ރައްކާތެރިކަމަށް ކަނޑައަޅާފައިވާ ޚާން ޔޫނިސްގެ އަލް-މަވާސީ ސަރަޙައްދުގެ ފޭލިގެ ތަކަށް މިއަދު ދިން ހަމަލާތަކެއްގައި 5 މީހަކު ޝަހީދުކޮށްލައިފިއެވެ.

މަވާސީ ސަރަޙައްދުގެ ފޭލިގެތަކުގައި ފަތިހު މީހުން ނިދާފައި ތިބި ދަނޑިވަޅާ ދިމާކޮށް ދިން މިހަމަލާގައި 5 މީހަކު ޝަހީދުވެފައިވާއިރު މުޅި ޣައްޒާގެ އެކި ސަރަހައްދުތަކުން މިއަދު އެކަނިވެސް ވަނީ 21 މީހަކު ޝަހީދުކޮށްލާފައެވެ.

Ad by Hajj Corporation

ހަނގުރާމަ ފެށިފަހުން ޔަހުދީން ހިންގަމުން އަންނަ ލާއިންސާނީ އުދުވާނުތަކުގެ ތެރެއިން ރައްކާތެރިކަމަށް ކަނޑައަޅާފައިވާ ޚާން ޔޫނިސްގެ އަލް-މަވާސީ ސަރަޙައްދުގެ ފޭލިގެ ތަކަށް ތަކުރާރުކޮށް އަންނަނީ ހަމަލާތައް ދެމުންނެވެ.

މިހަމަލާތަކުގައި ގިނައިން ޝަހީދުވެފައިވަނީ ކުޑަކުދިންނެވެ.

2023 ވަނަ އަހަރުގެ ޑިސެމްބަރު މަހު އިސްރާއީލުން އަލް-މަވާސީ ރައްކާތެރި ސަރަޙައްދެއްގެ ގޮތުގައި އިއުލާނުކުރުމާ ގުޅިގެން ޔަހޫދީންގެ އަނިޔާވެރިކަމުން ސަލާމަތްވުމަށްޓަކައި 2000 އެއްހައި ރައްޔިތުން ދަނީ ހިޔާވަހިކަން ހޯދަމުންނެވެ.

މިނިވަން ދައުލަތެއް ޤާއިމުކޮށް، މިނިވަން ކަމާ އެކު ދިރިއުޅުމުގެ ފުރުޞަތު ފަލަސްޠީނުގެ ރައްޔިތުންނަށް ނުދޭނެ ކަމުގައި ބުނެ ސަހުޔޫނީ ދައުލަތުން ޣައްޒާގައި ހިންގާ ގަތުލުއާއްމު ވަރުގަދަކުރަމުންދާއިރު ޣައްޒާއަށް އިސްރާއީލުން ދެމުންދާ ހަމަލާތަކުގައި މިހާތަނަށް 62,966 އަށްވުރެ ގިނަ މީހުން ޝަހީދުވެފައިވާއިރު، 159,266 މީހުން ޒަޚަމްވެފައިވެއެވެ.