ރާއްޖޭގައި ބޮޑެތި ސިޓީތަކުގައި ކުށްކުރާ ކުދިންގެ މިންވަރު އަންނަނީ އިތުރުވަމުން ކަމަށް އިންސްޕެކްޓަރ އޮފް ޕޮލިސް އަޙްމަދު ހުސެއިން ވިދާޅުވެއްޖެއެވެ.

އިންސްޕެކްޓަރ އޮފް ޕޮލިސް އަޙްމަދު ހުސެއިން މެންދުރުޓީވީގެ މައުޟޫ ޕްރޮގްރާމުގައި ވާހަކަ ދައްކަމުން ވިދާޅުވީ ކުށުގެ ވެށީގައި ކުޑަކުދިން އުޅޭ މިންވަރު މިހާރު އަންނަނީ އިތުރު ވަމުންކަމަށެވެ. އަދި ހާއްސަ ކޮށް ހުޅުމާލޭ ދެ ވަނަ ފިޔަވަހީގައި މީހުން އާބާދީވިފަހުން ކުށުގެ ވެށްޓަށް އަންނަމުންދާ ކުޑަކުދިންނަކީ ޖަމާއަތް ހަދާއިގެން އިންތިޒާމްވެގެން ކުށްކުރާ ފަރާތްތަކާއެކު އެކި ބާވަތުގެ ކުށްތަކުގައި ޝާމިލުވާ ކުދިން ކަން ފާހަގަ ކުރެވިފައިވާ ކަމަށް އަހްމަދު ވިދާޅުވި އެވެ.

Ad by Hajj Corporation

އަހްމަދު ވިދާޅުވީ ކުށްކުރާ ކުޑަކުދިން ބޮޑަށް ފާހަގަ ވެގެންދަނީ މަސްތުވާތަކެތި ވިއްކުމުގައި ކުޑަކުދިން ޝާމިލުވާ މިންވަރު އިތުރުވަމުންދާއިރު، މާރާމާރީ ހިންގުމާއި، މާރާމާރީ ހިންގަން މީހުން ލޮކޭޓް ކުރުމަށް ވެސް ކުޑަކުދިން ބޭނުން ކުރާކަން ވަނީ ފާހަގަ ވެފައިއެވެ. މީގެ އިތުރުން ބައެއް ގުރޫފްތަކުން މީހުން ހިފާފަ ހުންނަށް އެޕާޓްމެންޓްތަކުގައި ކުޑަކުދިންނަށް ހަރަދުކޮށް އެ ކުދިން އެ ގޭގޭގައި ގެންގުޅޭކަން ފާހަގަ ވެފައިވާ ކަމަށް އަހްމަދު ވިދާޅުވިއެވެ.

ރާއްޖެއަށް ބަލާއިރުގައި ރާއްޖޭގެ ވަކި ސަރަހައްދެއް ނޫން، އެކަމަކު ވެސް އަޅުގަނޑުމެންނަށް ފާހަގަ ކުރެވޭ ބަހާލެވިގެން ހުރިހާ ސަރަހައްދެއްވެސް، ވަކިން ހާއްސަކޮށް ރާއްޖޭގެ ބޮޑެތި ސިޓީތައް ހިމެނޭ ރަށްރަށުގައި އިންތިޒާމުވެގެން ކުށްކުރާ ފަރާތްތަކާއެކު ކުޑަ ކުދިން މިހާރަކަށް އައިސް އިތުރު ވަމުންދާ ކަމަށް. އަދި ވަކިން ހާއްސަ ކޮށް ހުޅުމާމެ ފޭސް ދޭގައި މީހުން އާބާދު ވާފެށިފަހުން އަޅުގަނޑުމެންނަށް ތަންކޮޅެއް ބޮޑަށް އެބަ ފާހަގަ ކުރެވޭ ކުށުގެ ވެށިގައި ކުޑަކުދިން އިތުރުވުމާއި ޖަމާއަތް ހަދާގެން އިންތިޒާމުވެގެން ކުށް ކުރާ ފަރާތްތަކާއެކު އެކި ބާވަތްތަކުގެ ކުަށްތަކުގައި ކުޑަކުދިން ގެންގުޅުން އިތުރުވެގެންދާކަން. އިންސްޕެކްޓަރ އޮފް ޕޮލިސް އަޙްމަދު ހުސެއިން

ގޭންގުތަކުން ހިންގާ ކުށްތަކާއި އެނޫންވެސް ނުރައްކާތެރި ކުށްތައް ހުއްޓުވުމުގެ ޤާނޫނަށް އަމަލުކުރަން ފެށުމާއެކު، ގާނޫނު ތަންފީޒުކުރުމަށްޓަކައި އެ ހިދުމަތުގެ ފަރާތުން ހާއްސަ މަސައްކަތްތަކެއް ކުރަމުންދާ ކަމަށް ވެސް އަހްމަދު ވިދާޅުވިއެވެ.

