ޣައްޒާގެ އިންސާނީ ޙާލަތު ދުވަހެއް ދުވަހަކަށް ގޯސްވަމުންދާއިރު، ޔަހޫދީންނަށް ވާގިވެރިވާ ހުޅަނގުގެ ޤައުމުތަކަށް ދަނީ ފަލަސްޠީނަށް ޙަމަލާ ދިނުމަށް ޔަހޫދީން ދައްކަމުންދާ ބަހަނާތައް ބައިނަލްއަޤްވާމީ ދުނިޔޭގެ ކުރިމަތީގައި ދިފާޢުކުރުމަށް އުނދަގޫވަމުންނެވެ

ގިނަ ޤައުމުތަކުން ދަނީ ޣައްޒާއަށް ދެމުންދާ ލާއިންސާނީ ޙަމަލާތައް ހުއްޓާލުމަށް ގޮވާލައި، އުތުރު ޣައްޒާ ހިފައިފި ނަމަ ޣައްޒާގެ ރައްޔިތުންގެ ޙާލަތު އިތުރަށް ގޯސްވާނެ ކަމުގެ އިންޒާރު ދެމުންނެެވެ. ޒައިތޫނަށް ދެމުންދާ ޙަމަލާތަކާއި، އެ ސަރަޙައްދުގައި ދިރިއުޅޭ މީހުން އެހެން ސަރަޙައްދުތަކަށް ދިޔުމަށް މަޖުބޫރުކުރުމަކީ ޔަހޫދީންގެ އަނިޔާވެރިކަން ފުރިހަމައަށް ދޭހަކޮށްދޭ ޢަމަލުތަކެކެވެ.

Ad by Hajj Corporation

ޒައިތޫނުގައި ފޭލިގެތައް ޖަހައިގެން މީހުން ދިރިއުޅޭ ގާތްގަނޑަކަށް 11 ވަރަކަށް ވަގުތީ ހިޔާ ހުރެއެވެ. އެއިން ކޮންމެ ތަނެއްގައި 4،500 އެއްހާ މީހުން ދިރިއުޅެއެވެ. މި އެންމެން ދިިރިއުޅެނީ އެންމެ 3.2 އަކަކިލޯމީޓަރުގެ ސަރަޙައްދެއްގައެވެ. އެއީ ޢުދުވާނުގެ ކުރިން މީހުން ދިރިއުޅެމުންދިޔަ ސަރަޙައްދުގެ އެންމެ 32 އިންސައްތައެވެ.

ޢުދުވާން ފެށި ދުވަސްވަރު ޔަހޫދީން ވަނީ ޒައިތޫންގެ އެތެރޭގައި އަދި ވަށައިގެންވާ ބައެއް ސަރަޙައްދުތަކުގައި ހަންދަގުތައް ކޮނެ، އެއީ ބަފަރު ޒޯންތަކުގެ ގޮތުގައި ކަނޑައަޅައިފައެވެ. ޣައްޒާ ދެ ޒޯނަކަށް ބައިކޮށްލި ނެތުރާޒިމް ކޮރިޑޯ ވެސް ޤާއިމުކޮށްފައި ވަނީ އެ ސަރައްޙައްދުގައެވެ.

ފަލަސްޠީނުގެ ޣައްޒާއަށް ޔަހޫދީން ދެމުންދާ ޢުދުވާނީ ޙަމަލާތައް އެ ސަހަރުގެ އުތުރަށް ފުޅާކޮށް، އެ ސަރަޙައްދުގައި ތިބި ފަލަސްޠީނުގެ ރައްޔިތުން ދެކުނުގެ ސަރަޙައްދުތަކަށް ދިޔުމަށް މަޖުބޫރުކުރާނެ ކަމަށް ޔަހޫދީން އިޢުލާނުކުރި ފަހުން، ޣައްޒާ ސިޓީގެ ޒައިތޫން އަވަށުގައި ޖަހާފައިވާ ފޭލިގެތަކަށް ޔަހޫދީން ވަނީ ޙަމަލާ ދޭން ފަށާފައެވެ.

