ސަރުކާރުގެ ގިނަ ކުންފުނިތަކަށް ބޮޑެތި ބަދަލުތަކެއް ގެނައުމަށް ވަޒީރުންގެ މަޖިލީހުން ފާސްކޮށްފިއެވެ.

ރައީސް އޮފީހުގައި މިހާރު ކުރިއަށްދާ ނޫސްވެރިންގެ ބައްދަލުވުމުގައި، އެ ބަދަލުތައް އިއުލާނުކުރެއްވީ އިގްތިސާދާ ބެހޭ ވަޒީރު މުހައްމަދު ސައީދުއެވެ.

އެގޮތުން ރީޖަނަލް އެއާޕޯޓުތައް ބަލަހައްޓާ ކުންފުނި، އާރްއޭސީއެލް އާއި މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އެއް ކުރުމަށް ސަރުކާރުން ނިންމާފައިވާއިރު، އެ ބަދަލުގެ ސަބަބުން އިތުރު އަށް އެއާޕޯޓެއް އެމްއޭސީއެލްގެ ދަށަށް ބަދަލުވާނެ ކަމަށް ވަޒީރު ވިދާޅުވިއެވެ.

އަދި ހައުސިން ޑެވެލޮޕްމަންޓް ކޯޕަރޭޝަން (އެޗްޑީސީ)ގެ ސަބްސިޑަރީ ކުންފުންޏެއްގެ ގޮތުގައި، މިދިޔަ ސަރުކާރުން އުފެއްދި ފަހި ދިރިއުޅުން ކޯޕަރޭޝަން (އެފްޑީސީ) ގެނައުމަށް ނިންމާފައިވާއިރު، މޯލްޑިވްސް ފަންޑް މެނޭޖްމެންޓް ކޯޕަރޭޝަން (އެމްއެފްއެމްސީ)އާއި ބިޒްނަސް ސެންޓާ ކޯޕަރޭޝަން (ބީސީސީ) އެއްކުރުމަށް ވެސް މަޝްވަރާކުރެވުނު ކަމުގައި ވަޒީރު ވިދާޅުވިއެވެ.

އެހެން ނަމަވެސް، ބީސީސީ މިހާރު ވެސް ހިންގާ ގޮތަށް ކުރިއަށް ގެންދާނެ ކަމުގައި ވަޒީރު ވިދާޅުވިއެވެ.

މީގެ އިތުރުން، މިދިޔަ ސަރުކާރުން އުފެއްދި އެގްރޯ ނެޓްގެ މަސައްކަތް، މޯލްޑިވްސް އިންޑަސްޓްރިއަލް ފްރީ ޒޯން ކޮމްޕެނީ (މިޑްއެފްސީ)ގެ ބައެއްގެ ގޮތުގައި ހަމަޖެއްސުމަށް ވެސް ކެބިނެޓުން ވަނީ ނިންމާފައެވެ.

އަދި ރާއްޖޭގެ ފަތުރުވެރިކަމުގައި ހަރަކާތްތެރިވާ ސަރުކާރުގެ ކުންފުނިތައް ކަމަށްވާ މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްޓީޑީސީ) އަދި މޯލްޑިވްސް އިންޓަގްރޭޓެޑް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްއައިޓީޑީސީ)ވެސް އެއްކޮށް، ރާއްޖޭގައި އިންޓަގްރޭޓެޑް ޓޫރިޒަމްގެ މަސައްކަތްތައް ކުރިއަށް ގެންދެވޭނެ ގޮތަކާ މެދު އިތުރަށް މަޝްވަރާކުރަން ވެސް ކެބިނެޓުގައި ނިންމުނު ކަމުގައި ވަޒީރު ވިދާޅުވިއެވެ.

ސަރުކާރު ހިއްސާވާ ކުންފުނިތަކަށް ބޮޑެތި ބަދަލުތަކެއް ގެނައުމަށް ކެބިނެޓުގައި މިއަދު މަޝްވަރާކުރީ، ސަރުކާރުގެ ޚަރަދު ކުޑަ ކުރުމުގެ ސިޔާސަތުގެ ދަށުން އެސްއޯއީ ރީފޯމުކުރުމަށް ސަރުކާރުން ކަނޑައަޅާފައިވާ ފިޔަވަޅުތަކުގެ ތެރެއިންނެވެ. އެ މަސައްކަތުގެ ތެރެއިން ފެނަކަ ކޯޕަރޭޝަން، އެސްޓީއޯގެ ސަބްސިޑަރީއެއްގެ ގޮތުގައި ހިންގުމަށް ވެސް ސަރުކާރުން މިހާރު ވަނީ ނިންމާފައެވެ.