ޕްރިމިއަރ ލީގު ސީޒަން ހުޅުވުމުގެ ގޮތުން ރޭގައި ލިވަޕޫލުގެ އެންފީލްޑްގައި ބޯންމައުތް އާއި ދެކޮޅަށް ކުޅުނު ފޯރިގަދަ މެޗުން ލިވަޕޫލް މޮޅުވެއްޖެއެވެ. މިމެޗުން ލިވަޕޫލް މޮޅުވީ 2-4 އިންނެވެ. މި މެޗަކީ މިދިޔަ ޖުލައި މަހު އެކްސިޑެންޓެއްގައި ކުލަބުގެ ކުރީގެ ތަރި ޑިއޯގޯ ޖޯޓާއަށް ޚާއްސަ އިޙްތިރާމެއް އަދާކުރި މެޗެކެވެ.

މެޗު ފެށުމުގެ ކުރިން، ޖޯޓާގެ ނަމާއި، ފޮޓޯ އަދި ޖާޒީ ނަންބަރު 20 ޖަހާފައިވާ ބެނާތަކާއި، ބެލޫންތަކާއި، ސްކާފުތައް އުފުލައިގެން ތިބި ސަޕޯޓަރުން "ޔޫ ވިލް ނެވަރ ވޯކް އެލޯން" ގައި ބައިވެރިވިއެވެ. މި ވަގުތު ގިނަ ސަޕޯޓަރުންގެ ލޮލުން ކަރުނަ އައިސްފައިވާ މަންޒަރު ފެނުނެވެ.

މި މެޗުގައި ލިވަޕޫލްއާއި އަލަށް ގުޅުނު އެކިޓިކެ ވަނީ އޭނާގެ ލީގުގެ ފުރަތަމަ ލަނޑު ޖަހާފައެވެ. 37 ވަނަ މިނެޓްގައި ޖެހި މި ލަނޑަށްފަހު އޭނާ ވަނީ ޖޯޓާގެ ނަންބަރު 20 އަށް އިޝާރާތްކޮށް ސެލެބްރޭޓްކޮށްފައެވެ. ދެވަނަ ހާފުގައި ކޯޑީ ގަކްޕޯ ވެސް ވަނީ ލަނޑެއް ޖަހާފައެވެ.

ދެވަނަ ހާފުގައި ބޯންމައުތުގެ އެންޓޮއިން ސެމެންޔޯ ވަނީ ދެ ލަނޑު ޖަހައި މެޗު އެއްވަރުކޮށްފައެވެ. ނަމަވެސް މެޗުގެ ފަހު މިނެޓުތަކުގައި ލިވަޕޫލް ވަނީ އިތުރު ދެ ލަނޑު ޖަހައި މޮޅުވެފައެވެ. މިގޯލުތައް ޖަހައިދިނީ ބަދަލުކުޅުންތެރިއެއްގެ ގޮތުގައި ކުޅެންނިކުތް ފެޑެރީކޯ ކިއޭސާ، އަދި ލިވަޕޫލްގެ ފަހުގޯލު ޖަހައިދިނީ ރެކޯޑް ބްރޭކަރ ސަލާޙުއެވެ. ރޭގެ ގޯލާއެކު ސަލާޙުވަނީ އިނގިރޭސި ލީގުގައި ޖެހިޖެހިގެން 10 އަހަރުގައި ސީޒަން ފެށޭ މެޗުގައި ގޯލުޖެހި ފުރަތަމަ ކުޅުންތެރިޔާއަށް ވެފައެވެ.