ސިންގަޕޫރުގައި ކުރިއަށްދާ 22 ވަނަ ވޯލްޑް އެކުއަޓިކްސް ޗެމްޕިއަންޝިޕްގައި ދިވެހި ފެތުންތެރިން ވަނީ ޖުމްލަ 6 ގައުމީ ރެކޯޑެއް އައު ކޮށްފައެވެ. މީގެ ތެރޭގައި 14 އަހަރުގެ ހުނަރުވެރި ފެތުންތެރި އަމްނާ ތަޒްކިޔާ މިރުސާދު ހިމެނޭ ގޮތުން އޭނާ ވަނީ ދެ ގައުމީ ރެކޯޑެއް އައު ކޮށްފައެވެ.

ތަޒްކިޔާ އައު ކުރި ރެކޯޑުތަކުގެ ތެރޭގައި އަންހެނުންގެ ލޯންގްކޯސް 100 މީޓަރު ބެކްސްޓްރޯކް އިވެންޓާއި، އަންހެނުންގެ ލޯންގް ކޯސް 100 މީޓަރު ފްރީސްޓައިލް އިވެންޓް ހިމެނެއެވެ. ފްރީސްޓައިލް އިވެންޓުގައި ތަޒްކިޔާ ވަނީ 01:04.04 ގެ ފޮރިގެންވާ ވަގުތެއްގައި ރޭސް ނިންމާލާފައެވެ.

މި މުބާރާތުގައި އެހެން ފެތުންތެރިންވެސް ވަނީ ބައެއް ރެކޯޑުތައް އައު ކޮށްފައެވެ. މުހައްމަދު ރިހާން ޝިހާމް ވަނީ 200 މީޓަރު ބަޓަފްލައި އިވެންޓުގެ ރެކޯޑު އައު ކުރުމާއެކު، މުހައްމަދު އާން ހުސެއިން ވަނީ ފިރިހެނުންގެ ލޯންގް ކޯސް 100 މީޓަރު ފްރީސްޓައިލް އިވެންޓުގެ ރެކޯޑު އައު ކޮށްފައެވެ.

މީގެއިތުރުން މެރާލް އައިން ލަތީފް ވަނީ އަންހެނުންގެ ލޯންގް ކޯސް 200 މީޓަރު އިންޑިވިޖުއަލް މެޑްލޭ އިވެންޓުގެ ގައުމީ ރެކޯޑު އައު ކޮށްފައެވެ. އަދި ހަމައެއާއެކު ހަތަރެއް ގުނަ ސަތޭކަ މީޓަރު މިކްސްޑް މެޑްލޭ ރިލޭ އިވެންޓުގެ ގައުމީ ރެކޯޑުވެސް ވަނީ އައު ކުރެވިފައެވެ.

ފާހަގަކޮށްލެވޭ ކަމަކީ ތަޒްކިޔާ އައު ކުރި ފްރީސްޓައިލް އިވެންޓުގެ ރެކޯޑަކީ މީގެ ކުރިން އައިޝަތު އުލްޔާ ޝާއިގު ގެ އަތުގައި އޮތް ރެކޯޑެކެވެ. އުލްޔާ މި ރެކޯޑު އައު ކޮށްފައިވަނީ މި އަހަރު ޔޫޑަބްލިއުއެސްސީ ކްލަބް ނައިޓް ނަންބަރު ފަހެއްގައި 01:04.32 ގެ ވަގުތުން ރޭސް ނިންމާލައިގެންނެވެ