ކަސްޓަމަރުންގެ އެކައުންޓުން ފައިސާ ނެގި މުވައްޒަފަށް ފިޔަވަޅު އަޅައި އޭގެ ބަދަލު ވާނީ ދީފައި ކަމަށް ބީއެމްއެލް އިން ބުނެފިއެވެ.

ބޭންކްގެ ކުރީގެ މުވައްޒަފެއްކަމަށްވާ އަލީ މާޒިންގެ މައްޗަށް ދައުލަތުން ހިޔާނާތުގެ ދައުވާކުރީ ބީއެމްއެލްގައި އޭނާ ވަޒީފާ އަދާ ކުރިއިރު، ކަސްޓަމަރުންގެ ހުއްދަ ނެތި އިންޓަނެޓް ބޭންކުގައި އެ މީހުން ރަޖިސްޓްރީ ކުރުމަށްފަހު އެކައުންޓްތަކުން 482،000ރ. މާޒިންގެ ކްރެޑިޓް ކާޑު ޕޭމަންޓްތަކާއި ފޮރެކްސް ޓްރާންސްއެކްޝަންތައް ހިންގުމަށް ބޭނުން ކޮށްފައިވާތީ އެވެ.

އެކަމާއި ގުޅިގެން ބީއެމްއެލް އިން މީޑިއާއަށް ފޮނުވި މެސެޖުގައި ބުނެފައިވަނީ، އެ ކަން ފާހަގަކުރެވުމާއި އެކު 2021 ވަނަ އަހަރު އެ މުވައްޒަފު ވަގުތުން އެކަހެރި ކުރިކަމަށެވެ. ބޭންކުން މި މައްސަލަ ބެލިއިރު މާޒިން ވަނީ އޭނާ އަދާކުރާ ވަޒީފާގެ ގޮތުން ލިބިފައިވާ ބާރުގެ ބޭނުން ނަހަމަ ގޮތުގައި ހިފައި ކަސްޓަމަރުންގެ އެކައުންޓުން ފައިސާ ނަގައި އަމިއްލައަށް ބޭނުންކޮށްފައިވާކަން ފާހަގަކުރެވުނުކަމަށްވެސް ބޭންކުން ވަނީ ބުނެފައެވެ.

ބީއެމްއެލް އިން ބުނީ، މި މައްސަލަ 2021 ވަނަ އަހަރުގެ ޑިސެމްބަރު މަހުގެ 7 ވަނަ ދުވަހު ފުލުހަށް އެ ބޭންކުން ހުށަހަޅާފައިވާނެ ކަމަށާއި، ކަސްޓަމަރުންގެ އެކައުންޓުން ގެއްލުނު ފައިސާ، އެ ކަސްޓަމަރުންގެ އެކައުންޓަށް ޖަމާކޮށްދީފައިވާނެ ކަމަށެވެ.

މީގެ އިތުރުން ބޭންކުގައި ހިނގާފާނެ ނުރަނގަޅު އަމަލެއް ނުވަތަ އިހުމާލެއް ދެނެގަތުމަށް ބޭންކުގެ ގަވައިދުތަކާއި އުސޫލުތައް ހަރުދަނާކޮށް އިންޓާނަލް ކޮންޓްރޯލްތައް ބޭންކުގައި ގާއިމުކޮށްފައިވާނެކަމަށާއި، އެއްވެސް މުވައްޒަފަކު ގަވައިދާ ހިލާފު އެއްވެސް އަމަލެއް ހިންގައިފި ނަމަ އެކަމެއް ތަހުގީގުކޮށް އަޅަން ޖެހޭ އެންމެ ހަރުކަށި ފިޔަވަޅު އަޅާނެކަމުގެ ޔަގީންކަން ބޭންކުން ވަނީ ދީފައެވެ.