ދިވެހީންގެ މުސްތަޤްބަލުގެ އުންމީދުތަކުގައި ހަގީގީ ކުލަ ޖެއްސުމުގައި އިންޖިނޭރުންގެ ދައުރު ވަރަށް ބޮޑުކަމަށް ރައީސް ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.

މިއަދު ފާހަގަކުރެވޭ ދިވެހިރާއްޖޭގެ އިންޖިނޭރުންގެ ދުވަހުގެ މުނާސަބަތުގައި މީސްމީޑިއާގައި ކުރެއްވި ޕޯސްޓެއްގައި އެމަނިކުފާނު ވިދާޅުވެފައިވާ ގޮތުގައި، އިންޖިނޭރުކަމަކީ ހަމައެކަނި ވަޒީފާއެއް ނޫނެވެ. އެއީ ޤައުމު ބިނާކުރުމަށާއި އިންސާނިއްޔަތަށްޓަކައި ކޮށްދެވޭ ވަރަށް އަގުހުރި ޚިދުމަތެކެވެ.

Ad by Hajj Corporation

 "ޢިލްމާއި ޙިލްމާއި ދުރުވިސްނުމުގެ ބޭނުން ހިފަންޖެހޭ ޚާއްޞަ ހުނަރެއް. ދިވެހީންގެ މުސްތަޤްބަލުގެ އުންމީދުތަކުގައި ހަގީގީ ކުލަ ޖެއްސުމުގައި، އިންޖިނޭރުންގެ ދައުރު ވަރަށް ބޮޑު" ރައީސް ވިދާޅުވިއެވެ.

ރާއްޖޭގައި ޤައުމީ ފެންވަރުގައި އިންޖިނޭރުންގެ ދުވަހެއް ފާހަގަކުރަން ނިންމަވައި، އޯގަސްޓް 30 ވަނަ ދުވަހަކީ ދިވެހިރާއްޖޭގެ އިންޖިނޭރުންގެ ދުވަސް ކަމުގައި ކަނޑައަޅުއްވާފައިވަނީ ރައީސް މުޢިއްޒުގެ ވެރިކަމުގައެވެ. މިގޮތުންކޮންމެ އަހަރެއްގެ އޮގަސްޓު މަހުގެ 30 ވަނަ ދުވަހަކީ "ދިވެހިރާއްޖޭގެ އިންޖިނޭރުންގެ ދުވަސް" ކަމުގައި ރައީސް މުޢިއްޒު ވަނީ ހަމަޖައްސަވާފައެވެ.

އިންޖިނޭރުންގެ ދުވަހުގެ ގޮތުގައި އޮގަސްޓު 30 ހަމަޖެއްސެވި ސަބަބަކީ، ރާއްޖޭގެ ތާރީޚުގައި މިހާތަނަށް ހިންގުނު އެންމެ ބިޔަ އުމްރާނީ ތަރައްޤީގެ މަޝްރޫޢު ކަމުގައިވާ ސިނަމާލެ ބްރިޖު އިފްތިތާހުކުރެވުނު ދުވަހަކީވެސް އޮގަސްޓު 30 ކަމަށްވާތީއެވެ. ފާހަގަކޮށްލެވޭ ކަމަކީ، ސިނަމާލެ ބްރިޖުގެ މަސައްކަތް ކުރެވިފައިވަނީ ރައީސް މުޢިއްޒު ހައުސިންގ މިނިސްޓަރުގެ މަޤާމުގައި ހުންނެވިއިރު، އެމަނިކުފާނުގެ ބެއްލެވުމުގެ ދަށުންކަމާއި، މިއަދަކީ އެ ބްރިޖަށް 7 އަހަރު ފުރޭ ދުވަސްކަމެވެ.

މި މުނާސަބަތުގައި ރައީސް މުޢިއްޒު ވަނީ އެކި ދާއިރާތަކުގައި މަސައްކަތްކުރައްވާ އަދި ކުރެއްވި ހީވާގި ދިވެހި އިންޖިނޭރުންނަށް ތަހުނިޔާ ފޮނުއްވާފައެވެ.