ޣައްޒާ ފަހު ނޭވާގައި: ބަނޑުހައިހޫނު ކަމުގައި 11،000 އަށްވުރެ ގިނަ ކުޑަކުދިން ޝަހީދުވެއްޖެ
8 އޯގަސްޓު 2025 - 10:10

ބަނޑުހައިހޫނުކަމާއި ކާނާ ލިބުން ދަތިވުމުގެ ސަބަބުން ޖުލައި މަހު ޣައްޒާގައި ފަސް އަހަރުން ދަށުގެ 11،877 ކުޑަ ކުދިން ޝަހީދުވި ކަމަށް ރިޕޯޓް ކޮށްފައިވާ ކަމަށް އދ. އިން ބުނެފިއެވެ.
އިންސާނީ ހައްގުތަކާ ބެހޭ ޖަމާއަތްތަކާއި އދ އިން ވަނީ ޣައްޒާއަށް އެހީގެ ކޮންވޯއީތަކަށް ހުއްދަ ދިނުމަކީ ބަނޑުހައިހޫނުކަމުގެ ދަތިކަމާއި އެންކްލޭވްގައި ކާނާ ނުލިބުމާ ގުޅިގެން މަރުވާ މީހުން މަދުކުރުމަށް އެޅޭ ކުޑަ ފިޔަވަޅެއް ކަމަށް ބުނެފައެވެ.

Ad by Hajj Corporation
"މިއީ ކާނާ ނުލިބުން ހަލުވިކަމާއެކު ފެތުރިގެންދާ ކަމުގެ ސާފު ހެއްކެއް، މިކަން ވަނީ ކުޑަކުދިންގެ ފުރާނަ ވަރަށް ބޮޑަށް ނުރައްކަލުގެ ތެރެއަށް ވައްޓާލާފަ" އދ. ގެ ކުޑަކުދިންގެ އިދާރާ ޔުނިސެފުން އިއްޔެ ވަނީ މި ހާލަތު ގޯސްވަމުން އަންނަ ކަމަށް ބުނެ، އިންޒާރު ދީފައެވެ.
ޣައްޒާއަށް ވެރިވެގަނެ، އެ ސަހަރުގައި ދިރިއުޅޭ 2.2 މިލިޔަނެއްހާ ރައްޔިތުން އަޅުވެތި ކުރުމަށް ޒަޔަނިސްޓުންގެ ނިރުބަވެރި ބޮޑުވަޒީރު ބެންޖަމިން ނަތަންޔާހޫ ވަނީ ނިންމާފައެވެ. އޭނާ ބުނީ، ޣައްޒާގެ ސަލާމަތީ ކަންކަން ބެލެހެއްޓުމާއި އެ ސަހަރުގައި ވެރިކަން ކުރުން ޢަރަބި ޤައުމުތަކާ ޙަވާލު ކުރަން ބޭނުންވާ ކަމުގައެވެ. އެއީ ކޮން ޤައުމުތަކެއް ކަން އޭނާ ސާފުކޮށްދީފައެއް ނުވެއެވެ.
"ޣައްޒާގެ ސަލާމަތީ ކަންކަން އޮންނަން ޖެހޭނީ ފަލަސްޠީނުގެ ރައްޔިތުން އެކުލަވައިލާ ޤާނޫނީ ޝަހުސެއްގެ އަތްދަށުގައި،" ނަން ހާމަކޮށްފައި ނުވާ އުރުދުންގެ މަޞްދަރުން ބުންޏެވެ. މިއީ، ނަތަންޔާހޫގެ ހުށަހެޅުމަށް ޢަރަބި ޤައުމަކުން ދީފައިވާ ފުރަތަމަ ރައްދެވެ. "ނަތަންޔާހޫގެ ސިޔާސަތުތަކަށް އަދި ހާވާފައިވާ ހަޑި ސާފުކުރަން ޢަރަބިން އެއްބަހެއް ނުވާނެ،" އުރުދުންގެ މަޞްދަރުން ބުންޏެވެ.
ޣައްޒާގެ ރައްޔިތުންގެ ނަސްލު ނައްތައިލުމަށް ޔަހޫދީ ފައުޖުން ލާއިންސާނީ ޖަރީމާއެއް ހިންގަން ފަށާފައި ވަނީ 2023 ވަނަ އަހަރުގެ އޮކްޓޫބަރު މަހުގެ 7ވަނަ ދުވަހުއެވެ. ޣައްޒާ ޢުދުވާނުގައި ޝަހީދު ކޮށްލާފައިވާ މީހުންގެ އަދަދު ވަނީ 61,000 އަށް އުފުލިފައެވެ. އޭގެ ތެރޭގައި ގިނައީ ކުށެއް ނެތް އަންހެނުންނާއި، މައުސޫމު ކުޑަކުދިންގެ އިތުރުން ހިނގާބިނގާވެ ނޫޅެވޭ ވަރުގެ އުމޫރުންނެވެ. އަދި، ޒަޚަމު ކޮށްލާފައިވާ މީހުންގެ އަދަދު ވަނީ 142,000އަށް އުފުލިފައެވެ.