ޕްރޮމޯޝަނަލް ފެއާއެއްގެ ދަށުން ރާއްޖޭގެ ގައުމީ އެއާލައިން، މޯލްޑިވިއަންއިން ޗައިނާއަށް ކުރާ ދަތުރުތަކަށް ހާއްސަ އަގުތަކެއް ހަމަޖައްސައިފިއެވެ.

ގައުމީ އެއާލައިނުން ޝަންހާއީ، ޗެންގްދޫ އަދި ބެއިޖިންއަށް ސީދާ ދަތުރުތައް ކުރެއެވެ.

Ad by Hajj Corporation

 ޕްރޮމޯޝަނަލް ފެއާގެ ދަށުން ބެއިޖިންގ އާއި ޝަންހާއީއަށް ކުރާ ދަތުރުތަކުގެ ދެކޮޅު ޓިކެޓުގެ ފެށޭ އަގަކީ 499 ޑޮލަރެވެ. ޗެންޑޫއަށް ކުރާ ދަތުރުތަކުގެ ދެކޮޅު ޓިކެޓް އަގަކީ 449 ޑޮލަރެވެ.

މޯލްޑިވިއަންގެ ހާއްސަ ޕްރޮމޯޝަނަލް ފެއާ އޮކްޓޯބަރު މަހުގެ 28 އިން ނޮވެމްބަރު 15 އަށް ވަނީ ހަމަޖައްސާފައެވެ. ޗައިނާއަށް ކުރާ ދަތުރުތަކަށް ދިވެހިންނަށް ހިލޭ ވިސާ ލިބޭނެއެވެ.

 ތިން ސިޓީއަށް ކުރާ ދަތުރުތަކުގެ ގަޑިތައް ތާވަލުކޮށްފައިވަނީ ޗުއްޓީ ހޭދަކުރަން ދާ އާއިލާތަކަށާއި، ވިޔަފާރި ބޭނުންތަކުގައި ދަތުރުކުރާ ފަރާތްތަކަށްވެސް އެންމެ ފަސޭހަވާނެ ގޮތަށެވެ.

މިގޮތުން، މާލެއިން ހެނދުނު ފުރައިގެން، ޗައިނާއަށް ފްލައިޓު ޖައްސާނީ ޗައިނާއަށް ހެނދުނުގެ ވަގުތުތަކުގައެވެ. ހަމައެހެންމެ، އެނބުރި ރާއްޖެއަށް އަންނަ ފްލައިޓުތައް ތާވަލުކޮށްފައިވަނީ މާލޭ ގަޑިން ހެނދުނު ވަގުތުތަކަށް ކަމަށްވާތީ، ރާއްޖޭގެ އެތެރޭގެ ދަތުރުފަތުރުގެ ޝެޑިއުލްތަކަށްވެސް ފަސޭހަވާނެއެވެ.

މޯލްޑިވިއަންގެ ފުރަތަމަ ވައިޑް ބޮޑީ އެއާކްރާފްޓްގެ ދަތުރުތައް ޗައިނާއަށް ފަށާފައިވަނީ މިދިޔަ ޖަނަވަރީ މަހުގެ ފަހުކޮޅުގައެވެ.

މޯލްޑިވިއަންގެ އެ މަތިންދާ ބޯޓަކީ އެއްވެސް ތަނަކު ނުޖައްސާ 13،000 ކިލޯމީޓަރަށް ސީދާ ދަތުރުކުރުމުގެ ކެޕޭސިޓީ ލިބިފައިވާ މަތިންދާ ބޯޓެކެވެ.