ޔަހޫދީންނާއި ހަމާސްއާ ދެމެދު ކުރެވެމުންދާ ހަނގުރާމަ، ނަމެއްގައި ހުއްޓާލާފައިވީނަމަވެސް އިއްޔެވެސް ޣައްޒާގެ ދެކުނަށް އަމާޒުކޮށް ވައިގެ ހަމަލާތަކެއް ދީފައިވާކަން ޔަހޫދީން ހާމަކޮށްފިއެވެ.

ޔަހޫދީން ބުނެފައިވާގޮތުން ޚާން ޔޫނިސްއަށް އަމާޒުކޮށް ދީފައިވާ މި ހަމަލާއަކީ، ހަމާސްއިން އިސްރާއީލަށް ދިން ހަމަލާއެއްގެ ބަދަލުގައި ދިފައިވާ ހަމަލާއެކެވެ. އަދި ހަމާސްއިން ދީފައިވާ ހަމަލާގައި ޔަހޫދީންގެ ފަސް ސިފައިން ޒަޚަމްވެފައިވާ ކަމަށް ޔަހޫދީން ބުނެފައިވެއެވެ.

Ad by Hajj Corporation

ޚާން ޔޫނިސްއަށް އަމާޒުކޮށް ޔަހޫދީން ހަމަލާދީފައިވާއިރު، ޣައްޒާގައި ތިބި އަސީރުންގެ ތެރެއިން އެންމެ ފަހު މީހާގެ ހަށިގަނޑު އިއްޔެގެ ވަގުތެއްގައި ޔަހޫދީންނާ ހަވާލުކޮށްފައިވާކަން ފާހަގަކޮށްލެވެއެވެ. އަދި އެއަށްފަހު މިޞްރުގެ ސަރަހައްދަކުން، ފަލަސްޠީނު އަސީރުން ދޫކުރަން ފަށާނެކަމަށްވެސް ޔަހޫދީން ބުނެފައިވެއެވެ.

ޔަހޫދީންގެ ބޮޑުވަޒީރު ބެންޖަމިން ނަތަންޔާހޫ ބުނިގޮތުގައި ހަމާސްއިން ވަނީ ޔަހޫދީ ސިފައިންގެ ބާރުގެދަށުގައިވާ ސަރަހައްދަކަށް ވަދެގަނެ، އެމީހުންގެ ސިފައިންތަކަކަށް ހަމަލާދީ، ހަނގުރާމަ ބަދަލުކުރުން ހުއްޓާލުމުގެ އެއްބަސްވުމާ ޚިލާފުވެފައެވެ.

މީގެ ކުރިންވެސް ޔަހޫދީން، ހަމާސްއިން އެއްބަސްވުމާ ޚިލާފުވެފައިވާ ކަމަށްބުނެ ޣައްޒާއަށް ވައިގެ ހަމަލާތަކެއް ދީފައިވެއެވެ. އެގޮތުން އޮކްޓޯބަރު މަހުގެ ފަހުކޮޅު ދިން ހަމަލާތަކުގައި 104 މީހުން މަރުވެފައިވާ އިރު، ނޮވެމްބަރު މަހުގެ ފަހުކޮޅު ދިން ހަމަލާތަކުގައި 33 މީހަކު މަރުވެފައިވެއެވެ.

ހަމާސްއިން 7 އޮކްޓޯބަރު 2023 ގެ ހަމަލާގައި އަސީރުންގެ ގޮތުގައި ގެންދިޔަ އެންމެން ދޫކޮށްލުމަކީ އެންމެފަހުން ވެވިފައިވާ ހަނގުރާމަ ހުއްޓާލުމުގެ އެއްބަސްވުމުގެ ޝަރުތެކެވެ.