މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ފައިނޭންޝަލް ލިޓަރަސީ އަދި އިސްލާމީ ފައިނޭންސްއާ ބެހޭ ހޭލުންތެރިކަން އިތުރުކުރުމަށް "ތަމްވީލް ފިންލިޓް ފެސްޓިވަލް 2025" ތަޢާރަފުކޮށްފިއެވެ.

މި ފެސްޓިވަލްގެ މައިގަނޑު މަޤްޞަދަކީ ދިވެހިރާއްޖޭގައި ފައިނޭންޝަލް ލިޓަރަސީ، ޒިންމާދާރު ގޮތެއްގައި ފައިސާ މެނޭޖްކުރުން އަދި އިސްލާމިކް ފައިނޭންސްއާ ބެހޭ ހޭލުންތެރިކަން އިތުރުކުރުމެވެ.

Ad by Hajj Corporation

މި ފެސްޓިވަލް އިފްތިތާހުކޮށްދެއްވީ މިނިސްޓަރ އޮފް އެޑިއުކޭޝަން ޑރ. އިސްމާއިލް ޝަފީޢުއެވެ. އިފްތިތާހީ ރަސްމިއްޔާތުގައި ވާހަކަފުޅު ދައްކަވަމުން "މާލީ ގޮތުން ހޭލުންތެރި މުޖުތަމަޢެއް ބިނާކުރުމަކީ މިއަދު ވަރަށް މުހިންމު ކަމެއް" ކަމުގައި މިނިސްޓަރު ފާހަގަކުރެއްވިއެވެ.

ފެސްޓިވަލްގެ މައިގަނޑު ހަރަކާތްތައް

މި ފެސްޓިވަލްގައި ހިމެނެނީ މައިގަނޑު 6 ހަރަކާތެވެ. އެއީ ފިންލިޓް ޗެލެންޖް، އިކޮންކުއެސްޓް ބަހުސް މުބާރާތް، އިމްޕެކްޓް ޕިޗް ޗެލެންޖް، ފިއުޗަރ ފައިނޭންސްގެ ނަމުގައި ބާއްވާ މަޒުމޫނު މުބާރާތް، ވެލިއުސް އެންޑް ވިޝަން އާޓް މުބާރާތް އަދި ކުރު ވީޑިއޯ ހެދުމުގެ މުބާރާތެވެ.

ފިންލިޓް ޗެލެންޖްގައި 18 އަހަރާއި 25 އަހަރާ ދެމެދުގެ ޒުވާނުންނަށް ބައިވެރިވެވޭނެއެވެ. މި ޗެލެންޖްގައި ފައިސާ ރައްކާކުރުމާއި، ބަޖެޓް ހެދުމާއި، ހަލާލު އިންވެސްޓްކުރުމާއި، ރިސްކް ޙިއްޞާކުރުމާއި، އަދި އިސްލާމިކް ފައިނޭންޝަލް ނިޒާމުގެ އަސާސްތަކާ ބެހޭ މަޢުލޫމާތު ޓެސްޓުކުރެވޭނެއެވެ.

އިކޮންކުއެސްޓް ބަހުސް މުބާރާތުގައި 16 އަހަރާއި 25 އަހަރާ ދެމެދުގެ ޒުވާނުންނަށް ބައިވެރިވެވޭނެއެވެ. މި މުބާރާތުގައި އިޤްތިޞާދީ މައްސަލަތަކާ ބެހޭގޮތުން ޢިލްމީ ހެކިތަކުގެ މައްޗަށް ބިނާކޮށް ބަހުސްކުރުމުގެ ފުރުޞަތު ލިބިގެންދާނެއެވެ. އަދި އިމްޕެކްޓް ޕިޗް ޗެލެންޖްގައި 18 އަހަރުން މަތީގެ ފަރާތްތަކަށް ބައިވެރިވެ، ދިވެހިރާއްޖޭގައި ފައިނޭންޝަލް ލިޓަރަސީ ކުރިއެރުވުމަށް ޝަރީޢާއާ އެއްގޮތްވާ އައު ޙައްލުތައް ހުށަހެޅުމުގެ ފުރުޞަތު ލިބިގެންދާނެއެވެ.