ކަރަންޓުގެ މަސައްކަތް ނިމޭނެކަމަށް ކުރިން ލަފާކުރެވިފައިވާ ގަޑީގެ ކުރިން މަސައްކަތް ނިންމާލައި، އަލުން ކަރަންޓު ދެވިފައިވަނީ ސްޓެލްކޯގެ ހިދުމަތްތެރި އިންޖީނިއަރުންނާއި ޓެކްނީޝަނުންގެ ޤާބިލްކަމާއި ހީވާގިކަމުން ކަމަށް އެކުންފުނީގެ މެނޭޖިންގ ޑިރެކްޓަރ ހުސެއިން ފަހުމީ ވިދާޅުވެއްޖެއެވެ.

ސްޓެލްކޯއިން ބުނީ، ހުޅުމާލޭގައި ހުންނަ 50 މެގަވޮޓްގެ ބޮޑު އިންޖީނުގޭގެ ހުރިހާ ޖަނަރޭޓަރުތަކެއް ނިއްވާލުމާއި ގުޅިގެން މާލެއާއި ހުޅުމާލެއަށް ކަރަންޓު ފޯރުކޮށްދިނުމުގައި ލޯޑް ޝެޑަކަށް ދިޔުމުންކަމަށާއި، އެގޮތުން ކޮންޓްރޯލް ކުރެވިގެން ކަރަންޓު ބޭނުންކުރާ ނިސްބަތް އެ ގަޑިތަކުގައި މަދުވާހެނެހެން ހުރިހާ ޖަނަރޭޓަރުތަކެއް ހުޅުމާލޭ އިންޖީނުގޭގައި ނިއްވާލަންޖެހުނީ، ކޮންމެހެން ކުރަންޖެހޭ މަސައްކަތެއް ކުރުމަށްކަމަށެވެ.

Ad by Hajj Corporation

ފަހުމީ މިކަމާއި ގުޅިގެން އެކްސްގައި ކުރި ޕޯސްޓުގައި ވިދާޅުވީ މިއަދު ހުޅުމާލޭގެ 50 މެގަވޮޓް އިންޖީނުގެ ވަގުތީގޮތުން ހުއްޓާލައި، މުހިންމު މެއިންޓަނަންސް މަސައްކަތެއް ކުރިއަށް ގެންގޮސްފައިވާކަމަށާއި، މި މަސައްކަތް ނިމުމާއެކު، މިއަދު ހެނދުނު 08:43 ގައި ސްޓެލްކޯއިން ވަނީ މާލެ އަދި ހުޅުމާލޭގެ ހުރިހާ ސަރަހައްދުތަކަށް ކަރަންޓުގެ ޚިދުމަތް އަލުން ފޯރުކޮށްދީފައިކަމަށެވެ. ކަރަންޓުގެ މަސައްކަތް ނިމޭނެކަމަށް ކުރިން ލަފާކުރެވިފައިވާ ގަޑީގެ ކުރިން މަސައްކަތް ނިންމާލައި، އަލުން ކަރަންޓު ދެވިފައިވަނީ ސްޓެލްކޯގެ ހިދުމަތްތެރި އިންޖީނިއަރުންނާއި ޓެކްނީޝަނުންގެ ޤާބިލްކަމާއި ހީވާގިކަމުން ކަމަށް ފަހުމީ ފާހަގަ ކުރެއްވިއެވެ.

މީގެ އިތުރުން، މިކާމިޔާބީ ހާސިލްކުރެވުނީ މަސައްކަތުގެ އަހުލާގާއި، އެ މަސައްކަތަށް އޮންނަ ލޯތްބާއި، ރައްޔިތުންނަށާއި ގައުމަށް ހިދުމަތްކުރުމުގެ މަތިވެރި ރޫހު މުވައްޒަފުން ކިބައިގައި ހުރުމުން ކަމަށް ފަހުމީ ވިދާޅުވިއެވެ. އެހެންކަމުން، މި މަސައްކަތުގައި ބައިވެރިވި މުވައްޒަފުންނަށް ފަހުމީ ވަނީ ޝުކުރުއަދާކުރައްވާފައެވެ.

އަދި މިފަދަ ކޮންމެ ދަނޑިވަޅެއްގައި ގްރޭޓަރ މާލެ ސަރަހައްދުގެ ކަސްޓަމަރުންގެ ފަރާތުން ލިބެމުންދާ އެއްބާރުލުން ފާހަގަކޮށް ފަހުމީ ވަނީ ޝުކުރު އަދާކުރައްވާފައެވެ.

ހުޅުމާލޭގައި ހުންނަ 50 މެގަވޮޓްގެ އިންޖީނުގޭގައި 6 ޖަނަރޭޓަރު ހުރެއެވެ. މިއީ 2019 ވަނަ އަހަރު ބޭނުންކުރަން ފެށި، އިންޖީނުގެއެވެ.