ގޭންގުތައް ހުއްޓުވައި، ނައްތާލުމުގެ މަސައްކަތް ފުލުހުން ފަށައިފި
26 އޯގަސްޓު 2025 - 10:57

ރާވައި އިންތިޒާމްކޮށްގެން ކުށްތައް ކުރުމަށް ހަދާފައިވާ "ގޭންގުތައް" ނުވަތަ ކުށްކުރާ ގުރޫޕުތައް ހުއްޓުވައި، ނައްތާލުމުގެ މަސައްކަތް ދިވެހި ފުލުހުންގެ ޚިދުމަތުން ފަށައިފިއެވެ.
ސަރުކާރުން ރައްޔިތުންގެ މަޖިލީހަށް ހުށަހެޅި ގޭންގު ކުށްތައް މަނާ ކުރުމުގެ ބިލު، ރައީސުލުްޖުމްހޫރިއްޔާ ޑރ. މުހައްމަދު މުއިއްޒު ތަސްދީގުކުރެއްވީ މެއި މަހުގެ 25 ވަނަ ދުވަހުއެވެ. އެ ޤާނޫނަށް އަމަލުކުރަން ފެށީ މި ހިނގާ އޮގަސްޓު މަހުގެ 25 ވަނަ ދުވަހުއެވެ.

Ad by Hajj Corporation
ރާއްޖެއަށް ދިމާވެފައިވާ އެންމެ ބޮޑު އެއް މައްސަލަކަމުގައިވާ ގޭންގު ކުށްތައް ހުއްޓުވައި، ގޭންގުތައް ނައްތާލުމަށް ނިކުތްކަން ހާމަކޮށް ފުލުހުން ނެރުނު ބަޔާނެއްގައި ބުނީ، މި ޤާނޫނަށް އަމަލުކުރަން ފެށުމާއެކު، ޤާނޫނު ތަންފީޒުކުރުމަށްޓަކައި އެ ޚިދުމަތުގެ ފަރާތުން ހާއްސަ މަސައްކަތްތަކެއް ކުރަމުންދާ ކަމަށެވެ.
އެގޮތުން، ރާއްޖޭގެ ހައިކޯޓު މެދުވެރިކޮށް، އިންތިޒާމުވެފައިވާ ކުށްކުރާ ގުރޫޕުތައް ކަނޑައެޅުމާއި، އެފަދަ ގްރޫޕްތަކަށް ނިސްބަތްވާ ފަރާތްތަކުގެ މައްޗަށް، މޮނިޓަރކޮށް ކޮންޓްރޯލްކުރުމުގެ އަމުރު ނެރުމާއި އެފަދަ ގްރޫޕްތަކުން ކުރާ އަނިޔާވެރި އަމަލުތަކުން ކުޑަކުދިން ރައްކާތެރިކުރުމަށް އެކުދިންގެ މައްޗަށް ރައްކާތެރިކުރުމުގެ އަމުރު ނެރުމަށް، ފުލުހުންގެ ފަރާތުން ޕްރޮސެކިއުޓަރ ޖެނެރަލްގެ އޮފީހަށް ހުށަހެޅުމުގެ ކަންކަން ކުރިއަށް ގެންދާނެކަމަށް މި ބަޔާނުގައި ބުނެފައިވެއެވެ.
ހަމައެއާއެކު، އިންތިޒާމުވެގެން ކުށްކުރާ ގްރޫޕްތަކަށް ނިސްބަތްވާ މީހުންގެ ނުހައްގު މުއްސަނދިކަމުގެ މައްސަލަތައް ތަހުގީގުކޮށް، އެ މީހުން ނުހައްގުން ހޯދާފައިވާ މުދާ ދައުލަތަށސް ނެގުމުގެ މަސައްކަތާއި، އިންތިޒާމުވެފައިވާ ކުށްކުރާ ގްރޫޕްތަކަށް ކުޑަކުދިންނާއި ޒުވާނުން ރެކްރޫޓުކުރާ މައްސަލަތަކަށް ހާއްސަ ސަމާލުކަމެއް ދީގެން ތަހުގީގުކުރަމުންދާނެ ކަމަށް ވެސް ފުލުހުންގެ ބަޔާނުގައި ބުނެފައިވެއެވެ.
