2025 ވަނަ އަހަރުގެ ޖުލައި 17 ގެ ނިޔަލަށް ދައުލަތަށް ލިބުނު އާމްދަނީއާއި ހިލޭ އެހީގެ ގޮތުގައި ޖުމްލަ 20,516.7 މިލިއަން ރުފިޔާ ލިބިފައިވާކަމަށް މިނިސްޓްރީ އޮފް ފިނޭންސުން ހާމަކޮށްފިއެވެ.

މި މައުލޫމާތު ހާމަކޮށްފައިވަނީ ފިނޭންސް މިނިސްޓްރީން އާންމުކުރި "ވީކްލީ ފިސްކަލް ޑިވެލޮޕްމަންޓްސް"ގައެވެ.

މިއީ މި އަހަރަށް ލަފާކުރެވުނު 39,790.0 މިލިއަން ރުފިޔާގެ ތެރެއިން ލިބިފައިވާ މިންވަރެވެ.

އާމްދަނީގެ ގޮތުގައި ލިބުނު ފައިސާގެ 76 އިންސައްތައަކީ ޓެކްސްގެ ގޮތުގައި ލިބުނު އާމްދަނީއެވެ. އަދި 23 އިންސައްތައަކީ ޓެކްސް ނޫން ގޮތްގޮތުން ލިބުނު އާމްދަނީއެވެ. އަދި 1 އިންސައްތައަކީ ހިލޭ އެހީގެ ގޮތުގައި ލިބުނު ފައިސާއެވެ. އާމްދަނީގެ އެންމެ ބޮޑު ކުރިއެރުމެއް ފެނިފައިވަނީ އިމްޕޯޓް ޑިއުޓީންނެވެ.

2025 ވަނަ އަހަރަށް ފާސްކުރެވިފައިވާ ބަޖެޓަކީ 49,178.5 މިލިއަން ރުފިޔާއެވެ. މީގެ ތެރެއިން ޖުލައި 17 ގެ ނިޔަލަށް ޚަރަދުވެފައިވަނީ 19,461.4 މިލިއަން ރުފިޔާއެވެ. ޚަރަދުތަކުގެ 88 އިންސައްތައަކީ ރިކަރަންޓް ޚަރަދުތަކެވެ. އަދި 12 އިންސައްތައަކީ ކެޕިޓަލް ޚަރަދުތަކެވެ.

އޮފީސްތަކުގެ ތެރެއިން އެންމެ ބޮޑު ޚަރަދެއް ހިނގާފައިވަނީ މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރުންނެވެ. މި މިނިސްޓްރީން 1,605.0 މިލިއަން ރުފިޔާ ޚަރަދުކޮށްފައިވެއެވެ. ދެވަނައަށް އެންމެ ބޮޑު ޚަރަދެއް ކޮށްފައިވަނީ މިނިސްޓްރީ އޮފް އެޑިޔުކޭޝަނުން 1,191.4 މިލިއަން ރުފިޔާއެވެ. އަދި ނޭޝަނަލް ސޯޝަލް ޕްރޮޓެކްޝަން އެޖެންސީން 1,074.5 މިލިއަން ރުފިޔާ ޚަރަދުކޮށްފައިވެއެވެ.

މި މުއްދަތުގެ ތެރޭގައި ދައުލަތުގެ ޖުމްލަ އާމްދަނީއާއި ޚަރަދަށް ބަލާއިރު، 1,055.3 މިލިއަން ރުފިޔާގެ ސާޕްލަސްއަކަށް ވަނީ އަރާފައެވެ.