ޕޯޗުގަލުން ފަލަސްތީނުގެ ދައުލަތް ރަސްމީކޮށް ބަލައިގަތުމަށް ނިންމައިފިއެވެ.

މިކަން އިއުލާނުކުރެއްވީ އެ ގައުމުގެ ޚާރިޖީ ވަޒީރު ޕައުލޯ ރަންގެލް އާދީއްތަ ދުވަހު، ނިއު ޔޯކުގައި ހުންނަ އދ. އަށް ޕޯޗުގަލްގެ ދާއިމީ މިޝަންގެ މަރުކަޒުގައި ބޭއްވި ނޫސްވެރިންގެ ބައްދަލުވުމެއްގައެވެ.

Ad by Hajj Corporation

ޚާރިޖީ ވަޒީރު ރަންގެލް ވިދާޅުވި ގޮތުގައި ފަލަސްޠީނު ދައުލަތް ގަބޫލުކުރުމަކީ ޕޯޗުގަލްގެ ޚާރިޖީ ސިޔާސަތުގެ އަސާސީ، ދެމެހެއްޓެނިވި އަދި މުހިންމު ސިޔާސަތެއް ތަންފީޒުކުރުމެވެ.

 "ދެމެހެއްޓެނިވި އަދި ޢަދުލުވެރި ސުލްޙައަކަށް ވާސިލުވުމަށް ހަމައެކަނި އޮތް މަގަކީ ދެ ދައުލަތުގެ ހައްލު" ޚާރިޖީ ވަޒީރު ޕައުލޯ ރަންގެލް ވިދާޅުވެފަވެއެވެ.

މި ބައްދަލުވުމުގައި ވާހަކަފުޅު ދައްކަވަމުން ޚާރިޖީ ވަޒީރު އިތުރަށް ފާހަގަކުރެއްވި ގޮތުގައި ހަނގުރާމަ ހުއްޓާލުމަކީ މިވަގުތު ކޮންމެހެން ބޭނުންވެފައިވާ ކަމެކެވެ.

ޚާރިޖީ ވަޒީރު ޚާއްސަ ސަމާލުކަމެއް ދެއްވައިފާހަގަކުރެއްވި ގޮތުގައި ފަލަސްޠީނު ދައުލަތް ގަބޫލުކުރުމަކުން ޣައްޒާގައި ދިމާވެފައިވާ އިންސާނީ ކާރިސާ ފޮހެވިގެނެއް ނުދާނެއެވެ.

ފާހަގަކޮށްލެވޭ ކަމަކީ ޕޯޗުގަލުން ފަލަސްޠީނު ދައުލަތް ބަލައިގަތުމުގެ މި ނިންމުން އިއުލާނުކޮށްފައިވަނީ އިނގިރޭސިވިލާތް، ކެނެޑާ އަދި އޮސްޓްރޭލިއާ ފަދަ ބޮޑެތި ގައުމުތަކާ އެކުގައި ކަމެވެ. މިއީ ފަލަސްޠީނު ދައުލަތަށް ލިބިގެންދިޔަ ވަރަށް މުހިންމު ކާމިޔާބީއެކެވެ.