ވެލާނާ އިންޓަނޭޝަނަލް އެއާޕޯޓުގައި ދިމާވާ ކުއްލި ހާލަތްތަކުގައި ހަރަކާތްތެރިވުމަށް މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އިން ކުރިއަށް ގެންދިޔަަ ފަޔާ ފައިޓާ ކޯހުގެ 29 ވަނަ ބެޗު ނިންމާލައިފި އެވެ.

43 ދުވަހަށް ކުރިއަށް ގެންދިޔަ މި ކޯހަކީ މޯލްޑިވްސް ސިވިލް އޭވިއޭޝަން އޮތޯރިޓީ (އެމްސީއޭއޭ)ގެ އުސޫލުތަކާ އެއްގޮތަށް ކުރިއަށް ގެންދިޔަ ކޯހެއް ކަމަށާއި މި ކޯހުގައި 12 ފަރާތަކުން ބައިވެރިވެފައިވާކަމަށް އެ ކުންފުނިން މަޢުލޫމާތު ދެއެވެ.

މި ކޯހުގައި ފްލައިޓަކަށް ނުވަތަ ވެލާނާ އެއާޕޯޓުގައި އަލިފާނުގެ ހާދިސާއެއް ހިނގައިފިނަމަ އަމަލުކުރާނެ ގޮތާއި ގުޅޭގޮތުން ތަމްރީނުތައް ދީފައިވާ ކަމަށް އެމްއޭސީއެލުން ބުނެއެވެ.

މި ކޯސް ނިންމުމުގެ ރަސްމިއްޔާތުގައި އެމްއޭސީއެލްގެ ޑެޕިއުޓީ މެނޭޖިން ޑިރެކްޓަރު މުހައްމަދު ލަމްއާން ވިދާޅުވީ މި ކޯސް ފުރިހަމަކާއެކު ނިމިގެން ދިއުމުން އެނގިގެންދަނީ އެމްއޭސީއެލް އިން އިންހައުސް ޓްރެއިނިން ނިޒާމުގެ ހަރުދަނާކަން ކަމަށެވެ. އަދި ދެމެހެއްޓެނިވި ގޮތެއްގައި މުވައްޒަފުންނަށް ދޭންޖެހޭ ތަމްރީނުތައް ފޯރުކޮށްދިނުމަށްޓަކާ ކުންފުނީގެ މެނޭޖްމެންޓުން މަސައްކަތް ކުރާނެ ކަމަށް ވިދާޅުވި އެވެ.

އެމްއޭސީއެލް އިން ދާދިފަހުން ވަނީ ވީއައިއޭގައި އާ ފަޔާ ސްޓޭޝަނެއް ހުޅުވާފަ އެވެ. އާ ފަޔާ ސްޓޭޝަންގައި މުވައްޒަފުންނާއި ތަމްރީންތަކަށް އަދި ކޮންޓްރޯލް ސެންޓަރު ހިމެނޭހެން ދެ ފަންގިފިލާގެ އިމާރާތެއް ވަނީ ޤާއިމުކޮށްފައެވެ.