އެގޮތުން،ގޭންގުތަކުން ހިންގާ ކުށްތަކާއި އެނޫންވެސް ނުރައްކާތެރި ކުށްތައް ހުއްޓުވުމުގެ ޤާނޫނުން ލިބިދޭ ބާރުތަކުގެ ތެރޭގައި، ރާއްޖޭގެ ހައިކޯޓު މެދުވެރިކޮށް، އިންތިޒާމުވެފައިވާ ކުށްކުރާ ގުރޫޕުތައް ކަނޑައެޅުމާއި، އެފަދަ ގްރޫޕްތަކަށް ނިސްބަތްވާ ފަރާތްތަކުގެ މައްޗަށް، މޮނިޓަރކޮށް ކޮންޓްރޯލްކުރުމުގެ އަމުރު ނެރުމާއި އެފަދަ ގްރޫޕްތަކުން ކުރާ އަނިޔާވެރި އަމަލުތަކުން ކުޑަކުދިން ރައްކާތެރިކުރުމަށް އެކުދިންގެ މައްޗަށް ރައްކާތެރިކުރުމުގެ އަމުރު ނެރުމަށް، ފުލުހުންގެ ފަރާތުން ޕްރޮސެކިއުޓަރ ޖެނެރަލްގެ އޮފީހަށް ހުށަހެޅުމުގެ ކަންކަން ކުރިއަށް ގެންދާނެކަމަށް ވެސް ބަޔާން ކޮށްފައިވެއެވެ.

ހަމައެއާއެކު، އިންތިޒާމުވެގެން ކުށްކުރާ ގްރޫޕްތަކަށް ނިސްބަތްވާ މީހުންގެ ނުހައްގު މުއްސަނދިކަމުގެ މައްސަލަތައް ތަހުގީގުކޮށް، އެ މީހުން ނުހައްގުން ހޯދާފައިވާ މުދާ ދައުލަތަށް ނެގުމުގެ މަސައްކަތާއި، އިންތިޒާމުވެފައިވާ ކުށްކުރާ ގްރޫޕްތަކަށް ކުޑަކުދިންނާއި ޒުވާނުން ރެކްރޫޓުކުރާ މައްސަލަތަކަށް ހާއްސަ ސަމާލުކަމެއް ދީގެން ތަހުގީގުކުރަމުންދާނެ ކަމަށް ވެސް ވެއެވެ.

މީގެއިތުރުން، ކުށްކުރާ ގްރޫޕްތައް އެއްވާ ސަރަހައްދުތަކުގައި ފުލުހުންގެ ވިޒިބިލިޓީ އިތުރުކޮށް، އެ ސަރަހައްދުތަކުގައި ތިބޭ ފަރާތްތައް ބަލައި ފާސްކުރުމުގެ މަސައްކަތާއި އިންތިޒާމުވެގެން ހިންގާ ކުށްކުރުމަށް އަމިއްލަ ތަންތަން ބޭނުންކުރަމުންދާތީ، އެފަދަ ތަންތަން ރެއިޑްކޮށް، ބަލައި ފާސްކުރުމުގެ މަސައްކަތް ވެސް ކުރަމުންދާނެކަމަށެވެ.

މިހާރު ތަސްދީގުކޮށް، އަމަލުކުރަން ފަށާފައިވާ ޤާނޫނުން، ގޭންގުތަކަކީ ކޮބައިކަން ކަނޑައަޅައި، ގޭންގެއްގެ ތެރޭގައި ހިމެނޭ މީހެއްކަން ކަނޑައެޅުމާއި އަދި ކުށްތައް ހުއްޓުވުމުގެ މުހިންމު އިޖުރާޢަތްތައް ކަނޑައަޅާނެއެވެ. މީގެއިތުރުން ނުހައްޤު މުއްސަނދިކަން ހޯދުމާއި، ގޭންގު ކުށްތަކުގައި ކުޑަކުދިން ޝާމިލްކުރުމުގެ މައްސަލައަށްވެސް މި ޤާނޫނުގެ ތެރެއި ހައްލުތަކެއް ހޯދުމަށް ވަނީ ހިމަނާފައެވެ.

ގޭންގް ކުށްތައް ހުއްޓުވުމަށްޓަކައި ސަރުކާރުން މިދިޔަ 18 މަސްދުވަހުގެ ތެރޭގައި މުހިންމު މަސައްކަތްތަކެއް ވަނީ ކޮށްފައެެވެ. އެގޮތުން، ގޭންގް ކްރައިމް އެންފޯސްމެންޓްގެ ނަމުގައި ވަކި ވިންގެއް ދިވެހި ފުލުހުންގެ ހިދުމަތުގައި 2024 ވަނަ އަހަރު ޖުލައި 1 ވަނަ ދުވަހު ވަނީ ގާއިމު ކޮށްފައެވެ. އެގޮތުން ގޭންގު ކުށްތަކާ ގުޅޭ މައްސަލަތަކުގައި މިދިޔަ 18 މަސްދުވަހު، ގްރޫޕުތައް އެއްވެ އުޅޭ ސަރަހައްދުތަކުން 31،511 މީހުން ހުއްޓުވައި ސުވާލުކޮށް އެކި މައްސަލަތަކުގައި 180 މީހަކު ހައްޔަރުކުރެވި، އޭގެ ތެރެއިން 83 މީހަކާ ދެކޮޅަށް ދައުވާ އުފުލާފައިވެއެވެ. މި މުއްދަތަށް ބަލާއިރު، ގޭންގު މާރާމާރީގައި، އެއްވެސް މީހެއްގެ ފުރާނަ ގެއްލިގޮސްފައެއްނުވެއެވެ.