ރައްޔިތުން ހޭލުންތެރިކުރުމުގެ ޕްރޮގްރާމެއް އދ.އަތޮޅުގައި ކުރިއަށް ގެންގޮސްފި
6 އޯގަސްޓު 2025 - 03:59

ރައްޔިތުންނާ ފުލުހުންނާ ދެމެދު އޮންނަ ގުޅުން އިތުރަށް ބަދަހިކޮށް އެކުވެރިކަމާއި އެއްބައިވަންތަކަން އާލާކުރުމުގެ ގޮތުން ރައްޔިތުންނާ ބައްދަލުކޮށް މައުލޫމާތު ދިނުމަށް ވޯކް އެންޑް ޓޯކް ހަރަކާތް އދ. އަތޮޅު ރަށްރަށުގައި ކުރިއަށް ގެންގޮސްފިއެވެ.
މި މަހު 2 ވަނަ ދުވަހު ކުރިއަށް ގެންދިޔަ މި ހަރަކާތުގައި ސްކޭމް މައްސަލަތައް ހުށަހެޅޭ މިންވަރު އިތުރުވަމުން ދާތީ ރައްޔިތުން ސަމާލުވާންވީ ކަންކަމާއި މިހާރު ހުށަހެޅޭ ސްކޭމްގެ ޓްރެންޑްތަކުގެ މައުލޫމާތު ހިއްސާކޮށްފައިވެއެވެ. އަދި ނިސްބަތުން މުޅި އަތޮޅުގައި އާންމުވެފައިވާ ކުށްތަކުގެ މައުލޫމާތުދީ އެފަދަ ކުށްތަކުން ރައްކާތެރިވުމަށް ވެސް މައުލޫމާތު ދީފައިވެއެވެ.

Ad by Hajj Corporation
އަދި މަގުމަތީގެ ސަލާމަތާއި ރައްކާތެރިކަމަށް އަބަދުވެސް ސަމާލުކަންދީގެން މަގު ބޭނުންކުރުމަށާއި މި ދުވަސްވަރަކީ މޫސުން ގޯސް ދުވަސްވަރަކަށް ވާތީ ކަނޑުދަތުރުފަތުރު ކުރާއިރު ސަމާލުކަންދޭންޖެހޭ ކަންކަމާއި ރައްޔިތުންގެ އަގުބޮޑެތި މުދަލާއި ގެދޮރު ރައްކާތެރިކޮށް ބެލެހެއްޓުމުގައި ސަމާލުކަންދޭންޖެހޭ ކަންކަމާ ގުޅޭގޮތުން ވެސް މައުލޫމާތު ހިއްސާކޮށްފައިވެއެވެ.
މީގެ އިތުރުން ވެސް، އދ. އަތޮޅަކީ ލޯކަލް ޓޫރިޒަމް ފުޅާދާއިރާއެއްގައި ހިންގަމުންދާ އަތޮޅަކަށް ވާތީ ސީޒަން ފެށުމުގެ ކުރިން ސަމާލުކަންދޭންވީ ކަންކަމާ ގުޅޭގޮތުން މައުލޫމާތު ދިނުމަށް ގެސްޓްހައުސްތަކާއި ޓޫރިސްޓުންނަށް ހިދުމަތްދޭ ފަރާތްތަކާ ބައްދަލުކޮށް މައުލޫމާތު ދީފައިވެއެވެ. މިގޮތުން، ފަތުރުވެރިންގެ ފަރާތުން ފެންނަ އާންމު އިޖުތިމާއީ މިންގަނޑުތަކާ ހިލާފު ކަންކަން ހުއްޓުވުމަށް މަސައްކަތްކުރުމާއި މީހުން ދިރިއުޅޭ ރަށްރަށުގައި ޗުއްޓީ ހޭދަކުރާ ފަތުރުވެރިންނަށް ކިޔައިދޭންޖެހޭ ކަންކަން ބުނެދީ އެ މައުލޫމާތު ފަތުރުވެރިންނާ ހިއްސާކުރުމަށް އިލްތިމާސްކޮށްފައިވެއެވެ. އަދި ޓޫރިސްޓުންގެ ރައްކާތެރިކަމާއި ގަވާއިދުތަކާއި އުސޫލުތަކާ ގުޅޭ މައުލޫމާތު ވެސް ހިއްސާކޮށްފައިވެއެވެ.