މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އާންމުކޮށްފައިވާ އެންމެ ފަހުގެ އިގްތިސާދީ އަންދާޒާތަކުގައި، މި އަހަރު ރާއްޖޭގެ ގްރޮސް ޑޮމެސްޓިކް ޕްރޮޑަކްޓް (ޖީޑީޕީ) ނުވަތަ އުފެއްދުންތެރިކަމުގެ ނިސްބަތް ހުންނާނީ 4.5 އާއި 5.6 އިންސައްތައިގައި ކަމަށް ލަފާކޮށްފައިވެއެވެ.

މަނިޓަރީ ސިޔާސަތު ދަށުން އެމްއެމްއޭ އިން ފާއިތުވި އަހަރު އަޅާފައިވާ ފިޔަވަޅުތަކާ ގުޅެގޮތުން ނެރުނު ނޫސް ބަޔާނެއްގައި ބުނީ، މޯލްޑިވްސް ބިއުރޯ އޮފް ސްޓެޓިސްޓިކްސް އިން ހުސްވި ޖޫން މަހުގެ 30 ވަނަ ދުވަހު ޝާއިއުކޮށްފައިވާ ރިއަލް ގްރޮސް ޑޮމެސްޓިކް ޕްރޮޑަކްޓް (ޖީޑީޕީ) ގެ ތަފާސް ހިސާބު ތަކަށް ބަލާއިރު، މިދިޔަ އަހަރު ރާއްޖޭގެ އުފެއްދުންތެރިކަން ނުވަތަ ޖީޑީޕީ ކުރިއަރާފައިވާކަމަށް ފެންނަނީ 3.3 އިންސައްތަ ކަމަށެވެ. އެއީ މައިގަނޑު ގޮތެއްގައި ފަތުރުވެރިކަމުގެ ދާއިރާ އަދި ދަތުރުފަތުރާއި މުވާސަލާތީ ދާއިރާއަށް އައިސްފައިވާ ކުރިއެރުމުގެ ސަބަބުންކަމަށް ވެސް އެމްއެމްއޭ އިން ބުންޏެވެ.

Ad by Hajj Corporation

އެގޮތުން ވެލާނާ އިންޓަނޭޝަނަލް އެއާޕޯޓްގެ އައު ޓާމިނަލް ހުޅުވުމުގެ ސަބަބުން ފަތުރުވެރިކަމުގެ ދާއިރާއަށް އެންމެ ބޮޑު ހެޔޮ އަސަރެއް ކުރާނީ އަންނަ އަހަރު ކަމަށް ބެލެވޭކަމަށް ވެސް އެމްއެމްއޭއިން ވަނީ ބުނެފައެވެ. އަދި މި އަހަރު ފަތުރުވެރިން ޒިޔާރަތްކުރާ މިންވަރު އަންދާޒާކުރި ވަރަށްވުރެ އިތުރުވެއްޖެނަމަ، އިގްތިސާދީ ކުރިއެރުން މިހާރުގެ އަންދާޒާތަކަށްވުރެ ރަނގަޅުވެދާނެ ކަމަށް އެމްއެމްއޭއިން ފާހަގަކުރެއެވެ.

އެމްއެމްއޭގެ އަންދާޒާތަކުގައި، މި އަހަރު އިންފްލޭޝަން ރޭޓް ހުންނާނެ ކަމަށް ލަފާކޮށްފައިވަނީ 3.9 އިންސައްތައިގައެވެ. އަދި ރާއްޖޭގެ ރަސްމީ ރިޒާވް 705.1 މިލިއަން އެމެރިކާ ޑޮލަރުގައި ހުންނާނެ ކަމަށް އެމްއެމްއޭއިން ލަފާކޮށްފައިވެއެވެ.

ޖީޑީޕީ ނުވަތަ ގްރޮސް ޑޮމެސްޓިކް ޕްރޮޑަކްޓަކީ ވަކި މުއްދަތެއްގެ ތެރޭގައި ނުވަތަ އާންމުކޮށް އަހަރެއްގެ ތެރޭގައި، ގައުމެއްގެ އިގްތިސާދުން އުފައްދާ މުދަލާއި ހިދުމަތުގެ ޖުމްލަ އަގެވެ. ޖީޑީޕީ ހިސާބުކުރުމުގައި ގައުމެއްގައި އުފައްދާ ހުރިހާ މުދަލަކާއި ދޭ ހުރިހާ ހިދުމަތެއްގެ އަގު ހިމެނެއެވެ. މީގެ ތެރޭގައި އާންމު ފަރުދުންގެ ހަރަދުތައް، ވިޔަފާރިތަކުގެ އިންވެސްޓްމަންޓްތައް، ސަރުކާރުގެ ހަރަދުތައް އަދި ބޭރުގެ ވިޔަފާރީގެ ތެރޭގައި ހިމެނޭ އެކްސްޕޯޓް އަދި އިމްޕޯޓްގެ ތަފާތު ވެސް ހިމެނެއެވެ.

އެމްއެމްއޭއިން ބުނީ ސަރުކާރުގެ އިގްތިސާދީ އެޖެންޑާގައި ހިމަނާފައިވާ ކަންކަން ތަންފީޒުކޮށްފިނަމަ، ސަރުކާރުގެ ބަޖެޓަށާއި އިގްތިސާދުގެ އެހެނިހެން ދާއިރާތަކަށް ހެޔޮ ބަދަލު އައުމުގެ ފުރުސަތު ބޮޑުކަމަށެވެ.