ށ. ކޮމަންޑޫގައި ބިންހިއްކައި އެއަރޕޯޓް ތަރައްޤީކޮށް އޮޕަރޭޓްކުރުމުގެ މަސައްކަތް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އާ އަންގާރަ ދުވަހުގެ ރޭ ހަވާލުކޮށްފިއެވެ.

މި މަޝްރޫޢުގެ އެއްބަސްވުމުގައި ސޮއިކުރެވުނީ ރައީސް ޑރ. މުޙައްމަދު މުޢިއްޒު ށ. އަތޮޅަށް ކުރައްވަމުންގެންދަވާ ދަތުރުފުޅުގެ ތެރެއިން ކޮމަންޑޫގައި ބޭއްވުނު ޚާއްސަ ރަސްމިއްޔާތެއްގައެވެ.

Ad by Hajj Corporation

މި އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ މާލީ ކަންކަމާއި ތަރައްޤީގެ ރޭވުންތެރިކަމާބެހޭ ވަޒީރު މޫސާ ޒަމީރެވެ. އަދި އެމްއޭސީއެލްގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރ އިބްރާހީމް ޝަރީފް މުޙައްމަދެވެ.

އެއްބަސްވުމުގައި ސޮއިކުރުމާއެކު، އެއަރޕޯޓަށް ބޭނުންވާ ބިން ހިއްކުމުގެ ޢަމަލީ މަސައްކަތް ވެސް ވަނީ ފަށާފައެވެ.

މި މަޝްރޫޢުގެ ދަށުން ކޮމަންޑޫގައި އެއަރޕޯޓަށް ބޭނުންވާ ބިން ހިއްކުމާއި، ރަންވޭ އެޅުމާއި، ޓާމިނަލް ޢިމާރާތް ކުރުމުގެ މަސައްކަތްތައް ކުރިއަށްދާނެއެވެ. އަދި އެއަރޕޯޓް ހިންގުމުގެ އެންމެހައި މަސައްކަތްތައްވެސް ކުރިއަށްގެންދާނީ އެމްއޭސީއެލުންނެވެ.

ފާހަގަކޮށްލެވޭ ގޮތުން، އިއްޔެ ވަނީ ށ. ބިލެތްފަހީ އެއާޕޯޓަށް ބޭނުންވާ ބިން ހިއްކުމާއި އެއަރޕޯޓް ތަރައްޤީކޮށް އޮޕަރޭޓް ކުރުމުގެ މަސައްކަތް ވެސް އެމްއޭސީއެލްއާ ހަވާލުކޮށްފައެވެ. މިހާރު ށ. އަތޮޅުގައި އޮތީ އެރަށު ވެރިރަށް ފުނަދޫގައި އޮންނަ އެއް އެއާޕޯޓެވެ.

މި ދެ އެއަރޕޯޓް ތަރައްޤީކުރުމުން ށ. އަތޮޅުގެ ދަތުރުފަތުރުގެ ނިޒާމަށް ބޮޑު ކުރިއެރުމެއް ލިބި، އެ ސަރަޙައްދުގެ އިޤްތިޞާދީ ތަރައްޤީއަށް މަގުފަހިވެގެންދާނެއެވެ.