މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭޝަން ބިލާ ގުޅިގެން އިހުތިޖާޖު ކުރާ ފަރާތްތަކާ ދެކޮޅަށް ހަމަނުޖެހުން ހިންގުމަށް ހިތްވަރުދޭ ގޮތަށް ސޯޝަލް މީޑިއާގައި ޕޯސްޓްތަކެއް ކުރި މީހަކު ފުލުހުން ހައްޔަރުކޮށްފިއެވެ.

ދިވެހި ފުލުހުންގެ ޚިދުމަތުން މައުލޫމާތު ދެއްވި ގޮތުގައި، ސޯޝަލް މީޑިއާ ޕްލެޓްފޯމް "އެކްސް" ގައި މިފަދަ ޕޯސްޓްތަކެއް ކުރި ކަމުގެ ތުހުމަތުގައި ހައްޔަރުކޮށްފައި ވަނީ ސ. ހިތަދޫ / އަތަމާވިލާ، އަލީ އާނިމް މުފީދު (29 އަހަރު) އެވެ.

Ad by Hajj Corporation

އާނިމް ހައްޔަރުކޮށްފައި ވަނީ 2025 އޯގަސްޓް 20 ވަނަ ދުވަހުގެ ރޭ ކޯޓު އަމުރެއްގެ ދަށުންނެވެ.

މި މައްސަލައިގެ ތަހުގީގު ފުލުހުން ދަނީ ކުރިއަށް ގެންދަމުންނެވެ.

 ''މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަން ބިލު'' އަކީ ތުޅާދޫ ދާއިރާގެ މިނިވަން މެންބަރު އަބްދުލްހަންނާނު އަބޫބަކުރު މަޖިލީހަށް ހުށަހަޅުއްވާފައިވާ ބިލެކެވެ. އެ ބިލު ހުށަހެޅުއްވި ހަންނާން ވިދާޅުވެފައިވާ ގޮތުގައި ބިލަކީ ރާއްޖޭގެ މީޑިއާ ބާރުވެރިކުރުމުގެ މަޤްޞަދުގައި އޭނާ ހުށަހަޅުއްވާފައިވާ ބިލެކެވެ. އަދި މީޑިއާތަކަށް ފުރިހަމަ ބާރާއި އިމްތިޔާޒުތަކާއި ޙައްޤުތައް ލިބިދީ، ތެދު ޚަބަރު ފެތުރުމަށް މި ބިލުން މަގުފަހިކޮށްދީފައިވާކަމަށް ވިދާޅުވެ، އެ ބިލަށް އެއްބާރުލުން ދިނުމަށް އޭނާ ވަނީ އެދިވަޑައިގެންފައެވެ.