މަނީ ޗޭންޖިންގ ވިޔަފާރިއާބެހޭ ޤަވާއިދު ދަށުން 34 ފަރާތަކަށް ލައިސަންސް ދޫކޮށްފައިވާ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ހާމަކޮށްފިއެވެ.

މަނީ ޗޭންޖިންގ ވިޔަފާރިއާބެހޭ ޤަވާއިދުގެ ދަށުން ލައިސަންސްއަށް އެދި ހުށަހެޅުމަށް ހުޅުވާލީ މިދިޔަ އަހަރުގެ އޮކްޓޫބަރު މަހުގެ 2 ވަނަ ދުވަހުއެވެ. އަލަށް އަމަލުކުރަން ފެށި މަނީ ޗޭންޖިންގ ވިޔަފާރިއާބެހޭ ޤަވާއިދުގެ ދަށުން ބޭރު ފައިސާ ގަނެ ވިއްކުމުގެ ޚިދުމަތް ދެވޭނީ އަލުން ރަޖިސްޓްރީކޮށްގެންނެވެ.

Ad by Hajj Corporation

އެގޮތުން، ޓިއާ 1 ލައިސަންސް 29 ފަރާތަކަށް އަދި ޓިއާ 2 ގެ ލައިސަންސް 5 ފަރާތަކަށް ވަނީ ދޫކޮށްފައެވެ.

ޓިއާ 1 ކެޓަގަރީގެ ލައިސަންސަކީ ބޭރުފައިސާ ގަނެ ވިއްކުމުގެ ވިޔަފާރިކުރުމަށް ދޫކުރާ ލައިސަންސެކެވެ. ޓިއާ 2 ލައިސަންސަކީ ހަމައެކަނި ރިސޯޓްތަކަށް ބޭރުފައިސާ ވިއްކުމަށް ދޫކުރެވޭ ލައިސަންސެކެވެ. އަލަށް ލައިސަންސް ދޫކުރެވުނު 34 ފަރާތް ހިމަނައިގެން މިހާރު ޖުމްލަ 62 ފަރާތަކަށް ވަނީ ލައިސަންސް ދޫކޮށްފައެވެ. މީގެ ތެރޭގައި ކުރިން ލައިސަންސް ދޫކޮށްފައިވާ ފަރާތްތަކުގެ ތެރެއިން، ވިޔަފާރި ކުރިއަށް ގެންދެވޭނެ ކަމަށް ކަނޑައަޅާފައިވާ 28 ފަރާތް ހިމެނެއެވެ.

އެމްއެމްއޭ އިން އަލަށް އަމަލުކުރަން ފެށި މި ޤަވާއިދަކީ 1987 އިން ފެށިގެން އަމަލުކުރަމުން އައި ޤަވާއިދުގެ ބަދަލުގައި ތަޢާރަފުކުރެވުނު އައު ޤަވާއިދެކެވެ.