ޣައްޒާގެ ވަދާޢީ ފެނިލުން: އެންމެން ބަނޑަށް މަރުވަނީ
23 އޯގަސްޓު 2025 - 11:13

ފަލަސްޠީނުގެ ޣައްޒާގައި ޢާންމުވެފައިވާ ބަނޑުހައިހޫނުކަމެއް ފެތުރެމުންދާ ކަމަށް ބަނޑުހައިހޫނުކަން ވަޒަންކުރާ ބައިނަލްއަޤްވާމީ ޖަމްޢިއްޔާއަކުން ފުރަތަމަ ފަހަރަށް ރަސްމީކޮށް ކަނޑައަޅައިފިއެވެ.
ދަ އިންޓަގްރެޓެޑް ފުޑް ސެކިއުރިޓީ ފޭސް ކްލެސިފިކޭޝަން، އައިޕީސީން ބުނީ ޣައްޒާގެ އުތުރުގެ ސަޙަރައްދުތަކުގައި އޮތީ ޢާންމުވެފައިވާ ބަނޑުހައިހޫނުކަމެއްގެ ޙާލަތު ކަމަށާއި، ސެޕްޓެމްބަރު މަހުގެ ނިޔަލަށް ޣައްޒާގެ މެދުތެރޭ އަދި ދެކުނުގެ ސަރަޙައްދުތަކަށް މި ޙާލަތު ފެތުރޭނެ ކަމަަށް ބެލެވޭ ކަމަށެވެ.
ހިނގަމުންދާ އޮގަސްޓު މަހުގެ މެދުތެރެއިން ފެށިގެން ސެޕްޓެމްބަރު މަހުގެ ނިޔަލަށް ޣައްޒާގެ ބަނޑުހައިހޫނުކަމުގެ ޙާލަތު އިތުރަށް ގޯސްވާނެ ކަމަށް ވެސް އައިޕީސީން ބުނެފައިވެއެވެ. އެ ގޮތުން ޣައްޒާގެ މެދުތެރޭ ސަރަޙައްދެއް ކަމަށްވާ ދީރުލް ބަލާޙްއާއި ދެކުނުގައި އޮންނަ ޚާން ޔޫނިސްއަށް ޢާންމުވެފައިވާ ބަނޑުހައިހޫނުކަމުގެ ޙާލަތު ފެތުރޭނެ ކަމަށް އެ ޖަމްޢިއްޔާއިން ބުނެފައިވެއެވެ.
ސެޕްޓެމްބަރު މަހުގެ ނިޔަލަށް ޣައްޒާގެ ޖުމްލަ އާބާދީގެ ތިންބައިކުޅަ އެއްބައި، ނުވަތަ 641،000 މީހުންނަކީ އައިޕީސީ ފޭސް 5ގެ ޙާލަތުގައި ތިބޭނެ މީހުންނަށް ވާނެ ކަމަށް އައިޕީސީން އިންޒާރުދީފައިވެއެވެ. އަދި ފޭސް4ގެ ޙާލަތުގައި ތިބި މީހުންގެ ޢަދަދު 1.14 މިލިޔަނަށް ނުވަތަ އާބާދީގެ 58 އިންސައްތައަށް އިތުރުވާނެ ކަމަށް ވެސް އެ ޖަމްޢިއްޔާއިން ބުނެފައިވެއެވެ. މިއީ 21 ޖަމްޢިއްޔާއެއްގެ ބައިވެރިވުމާއެކު އައިޕީސީން ޣާއްޒާގެ ބަނޑުހައިހޫނުކަމުގެ ޙާލަތު ބަލަން ފެށީއްސުރެ ޣައްޒާގެ ޙާލަތު އެންމެ ގޯސްވެފައިވާ މިންވަރެވެ.

Ad by Hajj Corporation
ފަލަސްޠީނުގެ ޣައްޒާއަށް ޔަހޫދީން ޢުދުވާނީ ޙަމަލާތައް ދޭން ފަށާފައި ވަނީ 2023ވަނަ އަހަރުގެ އޮކްޓޯބަރު މަހުގެ 7ވަނަ ދުވަހުއެވެ. ޢުދުވާނަށް ދެ އަހަރު ފުރެން ގާތްވެފައިވާއިރު، ޔަހޫދީން އަދިވެސް ދަނީ ޣައްޒާއަށް އެހީގެ ސާމާނާއި ކާބޯތަކެތި ވެއްދުމަށް އިންތިހާއަށް ދަތިކުރަމުންނެވެ. އެއާއެކު ކާބޯތަކެތި ނުލިބި ބަނޑަށް ޖެހުމުގެ ސަބަބުން ފަލަސްޠީނުގެ ޣައްޒާގައި ޝަހީދުވާ މީހުންގެ ޢަދަދު ދަނީ ދުވަހެއް ދުވަހަކަށް އިތުރުވަމުންނެވެ. އޮގަސްޓު މަހުގެ 21ވަނަ ދުވަހާ ހަމައަށް ޣައްޒާގައި ބަނޑުހައިހޫނުކަމުގެ ސަބަބުން 271 މީހުން ޝަހީދުވެފައިވެއެވެ. އޭގެ ތެރޭގައި 112 ކުޑަކުދިން ވެސް ހިމެނެއެވެ.
ޢާންމުވެފައިވާ ބަނޑުހައިހޫނުކަމަކީ ހަމައެކަނި ކާބޯތަކެއްޗާ ގުޅުންހުރި ޙާލަތެެއް ނޫން ކަމަށާއި އެއީ އިންސާނުން ދިރިހުރުމަށް ބޭނުންވާ މުހިންމު ނިޒާމުތައް ގަސްތުގައި ފުނޑުފުނޑުކޮށްލުން ކަމަށް އޭނާ ވިދާޅުވިއެވެ. ޣައްޒާގެ ރައްޔިތުން ބަނޑަށް ޖެހިފައިވާ ކަމަށާއި ކުޑަކުދިން މަރުވަމުންދާ ކަމަށް ފާހަގަކުރައްވައި ގުތޭޙެޝް ވިދާޅުވީ ފިޔަވަޅު އެޅުމުގެ ވާޖިބު އެބައެއްގެ ބޮލުގައި އެޅޭ މީހުންނަށް އެދެވޭ ފިޔަވަޅެއް ނޭޅޭ ކަމަށެވެ.
އިސްތިއުމާރީ ބާރުގެ ގޮތުގައި ޔަހޫދީން އޮވެ، ޣައްޒާގެ ރައްޔިތުން ބެލެހެއްޓުމަށް ޔަހޫދީންގެ މައްޗަށް ބައިނަލްއަޤްވާމީ ޤާނޫނުގެ ދަށުން ކޮންމެހެން ލާޒިމުވާ ކަންތައްތަކެއް ހުރެއެވެ. އޭގެ ތެރޭގައި ޣައްޒާގެ އާބާދީއަށް ބޭނުންވާ ކާބޯތަކެއްޗާއި ބޭސް ފޯރުކޮށްދިނުން ހިމެނޭ ހިމެނެއެވެ. ޣައްޒާގައި މިހާރު އޮތް ޙާލަތު އެގޮތުގައި ދެމި އޮތުމަށް ފުރުޞަތު ދެވިގެން ނުވާނެ ކަމަށާއި، ބަހަނާ ދެއްކުމެއް ނެތި ޔަހޫދީންގެ ޢަމަލުތައް ކުށްވެރިކޮށް އަދަބުދީ، ފިޔަވަޅު އަޅަންވީ ވަގުތަކީ މިއީ ކަމަށް އެތައް ބަޔަކު އަންނަނީ ބުނަމުންނެވެ.