ފާއިތުވި 24 ގަޑިއިރުގެ ތެރޭގައި ފަލަސްޠީނުގެ ޣައްޒާގައި އިތުރު 40 މީހުން ޝަހީދުކޮށްލައިފިއެވެ.

އެހީގެ ސާމާނު ހޯދުމަށް މަސައްކަތްކުރަމުން ދިިިޔަ މީހުން ޝަހީދުވެފައި ވަނީ ޔަހޫދީންނާއި އެމެރިކާއާ ގުޅުންހުރި ޣައްޒާ ހިޔުމެނިޓޭރިއަން ފައުންޑޭޝަން (ޖީއެޗްއެފު)ން އެހީގެ ސާމާނު ބަހައި މަރުކަޒުތައް ކައިރީގައެވެ. އެގޮތުން ޣައްޒާގެ ދެކުނުގައި ޤާއިމުކޮށްފައިވާ އެ ފަދަ މަރުކަޒަކާއި މެދުތެރޭ ޣައްޒާގައި ޤާއިމުކޮށްފައިވާ މަރުކަޒެއް ކައިރީގައި ޣައްޒާގެ ރައްޔިތުންނަށް ޙަމަލާދީ ޝަހީދުކޮށްލާފައިވެއެވެ.

Ad by Hajj Corporation

އޭގެ އިތުރުން އެހީގެ ސާމާނު ހިފައިގެން އަންނަ އދގެ ލޮރީތަކުގެ އިންތިޒާރުގައި ޔަހޫދީ ސަރަޙައްދީ ރޮނގު ކައިރިއަށް އެއްވެ ތިބި ފަަލަސްޠީނުގެ ރައްޔިތުންގެ ތެރެއިން 13 މީހުން ވެސް ޝަހީދުކޮށްލާފައިވެއެވެ.

ޣައްޒާގެ ޞިއްޙީ އިދާރާތަކުން ބުނީ މަރުވި މީހުންގެ ތެރޭގައި އެހީގެ ސާމާނު ހޯދުމަށް މަސައްކަތް ކުރަމުންދިިޔަ މީހުން ހިމެނޭ ކަމަށެވެ. ޣައްޒާގައި އާންމުވެގެންވާ ބަނޑުހައިހޫނުކަމެއް ފެތުރެމުންދާ ކަމުގެ އިންޒާރު އިންސާނީ އެހީ ފޯރުކޮށްދޭ ޖަމްޢިއްޔާތަކުން ދެމުންދާއިރު، ފާއިތުވި 24 ގަޑިއިރުގެ ތެރޭގައި ބަނޑުހައިހޫނުކަމުގެ ސަބަބުން އިތުރު ފަސް މީހުން ޝަހީދުވެފައިވެއެވެ. އެއާއެކު ފާއިތުވި ހަފްތާތަކުގައި ބަނޑުހައިހޫނުކަމުގެ ސަބަބުން ޣައްޒާގައި ޝަހީދުވި މީހުންގެ ޢަދަދު ވަނީ 180އަށް އިތުރުވެފައެވެ. އޭގެ ތެރޭގައި 93 ކުޑަކުދިން ވެސް ހިމެނެއެވެ.

ޣައްޒާގެ ބަނޑުހައިހޫނުކަމުގެ ޙާލަތު އިންތިހާ ދަރަޖައަށް ގޯސްވެފައިވާއިރު، އެ ސަހަރުގެ ހައިހޫނުގައި ޖެހިފައިވާ ކުޑަކުދިންގެ ފޮޓޯތަކާއި ވީޑިޔޯތައް ދަނީ ހަލުވިކަމާއެކު މީސްމީޑިޔާގައި ދައުރުވަމުންނެވެ. އެެއާއެކު ޔަހޫދީންނަށް ކުރިމަތިވަމުންދާ ބައިނަލްއަޤްވާމީ ފިއްތުންތައް އިތުރުވެ، ޔަހޫދީންނަށް މިހާރު ވަނީ ޣައްޒާއަށް އިތުރު އެހީގެ ސާމާނު ވެއްދުމަށް ފުރުޞަތު ދިނުމަށް މަޖުބޫރުވެފައެވެ. މިދިޔަ ހަފްތާގެ ތެރޭގައި ޔަހޫދީން ވަނީ އެހީގެ ސާމާނު ވެއްދުމަށް ފުރުޞަތު ދިނުމަށް ކަމަށް ބުނެ ވަކި ގަޑިތަކެއްގައި އަދި ވަކި ސަރަޙައްދުތަކެއްގައި ޙަމަލާދިނުން މަޑުޖައްސާލައިފައެވެ. 

އދން ބުނީ މިދިޔަ މެއި މަހުގެ ފަހުކޮޅު ޖީއެޗްއެފުން ޣައްޒާގައި ޙަރަކާތްތެރިވާން ފެށި ފަހުން އެހީ ބަހާ މަރުކަޒުތައް ކައިރިންނާއި އެހީގެ ސާމާނު ހޯދުމަށް މަސައްކަތްކުރަމުން ދިޔަ ޣައްޒާގެ 1،000 އަށްވުރެ ގިނަ ރައްޔިތުން ޔަހޫދީން ޝަހީދުކޮށްލާފައިވާ ކަމަށެވެ.