މީގެއިތުރުން، ކުށްކުރާ ގްރޫޕްތައް އެއްވާ ސަރަހައްދުތަކުގައި ފުލުހުންގެ ވިޒިބިލިޓީ އިތުރުކޮށް، އެ ސަރަހައްދުތަކުގައި ތިބޭ ފަރާތްތައް ބަލައި ފާސްކުރުމުގެ މަސައްކަތާއި އިންތިޒާމުވެގެން ހިންގާ ކުށްކުރުމަށް އަމިއްލަ ތަންތަން ބޭނުންކުރަމުންދާތީ، އެފަދަ ތަންތަން ރެއިޑްކޮށް، ބަލައި ފާސްކުރުމުގެ މަސައްކަތް ވެސް ކުރަމުންދާނެކަމަށް ފުލުހުން ބުނެފައިވެއެވެ.
މިއީ މުޅީ މުޖުތަމައުގެ ސަލާމަތާއި ރައްކާތެރިކަމަށް އަޅަމުންދާނެ ފިޔަވަޅުތަކެއްކަން ފާހަގަކޮށް، މިފަދަ ކަންކަމުގައި އާންމުންގެ ފަރާތުން ލިބެމުންދާ އެއްބާރުލުމަށް ފުލުހުން ވަނީ ޝުކުރުއަދާކޮށްފައެވެ.
ރާއްޖޭގެ ކުށުގެ މާހައުލުގައި ހަރަކާތްތެރިވަމުންދާ ގޭންގުތައް ހުއްޓުވުމަށް 2010 ވަނަ އަހަރުވެސް ޤާނޫނެއް ގެނައި ކަމަށާއި ނަމަވެސް މިޤާނޫނުގެ ތެރެއިން ދިމާވި އެންމެ ބޮޑު މައްސަލައަކީ ޤާނޫނުގައި ގޭންގުތަކަކީ ކޮބައިކަން ބުނެދެވިފައި ނުވުން ކަމަށް ދާޚިލީ ސަލާމަތާއި ފަންނިއްޔާތާއި ބެހޭ ވަޒީރު އަލީ އިހުސާން ވަނީ މީގެކުރިން ވިދާޅުވެފައެވެ.
މިހާރު ތަސްދީގުކޮށް، އަމަލުކުރަން ފަށާފައިވާ ޤާނޫނުން، ގޭންގުތަކަކީ ކޮބައިކަން ކަނޑައަޅައި، ގޭންގެއްގެ ތެރޭގައި ހިމެނޭ މީހެއްކަން ކަނޑައެޅުމާއި އަދި ކުށްތައް ހުއްޓުވުމުގެ މުހިންމު އިޖުރާޢަތްތައް ކަނޑައަޅާނެއެވެ. މީގެއިތުރުން ނުހައްޤު މުއްސަނދިކަން ހޯދުމާއި، ގޭންގު ކުށްތަކުގައި ކުޑަކުދިން ޝާމިލްކުރުމުގެ މައްސަލައަށްވެސް މި ޤާނޫނުގެ ތެރެއި ހައްލުތަކެއް ހޯދުމަށް ވަނީ ހިމަނާފައެވެ.
ގޭންގް ކުށްތައް ހުއްޓުވުމަށްޓަކައި ސަރުކާރުން މިދިޔަ 18 މަސްދުވަހުގެ ތެރޭގައި މުހިންމު މަސައްކަތްތަކެއް ވަނީ ކޮށްފައެެވެ. އެގޮތުން، ގޭންގް ކްރައިމް އެންފޯސްމެންޓްގެ ނަމުގައި ވަކި ވިންގެއް ދިވެހި ފުލުހުންގެ ހިދުމަތުގައި 2024 ވަނަ އަހަރު ޖުލައި 1 ވަނަ ދުވަހު ވަނީ ގާއިމު ކޮށްފައެވެ. އެގޮތުން ގޭންގު ކުށްތަކާ ގުޅޭ މައްސަލަތަކުގައި މިދިޔަ 18 މަސްދުވަހު، ގްރޫޕުތައް އެއްވެ އުޅޭ ސަރަހައްދުތަކުން 31،511 މީހުން ހުއްޓުވައި ސުވާލުކޮށް އެކި މައްސަލަތަކުގައި 180 މީހަކު ހައްޔަރުކުރެވި، އޭގެ ތެރެއިން 83 މީހަކާ ދެކޮޅަށް ދައުވާ އުފުލާފައިވެއެވެ. މި މުއްދަތަށް ބަލާއިރު، ގޭންގު މާރާމާރީގައި، އެއްވެސް މީހެއްގެ ފުރާނަ ގެއްލިގޮސްފައެއްނުވެއެވެ.