ޓްރާންސްފަރ މާކެޓްގައި ޔޫރަޕުގެ އެންމެ ބޮޑު ޚަރަދެއްކުރި ލިވަޕޫލުން ސީޒަން ހުޅުވި މެޗުން ބަލިވެ އިނގިރޭސި ކޮމިއުނިޓީ ޝީލްޑް ގެއްލިއްޖެއެވެ. 300 މިލިޔަން ޑޮލަރުގެ ބޮޑު އިންވެސްޓްމަންޓް އަކާއެކު ސީޒަންފެށި ލިވަޕޫލް އާއި ދެކޮޅަށް ވެމްބްލީ ސްޓޭޑިއަމްގައި ކުޅުނު ކޮމިއުނިޓީ ޝީލްޑްގެ މެޗުގައި ކްރިސްޓަލް ޕެލަސް އިން ކާމިޔާބުކުރީ ޕެނަލްޓީ ޝޫޓްއައުޓުން ބަލިކޮށްގެންނެވެ.

މެޗު ފެށިގެން އެންމެ 4 މިނެޓުގައި ލިވަޕޫލަށް އަލަށް ސޮއިކުރި އެކިޓިކެ ގޯލުޖަހާފައިވާއިރ، ޕެލަސްގެ ފުރަތަމަ ގޯލަކީ 17 ވަނަ މިނެޓުގައި ލިބުނު ޕެނަލްޓީއަކުން މަޓެޓާ ޖެހި ގޯލެކެވެ. ލިވަޕޫލުގެ ދެވަނަ ގޯލު 21 ވަނަ މިނެޓުގައި ފްރިމްޕޮންގް ޖަހާފައިވާއިރު، ޕެލަސްގެ ސަރ ވަނީ 77 ވަނަ މިނެޓުގައި ނަތީޖާ ހަމަހަމަ ކޮށްފައެވެ. މީގެ އިތުރުންވެސް ޕެލަސް އަށް މިމެޗުގައި ލަނޑުޖަހާނެ ގިނަ ފުރުސަތު ތަކެއް ލިބި ބޭކާރުވެފައިވާކަން ފާހަގަ ކުރެވެއެވެ. މެޗުގެ ފުރިަހަމަ ވަގތު ހަމަވީ 2-2 އިންނެވެ.

ޕެނަލްޓީ ޝޫޓުގައި ލިވަޕޫލުގެ ސަލާޙުގެ ޕެނަލްޓީ ބޭރަށް ޖަހާފައިވާއިރު، މެކަލިސްޓާ އާއި ހާވޭ އެލިއަޓް ޖެހި ޕެނަލްޓީ އިނގިރޭސި ކީޕަރު ހެންޑަސަން ވަނީ ދިފާއުކޮށްފައެވެ. ޕެނަލްޓީ ޝޫޓު ޕެލަސް އިން ކާމިޔާބުހޯދީ 3-2 އިންނެވެ.

މިނަތީޖާއަކީ ޓްރާންސްފާގެ ރެކޯޑްތައް ބިންދާލުމަށްފަހު ސީޒަނާ ކުރިމަތިލި ލިވަޕޫލަށް ލިބުނު ބޮޑު ސިހުމެކެވެ.