަށް އެއްބަސްވުން
• ދެމެހެއްޓެނިވި ސުލްޙައަކަށް އެއްބަސްވެ، ދެ ދައުލަތުގެ ޙައްލަކަށް މަގުފަހިކުރުން
• އދ.ގެ އެހީ ފޯރުކޮށްދިނުމުގެ މަސައްކަތް އަލުން ފެށުމަށް ހުއްދަދިނުން
• ވެސްޓް ބޭންކް އަތުލުމުގެ އެއްވެސް މަސައްކަތެއް ނުކުރުން

މި ނިންމުމާއި ގުޅިގެން އިސްރާއީލުގެ ފޮރިން މިނިސްޓްރީން ވަނީ މިއީ ޙަމާސްއަށް ލިބޭ ކާމިޔާބެއްކަމަށް ބުނެ، އިނގިރޭސިންގެ ނިންމުމާމެދު ކަންބޮޑުވުން ފާޅުކޮށްފައެވެ. އަދި މިއީ ޣައްޒާގައި ހަނގުރާމަ ހުއްޓުވުމަށާއި ރަހީނުން ދޫކޮށްލުމަށް ކުރެވޭ މަސައްކަތްތަކަށް ހުރަސްއެޅޭނެ ކަމެއް ކަމަށްވެސް ބުނެފައިވެއެވެ.

މީގެ އިތުރުން ފްރާންސްގެ ރައީސް އެމެނުއެލް މެކްރޯން އިއްޔެ ވަނީ ސެޕްޓެމްބަރުގައި ފަލަސްތީން ދައުލަތެއްގެ ގޮތުގައި ބަލައިގަންނާނެކަމަށް އިޢުލާނުކޮށްފައެވެ. މިއީ ޖީ7 ގްރޫޕްގެ ތެރެއިން މިފަދަ ނިންމުމެއް ނިންމާ ފުރަތަމަ ޤައުމެވެ. މީގެ ކުރިން އަޔަރލެންޑް، ސްޕެއިން އަދި ނޯވޭ ވަނީ ފަލަސްތީނަކީ ދައުލަތެއްގެ ގޮތުގައި ރަސްމީކޮށް ބަލައިގަނެފައެވެ.