އެނގިފައިވާ ގޮތުގައި އޮގަސްޓު މަހުގެ 14ވަނަ ދުވަހުން ފެށިގެން ޒައިތޫނަށް ޔަހޫދީން ދެމުންދާ ވައިގެ ޙަމަލާތައް ވަނީ ވަރަށް ބޮޑަށް އިތުރުކޮށްފައެވެ. އެ ޙަމަލާތައް ގިނަ ފަހަރަށް އަމާޒު ވަނީ ގެދޮރު ގެއްލިފައިވާ ފަލަސްޠީނުގެ ރައްޔިތުން ފޭލިގެތަކުގައި ދިރިއުޅޭ ސަރަޙައްދަށް ކަމަށް ވެއެވެ. އެއާއެކު އެ ސަރަޙައްދަުގައި ދިރިއުޅޭ އެތައް ހާސް ބަޔަކަށް ވަނީ ފޭލިގެތައް ނަގައި، ދެކުނުގެ ސަރަޙައްދުތަކަށް ދިޔުމަށް މަޖުބޫރުވެފައެވެ. ފާއިތުވި ދުވަސްތަކުގެ މަތިން ނަގާފައިވާ ސެޓެލައިޓް ފޮޓޮއިން އެކަން ޔަޤީންވެއެވެ.

އދގެ އިންސާނީ ޙައްޤުތަކާބެހޭ އޮފީހުގެ ތަރުޖަމާނު ތަމީން އަލް ޚީތާން ނޫސްވެރިންނަށް ވިދާޅުވީ، ޣައްޒާއަށް އެހީ ވެއްދުމުގެ ފުރުޞަތު ޔަހޫދީން އަދިވެސް ވަރަށް ބޮޑަށް ހިފަހައްޓާފައި އޮތުމުގެ ސަބަބުން، ޣައްޒާގެ ރައްޔިތުން ހައިހޫނުކަން ފިލުވަން ބޭނުންވާ މިންވަރާ ގާތަށް ވެސް ކާބޯތަކެތި ފޯރުކޮށްނުދެވޭ ކަމަށެވެ.

މުޅި ޣައްޒާ ބަނޑަށްޖެހި، އެތައް ހާސް ރައްޔިތުން ހައިހޫނުކަން ތަޙައްމަލުކުރަމުންދަނީ، ޣައްޒާއަށް އެހީ ވެއްދުމަށް ޔަހޫދީން ގަސްދުގައި ހުރަސްއަޅަމުންދާތީ ކަމަށް އޭނާ ވިދާޅުވިއެވެ. ފަލަސްޠީނުގެ ޣައްޒާއަށް ޔަހޫދީން ޢުދުވާނީ ޙަމަލާތައް ދޭން ފެށިފަހުން ދެ އަހަރު ފުރެން ގާތްވެފައިވާއިރު، ޔަހޫދީން އަދިވެސް ދަނީ ޣައްޒާއަށް އެހީގެ ސާމާނާއި ކާބޯތަކެތި ވެއްދުމަށް އިންތިހާއަށް ދަތިކުރަމުންނެވެ.

މި އަހަރުގެ މާރޗު މަހާއި މެއި މަހުގެ މެދުތެރެއާ ހަމައަށް ޔަހޫދީން ވަނީ ޣައްޒާއަށް އެއްވެސް މިންވަރަކަށް އެހީގެ ސާމާނު ނުވެއްދޭނޭހެން ހުރިހާ މަގުތަކެއް ބަންދުކޮށްފައެވެ. އެއާއެކު ކާބޯތަކެއްޗާއި ފެނާއި އިންސާނީ އެހީ އެއްވެސް ވަރަކަށް އެ ސަހަރަށް ވެއްދިފައެއް ނުވެއެވެ. އޭގެ ސަބަބުން ޣައްޒާއިން ވަނީ އެއްކޮށްހެން ކާބޯތަކެތި ހުސްވެފައެވެ.