ސަރުކާރުގެ ޕަބްލިކް ސެކްޓަރ އިންވެސްޓްމަންޓް ޕްރޮޖެކްޓްސް (ޕީއެސްއައިޕީ) ގެ ދަށުން ޖުމްލަ 2.19 ބިލިއަން ރުފިޔާގެ މަޝްރޫޢުތައް ހިންގާފައިވާކަމަށް ސަރުކާރުން ހާމަކޮށްފިއެވެ.

ފިނޭންސް މިނިސްޓްރީން އާންމުކުރި "ވީކްލީ ފިސްކަލް ޑިވެލޮޕްމަންޓްސް" ރިޕޯޓުގައިވާ ގޮތުން މިމަހުގެ 17 ވަނަ ދުވަހުގެ ނިޔަލަށް ވަނީ 2.19 ބިލިއަން ރުފިޔާ ޕީއެސްއަޕީއަށް ޚަރަދުކޮށްފައެވެ.

ޕީއެސްއައިޕީ މަޝްރޫއުތަކަށް މި އަހަރުގެ ބަޖެޓުގައި 12.3 ބިލިއަން ރުފިޔާ ވަނީ ހިމަނާފަ އެވެ.

ޕީއެސްއައިޕީ މަޝްރޫއުތަކުގެ ތެރެއިން މި އަހަރު އެންމެ ބޮޑު ހޭދައެއްކުރީ އެއާޕޯޓް މަޝްރޫއުތަކަށެވެ.
އެ ގޮތުން އެއާޕޯޓް މަޝްރޫއުތަކަށް 882.9 މިލިއަން ރުފިޔާ ހަރަދުކުރިއިރު ބިން ހިއްކުމުގެ މަޝްރޫއުތަކަށް 277.8 މިލިއަން ރުފިޔާ ހަރަދުކޮށްފައިވެ އެވެ.

ހާބަރު މަޝްރޫއުތަކަށް 125.7 މިލިއަން ރުފިޔާ ހޭދަކުރިއިރު ބްރިޖު މަޝްރޫއަށް 165.5 މިލިއަން ރުފިޔާ މި އަހަރުގެ މިހާތަނަށް ހޭދަކޮށްފައިވާ ކަމަށް ފިނޭންސްގެ ތަފާސްހިސާބުތަކުން ދައްކަ އެވެ.

މަގު ހެދުމުގެ މަޝްރޫއުތަކަށް 71.3 މިލިއަން ރުފިޔާ ހަރަދުކޮށްފައިވާއިރު , ބޯހިޔާވަހިކަމުގެ މަޝްރޫއުތަކަށް 108.6 މިލިއަން ރުފިޔާ އަދި ފެނާއި ނަރުދަމާގެ މަޝްރޫއުތަކަށް 61.3 މިލިއަން ރުފިޔާ ހަރަދުކުރި އެވެ. މީގެ އިތުރުން ތިމާވެށި ހިމާޔަތްކުރުމުގެ މަޝްރޫއުތަކަށް 213 މިލިއަން ރުފިޔާ ހޭދަކޮށްފައިވެ އެވެ.